ପାକିସ୍ତାନକୁ ପ୍ରଧାନମନ୍ତ୍ରୀଙ୍କ ଚେତାବନୀ: ନିରୀହଙ୍କ ରକ୍ତ ବୁହାଇଲେ ମହାବିନାଶ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଙ୍ଗଳବାର ପଞ୍ଜାବର ଆଦମପୁର ଏୟାର୍‌ବେସ୍‌ ପରିଦର୍ଶନ ସମୟରେ ଭାରତୀୟ ସଶସ୍ତ୍ର ବାହିନୀକୁ ସଲାମ କରିବା ସହ ଅପରେସନ ସିନ୍ଦୂରର ସଫଳତାର ଶ୍ରେୟ ଦେଇଛନ୍ତି। ଭାରତୀୟ ବାୟୁସେନା ଅତ୍ୟାଧୁନିକ ଜ୍ଞାନକୌଶଳରେ ସଜ୍ଜିତ ବୋଲି କହି କୌଶଳ ସହ ଟେକ୍ନୋଲୋଜିକୁ ଯୋଡ଼ିବା ପାଇଁ ପ୍ରଧାନମନ୍ତ୍ରୀ ସେନାକୁ ପ୍ରଶଂସା କରିଛନ୍ତି। ‘ମୁଁ ଏଠାକୁ ବୀର ଯୋଦ୍ଧାଙ୍କ ଦର୍ଶନ ପାଇଁ ଆସିଛି। ଯେତେବେଳେ ବି ଭାରତର ଶକ୍ତି ଉପରେ ଆଲୋଚନା ହେବ, ଆପଣଙ୍କ ନାମ ସାମ୍ନାକୁ ଆସିବ। ନୂଆ ପିଢ଼ି ପାଇଁ ଆପଣ ହିଁ ପ୍ରେରଣା’ ବୋଲି ପ୍ରଧାନମନ୍ତ୍ରୀ କହିଛନ୍ତି।

ମୋଦୀ କହିଛନ୍ତି, ପ୍ରତ୍ୟେକ ଭାରତୀୟ ଆପଣଙ୍କ ନିକଟରେ ଋଣୀ। ଅପରେସନ ସିନ୍ଦୂର କୌଣସି ସାଧାରଣ ମିସନ ନୁହେଁ। ଏହା ଭାରତର ନୀତି, ଶକ୍ତି ଓ ଉଦ୍ଦେଶ୍ୟର ସମନ୍ୱୟ। ଆପଣ ସେମାନଙ୍କୁ ସାମ୍ନାରୁ ଆକ୍ରମଣ କରିଛନ୍ତି। ୯ଟି ଆତଙ୍କୀ କେନ୍ଦ୍ର ଧ୍ୱଂସ ହୋଇଛି। ଏଥିରେ ୧୦୦ରୁ ଅଧିକ ଆତଙ୍କବାଦୀ ନିହତ ହୋଇଥିଲେ। ଭାରତୀୟ ସେନା ମଧ୍ୟ ପାକିସ୍ତାନୀ ସେନାକୁ ଦେଖାଇଦେଇଛି ଯେ ପାକିସ୍ତାନରେ ଏମିତି କୌଣସି ସ୍ଥାନ ନାହିଁ ଯେଉଁଠାରେ ଆତଙ୍କବାଦୀମାନେ ବସି ସହଜରେ ନିଶ୍ୱାସ ନେଇପାରିବେ। ଆମେ ସେମାନଙ୍କୁ ଏଣିକି ଘରେ ପଶି ମାରିବୁ ଏବଂ ଖସିବାକୁ କୌଣସି ସୁଯୋଗ ଦେବୁନାହିଁ। ନିରୀହଙ୍କ ରକ୍ତ ବୁହାଇଲେ ସେମାନଙ୍କୁ ବିନାଶ ଓ ମହାବିନାଶର ସମ୍ମୁଖୀନ ହେବାକୁ ପଡ଼ିବ। ଆମର ଡ୍ରୋନ୍ ଓ କ୍ଷେପଣାସ୍ତ୍ର କଥା ଭାବି ସେମାନେ ଭୟଭୀତ ହୋଇପଡ଼ିଛନ୍ତି। ଆପଣମାନେ ଭାରତର ସମ୍ମାନକୁ ନୂଆ ସ୍ତରକୁ ନେଇଯାଇଛନ୍ତି। ଆମ ବାୟୁସେନା ପାକିସ୍ତାନ ଭିତରେ ପିନ୍ ପଏଣ୍ଟ ସଠିକତାର ସହ ଆକ୍ରମଣ କରିବାକୁ ମାତ୍ର ୨୫ ମିନିଟ୍ ସମୟ ନେଇଥିଲା। ଆମେ ଆତଙ୍କବାଦୀ ମୁଖ୍ୟାଳୟ ଓ ଆତଙ୍କବାଦୀଙ୍କୁ ଆକ୍ରମଣ କରିଥିଲୁ। ପାକିସ୍ତାନ ସେମାନଙ୍କ ବେସାମରିକ ବିମାନକୁ ଢାଲ ଭାବେ ବ୍ୟବହାର କରିଥିଲା। ଆପଣ ବେସାମରିକ ବିମାନକୁ କ୍ଷତି ନ ପହଞ୍ଚାଇ ଆକ୍ରମଣ କରିଛନ୍ତି, ଏହା ପ୍ରଶଂସନୀୟ ଥିଲା। ସେମାନେ ଏହି ଏୟାର୍‌ବେସ୍ ଓ ଅନ୍ୟାନ୍ୟ ଏୟାର୍‌ବେସ୍‌କୁ ଟାର୍ଗେଟ୍‌ କରିବାକୁ ଚେଷ୍ଟା କରିଥିଲେ ମଧ୍ୟ ସମସ୍ତ ପ୍ରୟାସ ବିଫଳ ହୋଇଥିଲା।

