ଜମ୍ମୁ-କଶ୍ମୀରରେ ପ୍ରଥମ ଥର ପାଇଁ ସମ୍ବିଧାନ ଦିବସ ପାଳିତ ହୋଇଛି : ମୋଦୀ

ନୂଆଦିଲ୍ଲୀ: ୭୫ତମ ସମ୍ବିଧାନ ଦିବସ ଅବସରରେ ସୁପ୍ରିମକୋର୍ଟରେ ଆୟୋଜିତ ଏକ ସମାରୋହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଯୋଗଦେଇଥିଲେ । କାର୍ଯ୍ୟକ୍ରମକୁ ସମ୍ବୋଧିତ କରି ସେ କହିଛନ୍ତି ଯେ ଭାରତୀୟମାନଙ୍କୁ ଶୀଘ୍ର ନ୍ୟାୟ ଦେବା ପାଇଁ ଏକ ନୂତନ ନ୍ୟାୟ ସଂହିତା ପ୍ରଣୟନ କରାଯାଇଛି। ଦଣ୍ଡବିଧାନ ଭିତ୍ତିକ ବ୍ୟବସ୍ଥା ଏବେ ନ୍ୟାୟ ଭିତ୍ତିକ ବ୍ୟବସ୍ଥାରେ ପରିଣତ ହୋଇଛି। ଜମ୍ମୁ-କଶ୍ମୀରରେ ପ୍ରଥମ ଥର ପାଇଁ ସମ୍ବିଧାନ ଦିବସ ପାଳିତ ହୋଇଛି। 

ସେ କହିଛନ୍ତି, “ଆମ ସମ୍ବିଧାନ ଦେଶର ପ୍ରତ୍ୟେକ ଲୋକଙ୍କ ଆଶା ଓ ଆବଶ୍ୟକତା ପୂରଣ କରିଛି। ସମ୍ବିଧାନର ଶକ୍ତି ଯୋଗୁଁ ଆଜି ଜମ୍ମୁ-କଶ୍ମୀରରେ ବାବା ସାହେବଙ୍କ ସମ୍ବିଧାନ ସମ୍ପୂର୍ଣ୍ଣ ରୂପେ କାର୍ଯ୍ୟକାରୀ ହୋଇଛି। ଜମ୍ମୁ-କଶ୍ମୀରରେ ପ୍ରଥମ ଥର ପାଇଁ ସମ୍ବିଧାନ ଦିବସ ପାଳିତ ହୋଇଛି। ଆଜି ଭାରତ ପରିବର୍ତ୍ତନର ଏକ ବଡ଼ ପର୍ଯ୍ୟାୟ ଦେଇ ଗତି କରୁଛି ଏବଂ ଭାରତର ସମ୍ବିଧାନ ଆମକୁ ବାଟ ଦେଖାଉଛି । ଏହା ଆମ ପାଇଁ ମାର୍ଗଦର୍ଶକ ପାଲଟିଛି।“

"ଆମ ସମ୍ବିଧାନର ନିର୍ମାତାମାନେ ଜାଣିଥିଲେ ଯେ ଭାରତର ଆକାଂକ୍ଷା, ଭାରତର ସ୍ୱପ୍ନ ସମୟ ସହିତ ନୂତନ ଉଚ୍ଚତାରେ ପହଞ୍ଚିବ । ସେ ଜାଣିଥିଲେ ଯେ ସ୍ୱାଧୀନ ଭାରତ ଏବଂ ଏହାର ନାଗରିକଙ୍କ ଆବଶ୍ୟକତା ବଦଳିବ, ଆହ୍ୱାନ ବଦଳିବ । ସେଥିପାଇଁ ସେ ଆମ ସମ୍ବିଧାନକୁ କେବଳ ଆଇନ ପୁସ୍ତକ ଭାବେ ଛାଡି ନଥିଲେ, ବରଂ ଏହାକୁ ଏକ ଜୀବନ୍ତ, ସର୍ବଦା ପ୍ରବାହିତ ସ୍ରୋତରେ ପରିଣତ କରିଥିଲେ।