ମହାଶିବରାତ୍ରିରେ ସରୁଛି ମହାକୁମ୍ଭ: ପ୍ରୟାଗରାଜରେ ପ୍ରବଳ ଭିଡ଼, ଆଜି ୧ କୋଟି ଶ୍ରଦ୍ଧାଳୁ ପକାଇଲେଣି ବୁଡ଼

ପ୍ରୟାଗରାଜ: ଏପଟେ ମହାଶିବରାତ୍ରି, ସେପଟେ ମହାକୁମ୍ଭର ଆଜି ଶେଷ ଦିନ ଓ ଶେଷ ରାତି । ପ୍ରୟାଗରାଜରେ ଆଜି ସରିବ ମହାକୁମ୍ଭ । ତେଣୁ ଅନ୍ତିମ ଦିନରେ ଅନ୍ତିମ ବୁଡ଼ ପକାଇବାକୁ ଶ୍ରଦ୍ଧାଳୁଙ୍କ ସୁଅ ଛୁଟିଛି । ପବିତ୍ର ଶିବରାତ୍ରିରେ ସଙ୍ଗମରେ ପବିତ୍ର ସ୍ନାନ କରିବାକୁ ସାରା ଦେଶରୁ କୋଟି କୋଟି ଶ୍ରଦ୍ଧାଳୁ ଆସୁଛନ୍ତି । ମହାକୁମ୍ଭ ଆଜି ସରୁଥିବାରୁ ଶେଷ ଦିନରେ ବି କେହି ସୁଯୋଗ ଛାଡୁ ନାହାନ୍ତି । ମହାକୁମ୍ଭର ଶେଷ ଦିନରେ ଅସମ୍ଭାଳ ଭିଡ ହେବା ନେଇ ଆନୁମାନ କରାଯାଇଥିବା ବେଳେ ଏହି ଅନ୍ତିମ ଦିନ ଯୋଗୀ ସରକାରଙ୍କ ପାଇଁ ବଡ ଚାଲେଞ୍ଜ ସୃଷ୍ଟି କରିଛି ।

ଆଜି ଗୋଟିଏ ଦିନରେ ୨ କୋଟି ଶ୍ରଦ୍ଧାଳୁ ତ୍ରିବେଣୀ ସଙ୍ଗମରେ ବୁଡ ପକାଇବାରୁ ଅନୁମାନ କରାଯାଉଥିବା ବେଳେ ସକାଳ ଠାରୁ ଦିନ ୧ଟା ଯାଏଁ ଗୋଟେ କୋଟି ଲୋକ ବୁଡ଼ ପକାଇ ସାରିଥିବା ପ୍ରଶାସନ ପକ୍ଷରୁ କୁହାଯାଇଛି । ସେପଟେ ଜାନୁୟାରୀ ୧୩ରୁ ଆରମଅଭ ହୋଇଥିବା ଏ ମହାକୁମ୍ଭରେ ଆଜି ଯାଏଁ ଅର୍ଥାତ ଆରମ୍ଭ ଦିନରୁ ଶେଷ ଦିନର ଅପରାହ୍ନ ଯାଏଁ ୬୬ କୋଟି ଶ୍ରଦ୍ଧାଳୁ ବୁଡ଼ ପକାଇଛନ୍ତି । ତେବେ ଆଜି ରାତି ସୁଦ୍ଧା ଆହୁରି ଲକ୍ଷ ଲକ୍ଷ ଲୋକ ବୁଡ ପକାଇବାର ସମ୍ଭାବନା ଥିବାରୁ ମହାକୁମ୍ଭର ଶେଷ ପର୍ୟ୍ୟାୟ ସୁଦ୍ଧା ୭୦ କୋଟି ଶ୍ରଦ୍ଧାଳୁ ବୁଡ ପକାଇ ସାରିଥିବା ଅନୁମାନ କରାଯାଉଛି । ସେପଟେ ଏତେ ସଂଖ୍ୟାର ଶ୍ରଦ୍ଧାଳୁଙ୍କ ଉପେ ପୁଷ୍ପ ବର୍ଷା କରାଯାଉଛି ।