ଭାରତୀୟ ସଶସ୍ତ୍ର ବାହିନୀକୁ ସଲାମ କଲେ ପ୍ରଧାନମନ୍ତ୍ରୀ
‘ଆପଣଙ୍କ ବୀରତ୍ୱ ଅପରେସନ ସିନ୍ଦୂରକୁ ସଫଳ କରିଛି’
ଅସ୍ତ୍ରବିରତି ସର୍ତ୍ତ ମାନିବାକୁ ପ୍ରତିବଦ୍ଧତା ଘୋଷଣା କଲା ପାକ୍‌

ପାକ୍ ଡ୍ରୋନ୍, ବିମାନ, କ୍ଷେପଣାସ୍ତ୍ର ସବୁ ଆମ ପ୍ରତିରକ୍ଷା ବ୍ୟବସ୍ଥା ଆଗରେ ବିଫଳ ହୋଇଛି ବୋଲି ପ୍ରଧାନମନ୍ତ୍ରୀ ମୋଦୀ କହିଛନ୍ତି।  ଆମ ଏୟାର୍‌ବେସ୍‌କୁ ପାକିସ୍ତାନ ଟାର୍ଗେଟ୍‌ କରିବାରୁ ପ୍ରତ୍ୟୁତ୍ତରରେ ଭାରତ ରାଵଲପିଣ୍ଡି, ଇସଲାମାବାଦ, ଲାହୋର ଓ କରାଚୀ ସମେତ ଅନେକ ପାକିସ୍ତାନୀ ଏୟାର୍‌ବେସ୍ ଉପରେ କ୍ଷେପଣାସ୍ତ୍ର ଆକ୍ରମଣ କରି ସେମାନଙ୍କର ବ୍ୟାପକ କ୍ଷୟକ୍ଷତି କରିଥିଲା। ପାକିସ୍ତାନ ଭାରତର ଆଦମପୁର ଏୟାର୍‌ବେସ୍‌କୁ କ୍ଷତି ପହଞ୍ଚାଇଛି ବୋଲି ଦାବି କରିଥିଲା, କିନ୍ତୁ ମଙ୍ଗଳବାର ପ୍ରଧାନମନ୍ତ୍ରୀଙ୍କ ଗସ୍ତ ସେହି ଦାବିକୁ ଖଣ୍ଡନ କରିଛି। ସୋମବାର ଅପରେସନ ସିନ୍ଦୂର ପରେ ପ୍ରଥମ ଅଭିଭାଷଣରେ ପ୍ରଧାନମନ୍ତ୍ରୀ  ସେନାକୁ ଅଭିନନ୍ଦନ ଜଣାଇଥିଲେ ଓ ଅସ୍ତ୍ରବିରତି ଚୁକ୍ତି ଉଲ୍ଲଂଘନ ହେଲେ ପାକିସ୍ତାନ ତାହାର ପରିଣାମ ଭୋଗିବ ବୋଲି କଡ଼ା ଚେତାବନୀ ଦେଇଥିଲେ। ଆଜି ଏହାର ଜବାବରେ ପାକିସ୍ତାନ ବିଦେଶ ମନ୍ତ୍ରାଳୟ ପକ୍ଷରୁ ଜାରି ବିବୃତିରେ କୁହାଯାଇଛି ଯେ ପାକିସ୍ତାନ ଅସ୍ତ୍ରବିରତି ଚୁକ୍ତିକୁ ପାଳନ କରିବା ପାଇଁ ପ୍ରତିଶ୍ରୁତିବଦ୍ଧ।

