ନୂଆଦିଲ୍ଲୀ: ରାଷ୍ଟ୍ରାୟତ ବ୍ୟାଙ୍କ ପଞ୍ଜାବ ନ୍ୟାସନାଲ ବ୍ୟାଙ୍କରେ ଏକ ବଡ଼ ଧରଣର ଆର୍ଥିକ ଠକେଇ କାରବାରର ସୁରାକ ମିଳିଛି । ଏହି ଠକେଇ ପରିମାଣ ପ୍ରାୟ ୧୧,୩୬୦ କୋଟି ଟଙ୍କା ହେବ ବୋଲି ବ୍ୟାଙ୍କ ପକ୍ଷରୁ ବମ୍ବେ ଷ୍ଟକ ଏକ୍ସଚେଞ୍ଜକୁ ସୂଚନା ଦିଆଯାଇଛି । ମୁମ୍ବାଇର ଏକ ଶାଖାରେ ଏହି ସଂଦେହଜନକ କାରବାର ହଇଥିବା ଜଣାଯାଇଛି ।
Sambad is now on WhatsApp
Join and get latest news updates delivered to you via WhatsApp
ପିଏନବି ଦେଶର ୨ୟ ବୃହତ୍ତମ ବ୍ୟାଙ୍କ ହୋଇଥିବା ବେଳେ ଏହି ଠକେଇର ପରିମାଣ ବ୍ୟାଙ୍କର ମୋଟ ବଜାର ପୁଞ୍ଜି ବା ମାର୍କେଟ କ୍ୟାପିଟାଲାଇଜେସନର ଏକ ତୃତୀୟାଂଶ ବୋଲି ଅନୁମାନ କରାଯାଉଛି । ଏହି ଦୁର୍ନୀତି ସଂପର୍କରେ ବ୍ୟାଙ୍କ ପକ୍ଷରୁ ଇତି ମଧ୍ୟରେ ସିବିଆଇ, ଭାରତୀୟ ରିଜର୍ଭ ବ୍ୟାଙ୍କ ଓ ସେବିକୁ ସୂଚୀତ କରାଯାଇଛି ।
ଗତ ଫେବ୍ରୁଆରୀ ୫ତାରିଖରେ ପିଏନବି ଜଣାଇଥିଲା ଯେ ମୁମ୍ବାଇର ବ୍ରାଡି ହାଉସ ଶାଖାରେ କାମ କରୁଥିବା ଏହାର ଦୁଇଜଣ କର୍ମଚାରୀ ଗୋକୁଲନାଥ ସେଟ୍ଟୀ ଓ ମନୋଜ ହନୁମେଣ୍ଟ ଖରାତ୍ ଡାଇମଣ୍ଡ ଗ୍ରୁପର ପ୍ରମୋଟର ମୋଦି, ନିଶଲ ମୋଦି, ଅମି ନିରବ ମୋଦି, ମୋହୁଲ ଚିନୁଭାଇ ଚୋସକୀ ନାମକ ବ୍ୟକ୍ତିମାନଙ୍କ ସହ ଅସାଧୁ ମେଣ୍ଟ କରି ୨୮୦ କୋଟି ଟଙ୍କାର ଋଣ ପ୍ରଦାନ କରିଛନ୍ତି । ଏହି ଘଟଣା ଜଣାପଡ଼ିବା ପରେ ବ୍ୟାଙ୍କ ପକ୍ଷରୁ ତୁରନ୍ତ ସିବିଆଇକୁ ସୂଚୀତ କରାଯାଇଥିଲା । ପ୍ରାରମ୍ଭିକ ତଦନ୍ତରୁ ଏହି ଦୁର୍ନୀତି ସମ୍ପର୍କରେ ଜାଣିବା ପରେ ସିବିଆଇ ଏଥିରେ ସଂପୃକ୍ତ ବ୍ୟକ୍ତିମାନଙ୍କ ବିରୋଧରେ ଏଫଆଇଆର ଦାଏର କରିଥିଲା । ତେବେ ଧୀରେ ଧୀରେ ବ୍ୟାପକ ଖୋଳତାଡ଼ ପରେ ଏହି ପରିମାଣ ବେଶ ବଡ଼ ବୋଲି ଜଣାପଡିଥିଲା । ଏସବୁ ସଂଦେହାସ୍ପତ କାରବାର ଫଳରେ ବ୍ୟାଙ୍କର ୧୧,୩୬୦ କୋଟି ଟଙ୍କା କ୍ଷତି ହୋଇଥିବା ଜଣାଯାଇଛି ।