ଇମ୍ଫାଲ: ମଣିପୁରରେ ଶାସକ ଭାରତୀୟ ଜନତା ପାର୍ଟି (ବିଜେପି) ନେତୃତ୍ୱ ଏନ୍ ବୀରେନ୍‌ ସିଂହଙ୍କ ଇସ୍ତଫାର କିଛି ଦିନ ପରେ ମୁଖ୍ୟମନ୍ତ୍ରୀ ପଦ ପାଇଁ ନୂଆ ନେତାଙ୍କୁ ମନୋନୀତ କରିବାରେ ବିଫଳ ହୋଇଥିବାରୁ ସେଠାରେ ରାଷ୍ଟ୍ରପତି ଶାସନ ଲାଗୁ କରାଯାଇଛି। ରାଜ୍ୟରେ ରାଷ୍ଟ୍ରପତି ଶାସନ ଲାଗୁ କରିବା ପାଇଁ ଗୃହ ମନ୍ତ୍ରଣାଳୟ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଦ୍ବାରା ଜାରି ଆଦେଶରେ କୁହାଯାଇଛି ଯେ, ରାଜ୍ୟର ପରିସ୍ଥିତିକୁ ନେଇ ରାଜ୍ୟପାଳଙ୍କ ରିପୋର୍ଟକୁ ଆଧାର କରି ସେ ଏହି ନିଷ୍ପତ୍ତି ନେଇଛନ୍ତି। 

Advertisment

ଦଳର ଉତ୍ତର-ପୂର୍ବ ପ୍ରଭାରୀ ସମ୍ବିତ ପାତ୍ର ଓ ବିଧାୟକଙ୍କ ମଧ୍ୟରେ ଅନେକ ପର୍ଯ୍ୟାୟ ଆଲୋଚନା ସତ୍ତ୍ୱେ ବିଜେପି ମୁଖ୍ୟମନ୍ତ୍ରୀ ପଦ ପାଇଁ ନୂଆ ନେତା ଘୋଷଣା କରିବାରେ ବିଫଳ ହୋଇଛି। ପାତ୍ର ଗତ ଦୁଇ ଦିନ ମଧ୍ୟରେ ଦୁଇ ଥର ରାଜ୍ୟପାଳ ଅଜୟ କୁମାର ଭଲ୍ଲାଙ୍କୁ ଭେଟିଛନ୍ତି। ମଙ୍ଗଳବାର ଦଳର ରାଜ୍ୟ ସଭାପତି ଏ ଶାରଦା ଦେବୀ ଓ ଭଲ୍ଲାଙ୍କ ସହ ଶ୍ରୀ ପାତ୍ର ଆଲୋଚନା କରିଥିବା ବେଳେ ବୁଧବାର ପୁଣି ରାଜ୍ୟପାଳଙ୍କୁ ଭେଟିଥିଲେ। ନୂଆ ମୁଖ୍ୟମନ୍ତ୍ରୀଙ୍କ ନାମକୁ ନେଇ କୁକି ଓ ମୈତେୟୀ ସଂପ୍ରଦାୟ ମଧ୍ୟରେ ସହମତି ହୋଇପାରି ନଥିବାରୁ  ଅଚଳାବସ୍ଥା ସୃଷ୍ଟି ହୋଇଥିଲା। ଅନ୍ୟପକ୍ଷରେ କଂଗ୍ରେସ ବିଧାୟକ ଥୋକ୍ଚୋମ୍ ଲୋକେଶ୍ୱର, ଶ୍ରୀ ପାତ୍ରଙ୍କ ରାଜ୍ୟ ଗସ୍ତର ଉଦ୍ଦେଶ୍ୟକୁ ନେଇ ପ୍ରଶ୍ନ ଉଠାଇବା ସହ ସେ ଅସଲରେ ନେତୃତ୍ୱ ସଙ୍କଟର ସମାଧାନ କରିବାକୁ ଚାହୁଛନ୍ତି କି ବୋଲି ପ୍ରଶ୍ନ କରିଛନ୍ତି। କଂଗ୍ରେସ ବିଧାୟକ କହିଛନ୍ତି ଯେ, ପାତ୍ର ବିଜେପି ବିଧାୟକଙ୍କ ସହ ଆଲୋଚନା କରି ନୂଆ ମୁଖ୍ୟମନ୍ତ୍ରୀ ନିଯୁକ୍ତ କରିବା ପାଇଁ ପଦକ୍ଷେପ ନେବା ଉଚିତ ଥିଲା। କିନ୍ତୁ ବିଧାନସଭା ଅଧିବେଶନ ଯେପରି ନ ହୁଏ ଏବଂ ରାଜ୍ୟର ସମସ୍ୟାକୁ ଅଣଦେଖା କରାଯାଏ ସେଥିପାଇଁ ତାଙ୍କର ଏହି ଗସ୍ତ ଉଦ୍ଦିଷ୍ଟ ଥିଲା ବୋଲି ସେ ଅଭିଯୋଗ କରିଛନ୍ତି। 

ମେ ୨୦୨୩ରେ ରାଜ୍ୟରେ ଜାତିଆଣ ହିଂସା ଆରମ୍ଭ ହେବା ପରଠାରୁ ୨୫୦ରୁ ଅଧିକ ଲୋକ ପ୍ରାଣ ହରାଇଛନ୍ତି ଏବଂ ହଜାର ହଜାର ଲୋକ ବାସହୀନ ହୋଇଛନ୍ତି। ଏହି ପରିପ୍ରେକ୍ଷୀରେ ମୁଖ୍ୟମନ୍ତ୍ରୀ ବୀରେନ୍ ସିଂହ ବିରୋଧୀ ଦଳ, ବିଶେଷ କରି କଂଗ୍ରେସର ତୀବ୍ର ସମାଲୋଚନାର ସମ୍ମୁଖୀନ ହୋଇଥିଲେ। ରାଜ୍ୟ ବିଧାନସଭାରେ ବିରୋଧୀ ଦଳ ଅନାସ୍ଥା ପ୍ରସ୍ତାବ ଆଣିବ ବୋଲି କହିଥିଲା। ବିଜେପିର କିଛି ବିଧାୟକ ବି ପ୍ରସ୍ତାବ ସପକ୍ଷରେ ଭୋଟ୍ ଦେଇପାରନ୍ତି 
ବୋଲି ଖବର ଆସିଥିଲା। ଏଣୁ ଫେବ୍ରୁଆରି ୧୦ରେ ବିଧାନସଭା ଆରମ୍ଭ ହେବାକୁ ଥିବା ବେଳେ ଏହା ପୂର୍ବରୁ ୯ ତାରିଖରେ ମୁଖ୍ୟମନ୍ତ୍ରୀ ପଦରୁ ବୀରେନ୍‌ ସିଂହ ଇସ୍ତଫା ଦେଇଥିଲେ। ଏହାପରେ ରାଜ୍ୟପାଳ ବିଧାନସଭା ଅଧିବେଶନ ବାତିଲ କରିଥିଲେ। ତେଣେ କଂଗ୍ରେସ ଓ ବିଜେପିର ସହଯୋଗୀ ନ୍ୟାସନାଲ ପିପୁଲ୍ସ ପାର୍ଟି ଓ ନାଗା ପିପୁଲ୍ସ ଫ୍ରଣ୍ଟ ରାଷ୍ଟ୍ରପତି ଶାସନକୁ ବିରୋଧ କରି କହିଛନ୍ତି ଯେ ମଣିପୁରରେ ବିବାଦର ସମାଧାନ ପାଇଁ ଏକ ଲୋକପ୍ରିୟ ସରକାର ଦରକାର।