ମୁମ୍ବାଇରୁ ୫୦ ଲକ୍ଷ ଟଙ୍କା ସହ ସୁନା ଅଳଙ୍କାର ଚୋରି କରି ବିହାର ଯାଉଥିବାବେଳେ ଟ୍ରେନରୁ ସହାୟକକୁ ଗିରଫ କଲା ପୁଲିସ

ମୁମ୍ବାଇ: ମାଲିକଙ୍କ ବିଶ୍ୱାସରେ ବିଷ ଦେଇ ଚୋରି କଲା ଟଙ୍କା ସହ ସୁନା ଅଳଙ୍କାର | ଆଉ ଏସବୁ ଧରି ଫେରାର ହେଉଥିବାବେଳେ ଟ୍ରେନରୁ ସହାୟକକୁ ଗିରଫ କଲା ପୁଲିସ | ଗତ ରବିବାର ବିଳମ୍ବିତ ରାତିରେ ମୁମ୍ବାଇର ଜଣେ ବ୍ୟକ୍ତିଙ୍କ ଘରୁ ଅଳଙ୍କାର ଏବଂ ନଗଦ ଟଙ୍କା ଲୁଟିନେଇଥିଲେ ଘରୋଇ ସହାୟକ | ଆଉ ୨୪ ଘଣ୍ଟା ପରେ ଖାର ପୁଲିସ ଭୁସାଭଲରୁ ୨୪ ବର୍ଷୀୟ ସହାୟକକୁ ଗିରଫ କରିଥିଲା। ମିଳିଥିବା ସୂଚନା ମୁତାବକ ଖାର ୱେଷ୍ଟର ୫୫ ବର୍ଷୀୟ ମହେଶ ଗାନ୍ଧୀ ଅଭିଯୋଗ କରିଥିଲେ ଯେ ଅଭିଯୁକ୍ତ ରାହୁଲ କାମାତ ଗତ ଦୁଇ ବର୍ଷ ଧରି ତାଙ୍କ ଘରେ କାମ କରୁଥିଲେ।

ଅଗଷ୍ଟ ୧୮ରୁ ୨୦ ମଧ୍ୟରେ ଗାନ୍ଧୀ ପରିବାର ଜଣେ ସମ୍ପର୍କୀୟଙ୍କ ବାହାଘର ପାଇଁ ଉଦୟପୁର ଯାଇଥିଲେ | ତେବେ ଘରୋଇ ସହାୟକଙ୍କୁ ଘରର ଦାୟିତ୍ୱ ଦେଇ ଯାଇଥିଲେ | ଆଉ ଅଗଷ୍ଟ ୨୦ରେ ଫେରିବା ପରେ ତାଙ୍କ ଆଲମାରୀ ଏବଂ ଲକର ଖୋଲା ଥିବା ସହ ଘରୋଇ ସହାୟକ ଘରେ ନଥିବାର ଦେଖି ତୁରନ୍ତ ଖାର ପୁଲିସକୁ ସୂଚନା ଦେଇଥିଲେ।

ଏହାପରେ ପୁଲିସ ରାହୁଲ କାମାତର ମୋବାଇଲ୍ ଲୋକେସନ ଟ୍ରାକ କରିବାରୁ ଜଣାପଡିଥିଲା ଯେ ସେ ଟ୍ରେନ ଯୋଗେ ନିଜ ଗାଁ ବିହାରକୁ ଯାଉଛି | ଏହାପରେ ପୁଲିସ ଅଭିଯୁକ୍ତକୁ ଖୋଜିବା ଆରମ୍ଭ କରିଥିଲା | ମୁମ୍ବାଇରୁ ବିହାର ଯାଉଥିବା ଟ୍ରେନକୁ ଯାଞ୍ଚ କରିବା ପରେ ରାହୁଲକୁ ଭୁସାଭଲରୁ ଗିରଫ କରିଥିଲା | ଅଭିଯୁକ୍ତ ନିକଟରୁ ପୁଲିସ ୫୦ ଲକ୍ଷ ଟଙ୍କା ଏବଂ ସୁନାଗହଣା ଜବତ କରିଥିଲା ।