ନୂଆଦିଲ୍ଲୀ: ପାକିସ୍ତାନ ଓ ଭାରତ ଗତକାଲି ଅସ୍ତ୍ରବିରତି ଘୋଷଣା କରିଥିଲେ। ଅପରାହ୍ଣ ୫ଟାରେ ଏହି ଘୋଷଣା ପରେ ରାତିରେ ପାକିସ୍ତାନ ଏହାକୁ ଉଲ୍ଲଂଘନ କରି ବିଶ୍ବାସଘାତ କରିଥିଲା। ଗତକାଲିର ଘଟଣା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ସକାଳେ ଏକ ଉଚ୍ଚସ୍ତରୀୟ ସମୀକ୍ଷା ବୈଠକ ତାଙ୍କ ୭ ଲୋକକଲ୍ୟାଣ ମାର୍ଗସ୍ଥିତ ବାସଭବନରେ କରିଛନ୍ତି। ଏହି ବୈଠକରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ବିଦେଶ ମନ୍ତ୍ରୀ ଏସ୍ ଜୟଶଙ୍କର, ଏନ୍ଏସ୍ଏ ଅଜିତ ଡୋଭଲ, ସିଡିଏସ୍ ଅନୀଲ ଚୌହାନ ଏବଂ ତିନି ସେନା ମୁଖ୍ୟ ଉପସ୍ଥିତ ଥିଲେ।
ନିୟନ୍ତ୍ରଣ ରେଖା (ଏଲଓସି)ରେ ସ୍ଥିତି ଆଜି ସ୍ଥିର ରହିଥିଲେ ମଧ୍ୟ ଗତରାତିରେ ଘଟଣାଗୁଡ଼ିକର ସମୀକ୍ଷା ରବିବାର ବୈଠକରେ କରାଯାଇଛି। ସୀମାରେ ସୁରକ୍ଷା ବଢ଼ାଇବା ପାଇଁ ଆଉ କେଉଁସବୁ ପଦକ୍ଷେପ ଆବଶ୍ୟକ ତାହା ଉପରେ ଆଲୋଚନା ହୋଇଥିଲା। ଅସ୍ତ୍ରବିରତି ଉଲ୍ଲଂଘନ କ୍ଷେତ୍ରରେ ଅତି କଠୋର ଓ ତ୍ବରିତ କାର୍ଯ୍ୟାନୁଷ୍ଠାନ ପାଇଁ ସେନାକୁ କୁହାଯାଇଛି।