ନୂଆଦିଲ୍ଲୀ : ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆସନ୍ତାକାଲି ଦେଶର ବିଭିନ୍ନ ବର୍ଗର ଛାତ୍ରଛାତ୍ରୀ, ଶିକ୍ଷକ ଏବଂ ଅଭିଭାବକଙ୍କ ସହ ନୂଆଦିଲ୍ଲୀର ତଲକାଟୋରା ଷ୍ଟାଡ଼ିୟମରେ ପରୀକ୍ଷା ପେ ଚର୍ଚ୍ଚା ୨.୦ କାର୍ଯ୍ୟକ୍ରମରେ ଭାବ ବିନିମୟ କରିବେ । ପରୀକ୍ଷା ପୂର୍ବରୁ ଏହାକୁ ନେଇ ଛାତ୍ରଛାତ୍ରୀ, ଶିକ୍ଷକ ଓ ଅଭିଭାବକଙ୍କ ମନରେ ଅନେକ ଆଶା, ଆଶଙ୍କା ଓ ଭୟ ସୃଷ୍ଟି ହୋଇଥାଏ । ସେମାନେ ଏହି କାର୍ଯ୍ୟକ୍ରମରେ କେବଳ ଅଂଶଗ୍ରହଣ କରିବେ ନାହିଁ ପରନ୍ତୁ ପ୍ରଧାନମନ୍ତ୍ରୀଙ୍କ ଠାରୁ ମୂଲ୍ୟବାନ ପରାମର୍ଶମାନ ମଧ୍ୟ ଗ୍ରହଣ କରିବେ । ଛାତ୍ରଛାତ୍ରୀମାନେ କିଭଳି ଏକ ସ୍ୱାଭାବିକ ଓ ଚାପମୁକ୍ତ ମନରେ ପରୀକ୍ଷା ଦେଇପାରିବେ ସେଥିପାଇଁ ପ୍ରଧାନମନ୍ତ୍ରୀ ସଦାସର୍ବଦା ଛାତ୍ରଛାତ୍ରୀମାନଙ୍କୁ ପରାମର୍ଶ ଦେଇଆସୁଛନ୍ତି । ଏହା ଫଳରେ ସେମାନେ ବିଦ୍ୟା ଅଧ୍ୟୟନର ଦୀର୍ଘ ଯାତ୍ରାରେ କୃତକାର୍ଯ୍ୟ ଓ ସଫଳ ହୋଇପାରିବେ ବୋଲି ପ୍ରଧାନମନ୍ତ୍ରୀ ସେମାନଙ୍କୁ ପରାମର୍ଶ ଦେଇଥାନ୍ତି ।
ପରୀକ୍ଷା ପେ ଚର୍ଚ୍ଚା କାର୍ଯ୍ୟକ୍ରମ ସକାଶେ ସମସ୍ତ ପ୍ରକାର ପ୍ରସ୍ତୁତି କାର୍ଯ୍ୟ ଶେଷ ହୋଇଛି ଏବଂ ଆସନ୍ତାକାଳି ପୂର୍ବାହ୍ନ ୧୧ଟା ବେଳେ ଏହା ଅନୁଷ୍ଠିତ ହେବ ।
Sambad is now on WhatsApp
Join and get latest news updates delivered to you via WhatsApp
ଦୂରଦର୍ଶନ ପକ୍ଷରୁ ଏହି କାର୍ଯ୍ୟକ୍ରମର ସିଧା ପ୍ରସାରଣ କରାଯିବ ଏବଂ ଅନ୍ୟାନ୍ୟ ଟେଲିଭିଜନ ଚାନେଲମାନେ ମଧ୍ୟ ଏହାର ପ୍ରସାରଣ କରିବେ । ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିବା ସକାଶେ ସାରା ଦେଶର ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ କ୍ଷେତ୍ରରୁ ଆସି ନୂଆଦିଲ୍ଲୀଠାରେ ପହଂଚିଛନ୍ତି । ଚଳିତ ବର୍ଷ ୨୪ଟି ରାଜ୍ୟ/ କେନ୍ଦ୍ରଶାସିତ କ୍ଷେତ୍ରରୁ କଲେଜ ଛାତ୍ରଛାତ୍ରୀମାନେ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରୁଛନ୍ତି । ମୋଟ ୨୦୦୦ ଛାତ୍ରଛାତ୍ରୀ, ଶିକ୍ଷକ ଏବଂ ଅଭିଭାବକ ତଲକାଟୋରା ଷ୍ଟାଡ଼ିୟମରେ ପରୀକ୍ଷା ପେ ଚର୍ଚ୍ଚା କାର୍ଯ୍ୟକ୍ରମରେ ଭାଗନେବେ ।
ଏଥିପାଇଁ ଜାନୁାଆରୀ ୭ ଠାରୁ ୧୭ ପର୍ଯ୍ୟନ୍ତ ଏକ ଅନଲାଇନ ପ୍ରତିଯୋଗିତାର ଆୟୋଜନ କରାଯାଇଥିଲା ଏବଂ ଏଥିରେ ନବମ ଠାରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଏବଂ ଗ୍ରାଜୁଏଟ ଓ ଅଣ୍ଡର ଗ୍ରାଜୁଏଟ ଛାତ୍ରଛାତ୍ରୀ, ସେମାନଙ୍କର ମାତାପିତା ଏବଂ ଶିକ୍ଷକମାନେ ଭାଗ ନେଇଥିଲେ । ସେମାନଙ୍କ ମଧ୍ୟରୁ ଚୟନ କରାଯାଇଥିବା ଛାତ୍ରଛାତ୍ରୀ, ମାତାପିତା ଓ ଶିକ୍ଷକମାନେ ଆସନ୍ତାକାଲି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ସହ ଭାବ ବିନିମୟ କରିବେ ।