ସିସିଟିଭି ଫୁଟେଜ ଆଧାରରେ ବିକ୍ଷୋଭକାରୀଙ୍କୁ ଖୋଜୁଛି ପୁଲିସ, ଦିଲ୍ଲୀ ହିଂସାକାଣ୍ଡକୁ ନେଇ ୧୫ଟି ମାମଲା ରୁଜୁ କଲା ପୁଲିସ
ନୂଆଦିଲ୍ଲୀ: ଗତକାଲି ଦିଲ୍ଲୀରେ ଟ୍ରାକ୍ଟର ପରେଡ ସମୟରେ ହୋଇଥିବା ହିଂସାକାଣ୍ଡ ଓ ପୁଲିସ ଉପରେ ଆକ୍ରମଣ ଘଟଣାରେ ଆକ୍ସନ ମୁଡ଼ରେ ଏବେ ଦିଲ୍ଲୀ ପୁଲିସ | ଏହି ଘଟଣାରେ କେଉଁମାନେ ସମ୍ପୃକ୍ତ ପୁଲିସ ଏବେ ତାହାର ଛାନଭିନ ଚଳାଇଛି | ଦିଲ୍ଲୀ ପୁଲିସ ଏବେ ପର୍ଯ୍ୟନ୍ତ ୧୫ଟି ମାମଲା ରୁଜୁ କରିଥିବାବେଳେ ସହରର ବିଭିନ୍ନ ସ୍ଥାନରେ ଲାଗିଥିବା ସିସିଟିଭି କ୍ୟାମେରାକୁ ଯାଞ୍ଚ କରାଯାଉଛି | ସିସିଟିଭି କ୍ୟାମେରାର ଫୁଟେଜକୁ ଆଧାର କରି ପ୍ରଦର୍ଶନକାରୀଙ୍କୁ ଚିହ୍ନଟ କରିବା ପ୍ରକ୍ରିୟା ଆରମ୍ଭ ହୋଇଯାଇଛି |
Sambad is now on WhatsApp
Join and get latest news updates delivered to you via WhatsApp
ଲାଲକିଲ୍ଲା, ନାଗଲୋଈ, ମୁକାରବା ଛକ ଓ ସେଣ୍ଟ୍ରାଲ ଦିଲ୍ଲୀରେ ଲାଗିଥିବା ସିସିଟିଭି ଫୁଟେଜକୁ ଦିଲ୍ଲୀ ପୁଲିସର ସ୍ପେଶାଲ ସେଲ ଓ କ୍ରାଇମବ୍ରାଞ୍ଚ ଅନୁଧ୍ୟାନ କରୁଛନ୍ତି | ଯେଉଁମାନେ ପୁଲିସ ଉପରେ ଆକ୍ରମଣ କରିଥିଲେ ଓ ସରକାରୀ ସମ୍ପତ୍ତି ନଷ୍ଟ କରିଥିଲେ ସେମାନଙ୍କୁ ବର୍ତ୍ତମାନ ପୁଲିସ ଖୋଜୁଥିବାବେଳେ ସେହି ସବୁ କୃଷକ ନେତାମାନଙ୍କୁ ଖୋଜାଯାଉଛି ଯେଉଁମାନେ ହିଂସାକାଣ୍ଡ ପାଇଁ ଉସୁକାଇଥିଲେ | ନିର୍ଦ୍ଧାରିତ ରୁଟ ଛାଡି ଅନ୍ୟ ରୁଟରେ ଯିବାକୁ ପ୍ରବର୍ତ୍ତାଇଥିବା କୃଷକ ନେତାଙ୍କୁ ଏବେ ଦିଲ୍ଲୀ ପୁଲିସ ଖୋଜୁଛି |
ସେହିପରି ଏହି ହିଂସାକାଣ୍ଡ ପରେ କୃଷି ଆଇନକୁ ନେଇ କୃଷକ ସଂଗଠନ ସହ ଆଲୋଚନା ହେବାକୁ ଥିବା ବୈଠକକୁ ବାତିଲ କରାଯାଇଛି | ସୁପ୍ରିମକୋର୍ଟ ଦ୍ୱାରା ଗଠନ ହୋଇଥିବା ଏହି କମିଟି କୃଷକ ସଂଗଠନମାନଙ୍କ ସହ ଆଲୋଚନା କରିଥାନ୍ତେ | କିନ୍ତୁ ହିଂସାକାଣ୍ଡକୁ ଦେଖି କମିଟି ବୈଠକକୁ ବାତିଲ କରାଯାଇଛି | ପରବର୍ତୀ ବୈଠକ ଜାନୁୟାରୀ ୨୯ ତାରିଖରେ ହେବ |