କଶ୍ମୀର : ଆତଙ୍କବାଦୀଙ୍କ ଗୁଳିମାଡ଼ରେ ପୁଲିସ ଅଧିକାରୀ ସହିଦ
ଶ୍ରୀନଗର : ଉତ୍ତର-କଶ୍ମୀରର ସପୋରେ ଟାଉନର ଓ୍ଵାରପୋରା ଗ୍ରାମରେ ବୁଧବାର ସଂଧ୍ୟାରେ ଏକ ଆତଙ୍କବାଦୀ ଆକ୍ରମଣ ହୋଇଥିବା ଖବର ହସ୍ତଗତ ହୋଇଛି । ଆତଙ୍କବାଦୀଙ୍କ ଗୁଳିମାଡ଼ରେ ଜଣେ ସ୍ୱତନ୍ତ୍ର ପୁଲିସ ଅଧିକାରୀ ସହିଦ ହୋଇଛନ୍ତି । ଏହି ଘଟଣାରେ ଉକ୍ତ ଅଞ୍ଚଳର ଜଣେ ଦୋକାନୀ ନିହତ ହେବା ସହ ଜଣେ ବ୍ୟକ୍ତି ଆହତ ହୋଇଛି ।
Sambad is now on WhatsApp
Join and get latest news updates delivered to you via WhatsApp
ପୁଲିସ ସୁତ୍ରରୁ ମିଳିଥିବା ସୂଚନା ଅନୁସାରେ ବୁଧବାର ସଂଧ୍ୟାରେ ଓ୍ଵାରପୋରା ବଜାରରେ କେତେକ ଅଜ୍ଞାତ ବନ୍ଧୁକଧାରୀ ସ୍ୱତନ୍ତ୍ର ପୁଲିସ ଅଧିକାରୀ ଓ୍ଵାଜାହତ ଅହମଦଙ୍କ ଉପରକୁ ଗୁଳି ଚଳାଇଥିଲେ । ଘଟଣାସ୍ଥଳରେ ହିଁ ଅହମଦ ଓ ଦୋକାନୀ ଓମାର ସୁଭାନ ଟଳିପଡ଼ିଥିଲେ । ସେମାନଙ୍କୁ ସପୋରେ ହସପିଟାଲକୁ ଅଣାଯାଇଥିଲେ ମଧ୍ୟ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ । ଏହି ଘଟଣା ସଂପର୍କରେ ଖବର ମିଳିବା ପରେ ଘଟଣାସ୍ଥଳରେ ପୁଲିସ ଓ ସୁରକ୍ଷା ବଳ ପହଞ୍ଚିଥିଲେ । ଆତଙ୍କବାଦୀଙ୍କୁ ଧରିବା ପାଇଁ ସେନା ପକ୍ଷରୁ ଏକ ତଲାସି ଅଭିଯାନ ଆରମ୍ଭ ହୋଇଛି ।
ଅନ୍ୟଏକ ଘଟଣାକ୍ରମେ, କେନ୍ଦ୍ରୀୟ କଶ୍ମୀରର ଛଦୁରା ଇଲାକାରେ ସେନା ପକ୍ଷରୁ ଆତଙ୍କବାଦୀଙ୍କ ବିରୋଧରେ ଏକ ଅପରେସନ ଆରମ୍ଭ କରାଯାଇଛି । ଉକ୍ତ ଅଞ୍ଚଳରେ ଆତଙ୍କବାଦୀ ଲୁଚିଥିବା ସୂଚନା ମିଳିବା ପରେ ପୁଲିସ ଓ ସେନାର ମିଳିତ ତଲାସି ଅଭିଯାନ ଚାଲୁ ରହିଛି ।