ଏସ୍-୪୦୦ ସିଷ୍ଟମ୍‌ ସାମ୍ନାରେ ପ୍ରଧାନମନ୍ତ୍ରୀ

ନୂଆଦିଲ୍ଲୀ: ପଞ୍ଜାବର ଆଦମପୁରସ୍ଥିତ ବାୟୁସେନା ଘାଟିର ରନ୍‌ୱେରେ ପାକିସ୍ତାନ କ୍ଷେପଣାସ୍ତ୍ର ମାଡ଼ କରି ଏହି ଘାଟିକୁ ଏକ ବର୍ଷ ପାଇଁ ଅକାମୀ କରିଦେଇଥିଲା ବୋଲି  ଦାବି କରିଥିଲା। ଚୀନ୍ ନିର୍ମିତ ଜେଏଫ୍-୧୭ ଯୁଦ୍ଧ ବିମାନ ପଠାଇ ସେଠାରେ ଥିବା ରୁଷ୍‌-ନିର୍ମିତ ଏସ୍-୪୦୦ କ୍ଷେପଣାସ୍ତ୍ର ପ୍ରତିରକ୍ଷା ବ୍ୟବସ୍ଥାକୁ ଧ୍ୱଂସ କରିଛି, ଲଢୁଆ ବିମାନ ଓ ରାଡାର ଷ୍ଟେସନକୁ ଧ୍ୱଂସ କରିଛି ଓ ଏହି ଆକ୍ରମଣରେ ୬୦ ଜଣ ଭାରତୀୟ ଯବାନ ସହିଦ ହୋଇଥିବା ମଧ୍ୟ ପାକିସ୍ତାନ ଦାବି କରିଥିଲା। ଏହାକୁ ପ୍ରମାଣ କରିବା ପାଇଁ ପାକ୍ ସେନା ଆଦମପୁର ବେସ୍‌ର ବିକୃତ ସାଟେଲାଇଟ୍ ଫଟୋ ବ୍ୟବହାର କରିଥିଲା। ଆଜି ସକାଳେ ଏହି ଘାଟିରୁ ଏସ୍-୪୦୦ ସମ୍ମୁଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବାୟୁସେନା ଯୋଦ୍ଧାଙ୍କୁ ଉଦ୍‌ବୋଧନ ଦେବାପରେ ପାକିସ୍ତାନ ନିଜର ମିଥ୍ୟା ଦାବି ଓ ଷଡ୍‌ଯନ୍ତ୍ର ପାଇଁ ପୂରା ବିଶ୍ବରେ ଲଜ୍ଜିତ ହୋଇଛି।
 ଏସ୍-୪୦୦ କ୍ଷେପଣାସ୍ତ୍ର ପ୍ରତିରକ୍ଷା ବ୍ୟବସ୍ଥାକୁ ବିଶ୍ୱର ଅନ୍ୟତମ ଶ୍ରେଷ୍ଠ ପ୍ରତିରକ୍ଷା ବ୍ୟବସ୍ଥା ବୋଲି କୁହାଯାଏ। ସେଥିମଧ୍ୟରୁ ଭାରତ ପାଖରେ ତିନୋଟି ସ୍କ୍ୱାଡ୍ରନ୍ ଅଛି ଏବଂ ଆଉ ଦୁଇଟି ସ୍କ୍ୱାଡ୍ରନ୍ ଆସିବାର ଅଛି। ଏସ୍-୪୦୦ ଗତ ସପ୍ତାହରେ ପାକିସ୍ତାନ ନିକ୍ଷେପ କରିଥିବା ଅନେକ କ୍ଷେପଣାସ୍ତ୍ରକୁ ଖସାଇ ଦେଇଥିଲା। ମୋଦୀ ଆଜି ସକାଳ ୬ଟା ୧୫ରେ ଆଦମପୁରରେ ଅବତରଣ କରିଥିଲେ, ଯେଉଁଥିରୁ ସ୍ପଷ୍ଟ ହୋଇଛି ଯେ, ରନ୍‌ୱେ ଶତ ପ୍ରତିଶତ ଠିକ୍ ଅଛି। ପ୍ରଧାନମନ୍ତ୍ରୀ ସେଠାରେ ପାଖାପାଖି ଏକ ଘଣ୍ଟା ରହିଥିଲେ। ଗତରାତିରେ ଦେଶବାସୀଙ୍କ ଉଦ୍ଦେଶ୍ୟରେ ଉଦ୍‌ବୋଧନ ଦେବା ବେଳେ କ୍ଷେପଣାସ୍ତ୍ର ଓ ଡ୍ରୋନ୍ ଯୁଦ୍ଧରେ ଭାରତର ସୈନିକମାନଙ୍କ ସାହସିକତାକୁ ପ୍ରଶଂସା କରିଥିଲେ। ଜମ୍ମୁ-କାଶ୍ମୀରର ଉଧମପୁର ଏବଂ ରାଜସ୍ଥାନ ଓ ଗୁଜରାଟର ଅନ୍ୟାନ୍ୟ ସାମରିକ ପ୍ରତିଷ୍ଠାନ ଓ ପଞ୍ଜାବର ଫିରୋଜପୁରରେ ମଧ୍ୟ ପାକ୍ ସେନା ଆକ୍ରମଣ କରିଥିଲା। ତେବେ ଏଥିରେ କୌଣସି କ୍ଷୟକ୍ଷତି ହୋଇ ନ ଥବା ଭାରତୀୟ ସଶସ୍ତ୍ର ବାହିନୀ ପକ୍ଷରୁ କୁହାଯାଇଛି।