ଆପ୍ ନେତା ତାହିର୍ ହୁସେନ୍ଙ୍କ ଭାଇଙ୍କୁ ଖୋଜୁଛି ଦିଲ୍ଲୀ ପୁଲିସ, ଗିରଫ ହେବେ ଦିଲ୍ଲୀ ହିଂସାରେ ସାମିଲ ଥିବା ଶାହା ଆଲମ
ନୂଆଦିଲ୍ଲୀ: ଦିଲ୍ଲୀ ଦଙ୍ଗା ଓ ଗୁଇନ୍ଦା ବ୍ୟୁରୋ ଅଧିକାରୀ ଅଙ୍କିତ୍ ଶର୍ମାଙ୍କ ହତ୍ୟା ମାମଲାରେ ଅଭିଯୁକ୍ତ ଆମ୍ ଆଦମୀ ପାର୍ଟିର ପୂର୍ବତନ କର୍ପୋରେଟର ତାହିର ହୁସେନଙ୍କୁ ଦିଲ୍ଲୀ ପୁଲିସର କ୍ରାଇମ୍ ବ୍ରାଞ୍ଚ୍ ଟିମ୍ ଗିରଫ କରିବା ପରେ ତାଙ୍କର ଭାଇଙ୍କୁ ବି ଖୁବ ଶୀଘ୍ର ଗିରଫ କରାଯାଇପାରେ ବୋଲି ସୂଚନା ମିଳିଛି। ଦିଲ୍ଲୀ ପୁଲିସକୁ ତାହିର ହୁସେନଙ୍କ ଭାଇ ଶାହା ଆଲମଙ୍କ ଦିଲ୍ଲୀ ହିଂସାରେ ସାମିଲ ହୋଇଥିବା ନେଇ ବଳିଷ୍ଠ ପ୍ରମାଣ ମିଳିଛି । ପୁଲିସର ଅନେକ ଟିମ ଶାହା ଆଲମଙ୍କୁ ଖୋଜୁଛି ।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଯେ, ଆମ ଆଦମୀ ପାର୍ଟିରୁ ନିଲମ୍ବିତ ନେତା ତାହିର ହୁସେନ ଗୁଇନ୍ଦା ବ୍ୟୁରୋ ଅଧିକାରୀ ଅଙ୍କିତ ଶର୍ମାଙ୍କୁ ବର୍ବର ହତ୍ୟା ମାମଲାରେ ମଧ୍ୟ ମୁଖ୍ୟ ଅଭିଯୁକ୍ତ ଅଛନ୍ତି। ଦିଲ୍ଲୀ ହିଂସା ସମୟରେ ସେ ଶତାଧିକ ଦଙ୍ଗାକାରୀଙ୍କୁ ତାଙ୍କର ଏକ ନିର୍ମାଣାଧୀନ ବାସଭବନରେ ରଖାଇଥିଲେ ଏବଂ ସେଠାରେ ହିଂସା ପାଇଁ ବିପୁଳ ସାମଗ୍ରୀ ମହଜୁଦ୍ ରଖାଯାଇଥିଲା।
ଉଲ୍ଲେଖଯୋଗ୍ୟ, ତାହିର ହୁସେନ୍ ରାଉଜ୍ ଏଭେନ୍ୟୁ ଅଦାଲତରେ ଆତ୍ମ ସମର୍ପଣ କରିବା ପାଇଁ ଆବେଦନ ଦାଖଲ କରିଥିଲେ। ତେବେ ବିଚାରପତି ଏହି ଆବେଦନ ତାଙ୍କ ବିଚାର ପରିସରରେ ନ ଥିବା କହିଥିଲେ ଏବଂ ଆବେଦନକୁ ଖାରଜ କରି ଦେଇଥିଲେ। ଏହାପରେ ତାହିର ତୁରନ୍ତ କୋର୍ଟ ଛାଡ଼ିବା ପାଇଁ ପାର୍କିଂରେ ପହଞ୍ଚିବା ପରେ ସେଠାରେ ହିଁ ପୁଲିସ ତାଙ୍କୁ ଗିରଫ କରିନେଇଥିଲା।
ଏହାପରେ ନ୍ୟାୟାଳୟ ତାହିର ହୁସେନଙ୍କୁ ସାତ ଦିନିଆ ପୁଲିସ ରିମାଣ୍ଡରେ ପଠାଇ ଦେଇଥିଲେ । ଏହି ରିମାଣ୍ଡ ସମୟରେ ଏସଆଇଟି ତାହିର ହୁସେନଙ୍କୁ ପଚରାଉଚରା କରୁଛି ଏବଂ ଅନେକ ତଥ୍ୟ ହାସଲ କରିସାରିଥିବା ଜଣାଯାଇଛି । ତାହିର ହୁସେନଙ୍କଠାରୁ ଭାଇ ଶାହା ଆଲମ ଦିଲ୍ଲୀ ହିଂସାରେ ସାମିଲ ଥିବାର ପ୍ରମାଣ ପାଇଛି ପୁଲିସ।