ସୁପ୍ରିମ୍କୋର୍ଟଙ୍କ ତତ୍ତ୍ୱାବଧାନରେ ତଦନ୍ତ ଚାହୁଁଛନ୍ତି ପୋର୍ସେ ଦୁର୍ଘଟଣା ପୀଡ଼ିତାଙ୍କ ପିତାମାତା
ନୂଆଦିଲ୍ଲୀ: ପୁଣେରେ ଏକ କାର୍ ଦୁର୍ଘଟଣାରେ ପ୍ରାଣ ହରାଇଥିବା ଦୁଇ ସଫ୍ଟୱେର ଇଞ୍ଜିନିୟରଙ୍କ ପିତାମାତା ଶୁକ୍ରବାର ଦାବି କରିଛନ୍ତି ଯେ ସୁପ୍ରିମ୍କୋର୍ଟ ଏହି ମାମଲାର ତଦନ୍ତ ଏବଂ ଶୁଣାଣି ଉପରେ ନଜର ରଖନ୍ତୁ।
ଏହି ମାମଲାର ଶୁଣାଣି ମହାରାଷ୍ଟ୍ରରେ ନୁହେଁ ବରଂ ମଧ୍ୟପ୍ରଦେଶରେ କରାଯାଉ ବୋଲି ପରିବାର ଲୋକେ ଦାବି କରିଛନ୍ତି। ମଧ୍ୟପ୍ରଦେଶର ୨୪ ବର୍ଷୀୟ ଆଇଟି ପ୍ରଫେସନାଲ ଅନୀଶ ଅବଧିଆ ଏବଂ ଅଶ୍ୱିନୀ କୋସ୍ତା ମେ ୧୯ ତାରିଖରେ ଏକ ମୋଟରସାଇକେଲରେ ଯାଉଥିବା ବେଳେ ପୁଣେ ସହରରେ ଜଣେ ୧୭ ବର୍ଷୀୟ ବାଳକ ଦ୍ରୁତ ଗତିରେ ଚଳାଉଥିବା ଏକ ପୋର୍ସେ ଗାଡ଼ି ସେମାନଙ୍କ ମୋଟରସାଇକେଲକୁ ଧକ୍କା ଦେବାରୁ ସେମାନଙ୍କର ମୃତ୍ୟୁ ଘଟିଥିଲା।
Sambad is now on WhatsApp
Join and get latest news updates delivered to you via WhatsApp
ଅଶ୍ୱିନୀ ଜବଲପୁରର ହୋଇଥିବା ବେଳେ ଅନୀଶ ଉମରିଆ ଜିଲ୍ଲା ବୀରସିଂହପୁର ପାଲିର ବାସିନ୍ଦା।
ଅଶ୍ୱିନୀଙ୍କ ବାପା ସୁରେଶ କୁମାର କୋଷ୍ଠା କହିଛନ୍ତି ଯେ, ନ୍ୟାୟ ପାଇବା ପାଇଁ ସୁପ୍ରିମକୋର୍ଟ ଏହି ମାମଲାର ତଦନ୍ତ ଓ ଶୁଣାଣି ଉପରେ ନଜର ରଖିବା ଉଚିତ। ଅପରାଧର ଗମ୍ଭୀରତାକୁ ଦୃଷ୍ଟିରେ ରଖି ଅଭିଯୁକ୍ତଙ୍କୁ ନାବାଳକ ଭାବେ ନୁହେଁ ବରଂ ବୟସ୍କ ଭାବେ ବିଚାର କରାଯିବା ଉଚିତ। କୋଷ୍ଠା ଆହୁରି ଅଭିଯୋଗ କରିଛନ୍ତି ଯେ ଅଭିଯୁକ୍ତ ନିଶାସକ୍ତ ଅବସ୍ଥାରେ ଥିବା ବେଳେ ସେ ତାଙ୍କ ଝିଅ ଏବଂ ଅନୀଶଙ୍କ ଉପରେ କାର୍ ଚଳାଇଥିଲା।
ଦୁର୍ଘଟଣା ପରେ ନାବାଳକକୁ ଜୁଭେନାଇଲ ଜଷ୍ଟିସ୍ ବୋର୍ଡରେ ହାଜର କରାଯାଇଥିଲା, ଯେଉଁଠାରେ ତାଙ୍କୁ ୩୦୦ ଶବ୍ଦର ପ୍ରବନ୍ଧ ଲେଖିବାକୁ କହି ଜାମିନ ମିଳିଥିଲା। ତୁରନ୍ତ ଜାମିନ ଓ ପୁଲିସର ରିଭ୍ୟୁ ପିଟିସନକୁ ନେଇ ଉତ୍ତେଜନା ପ୍ରକାଶ ପାଇବା ପରେ ଅଭିଯୁକ୍ତ ଜେଜେବି ରିୟଲ ଇଷ୍ଟେଟ୍ ଡେଭଲପର ବିଶାଲ ଅଗ୍ରୱାଲଙ୍କ ନାବାଳକ ପୁଅଙ୍କୁ ଜୁନ୍ ୫ ତାରିଖ ପର୍ଯ୍ୟନ୍ତ ପର୍ଯ୍ୟବେକ୍ଷଣ ଗୃହକୁ ପଠାଇ ଦେଇଛି। ପୁଲିସ ନାବାଳିକାଙ୍କ ବାପାଙ୍କୁ ମଧ୍ୟ ଗିରଫ କରିଛି।
ଶେଷ ନିଶ୍ୱାସ ପର୍ଯ୍ୟନ୍ତ ନ୍ୟାୟ ପାଇଁ ଲଢ଼େଇ କରିବି ବୋଲି ଅନୀଶଙ୍କ ବାପା ଓମ୍ ପ୍ରକାଶ ଅବଧିଆ କହିଛନ୍ତି। ପରିବାରକୁ ନ୍ୟାୟ ଦେବା ପାଇଁ ଏହି ମାମଲାର ଶୁଣାଣି ପୁଣେରେ ନୁହେଁ ବରଂ ମଧ୍ୟପ୍ରଦେଶରେ ହେବା ଉଚିତ ବୋଲି ସେ କହିଛନ୍ତି।
ଡ୍ରାଇଭିଂ ଲାଇସେନ୍ସ ନଥିଲେ ମଧ୍ୟ ଅଭିଯୁକ୍ତଙ୍କୁ ଥାନାରେ ଭିଆଇପି ଟ୍ରିଟମେଣ୍ଟ ଦିଆଯାଇଥିବା ସେ ଅଭିଯୋଗ କରିଛନ୍ତି। ଏହି ଦୁର୍ଘଟଣାକୁ ଡବଲ ମର୍ଡର ଭାବେ ବିବେଚନା କରାଯାଉ ବୋଲି ଅବଧିଆ କହିଛନ୍ତି।