ପ୍ରଧାନମନ୍ତ୍ରୀଙ୍କ ପରୀକ୍ଷା ପେ ଚର୍ଚ୍ଚା: ସାମିଲ ହେବେ ଓଡ଼ିଶାର ୫୬ ଛାତ୍ରଛାତ୍ରୀ
ନୂଆଦିଲ୍ଲୀ : ଆଗାମୀ ବୋର୍ଡ ପରୀକ୍ଷା ପାଇଁ ପ୍ରସ୍ତୁତ ହେଉଥିବା ଛାତ୍ରଛାତ୍ରୀମାନଙ୍କ ସହିତ ‘ପରୀକ୍ଷା ପେ ଚର୍ଚ୍ଚା’ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। କାର୍ଯ୍ୟକ୍ରମରେ ଓଡ଼ିଶାରୁ ୫୬ ଛାତ୍ରଛାତ୍ରୀଙ୍କ ସମେତ ସାରା ଦେଶରୁ ୨ ହଜାର ୫୦ ଛାତ୍ରଛାତ୍ରୀ ସାମିଲ ହେବେ।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର ଶିକ୍ଷା ମନ୍ତ୍ରାଳୟ ସୂତ୍ରରୁ ମିଳିଥିବା ସୂଚନା ଅନୁସାରେ ଏ ନେଇ ସମସ୍ତ ରାଜ୍ୟମାନଙ୍କୁ କେନ୍ଦ୍ର ଶିକ୍ଷା ସଚିବ ପତ୍ର ଲେଖିଛନ୍ତି। ପତ୍ରରେ କାର୍ଯ୍ୟକ୍ରମର ମାର୍ଗଦର୍ଶିକା ସଂପର୍କରେ ଅବଗତ କରାଯାଇଛି। କାର୍ଯ୍ୟକ୍ରମ ୨୦୨୨ ଫେବ୍ରୁଆରିରେ ହେବା ପ୍ରସ୍ତାବ ରହିଛି। କରୋନା ମହାମାରୀ ଯୋଗୁ ୨୦୨୧ ଭଳି ୨୦୨୨ର ‘ପରୀକ୍ଷା ପେ ଚର୍ଚ୍ଚା‘ କାର୍ଯ୍ୟକ୍ରମ ‘ଭର୍ଚୁଆଲ୍ ମୋଡ’ରେ ଆୟୋଜିତ ହେବା ସମ୍ଭାବନା ରହିଛି। କାର୍ଯ୍ୟକ୍ରମରେ ନବମରୁ ଦ୍ବାଦଶ ଶ୍ରେଣୀ ଛାତ୍ରଛାତ୍ରୀ ଭାଗ ନେବେ। ଏଥି ପାଇଁ ପଞ୍ଜୀକରଣ ଆରମ୍ଭ ହୋଇଛି। ଏହା ଜାନୁଆରି ୨୦ ପର୍ଯ୍ୟନ୍ତ ଚାଲିବ। କାର୍ଯ୍ୟକ୍ରମ ପାଇଁ ‘ନୋଡାଲ ଅଫିସର୍’ ନିଯୁକ୍ତି ନିମନ୍ତେ ସମସ୍ତ ରାଜ୍ୟମାନଙ୍କୁ କୁହାଯାଇଛି। ସ୍କୁଲ୍ ଶିକ୍ଷା ଏବଂ ସାକ୍ଷରତା ବିଭାଗ ଦ୍ବାରା ଏ ନେଇ ସମସ୍ତ ଜିଲ୍ଲାମାନଙ୍କୁ ପତ୍ର ଲେଖାଯାଇଛି। ‘ପରୀକ୍ଷା ପେ ଚର୍ଚ୍ଚା’ କାର୍ଯ୍ୟକ୍ରମ ପାଇଁ ଅଭିଭାବକ ଓ ଶିକ୍ଷକମାନଙ୍କ ନିମନ୍ତେ ଅନ୍ଲାଇନ ପ୍ରତିଯୋଗିତା ପରୀକ୍ଷା ମଧ୍ୟ ଆୟୋଜନ କରାଯିବ। ଏଥିରେ ଛାତ୍ରଛାତୀମାନଙ୍କ ସହିତ ଅଭିଭାବକ ଓ ଶିକ୍ଷକମାନେ ସାମିଲ ହୋଇପାରିବେ। ପ୍ରଧାନମନ୍ତ୍ରୀଙ୍କ ‘ପରୀକ୍ଷା ପେ ଚର୍ଚ୍ଚା’ କାର୍ଯ୍ୟକ୍ରମରେ ଭାଗ ନେବା ପାଇଁ ଛାତ୍ରଛାତ୍ରୀମାନଙ୍କ ଚୂଡ଼ାନ୍ତ ଚୟନ କେନ୍ଦ୍ର ଶିକ୍ଷା ମନ୍ତ୍ରାଳୟ ଦ୍ବାରା କରାଯିବ। ବୋର୍ଡ ପରୀକ୍ଷା ପୂର୍ବରୁ ଛାତ୍ରଛାତ୍ରୀଙ୍କ ମଧ୍ୟରେ ଆତ୍ମବିଶ୍ବାସ ବଢ଼ାଇବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସେମାନଙ୍କ ସହିତ ଚର୍ଚ୍ଚା କରିଥାନ୍ତି ଓ ଛାତ୍ରଛାତ୍ରୀମାନଙ୍କ ବିଭିନ୍ନ ପ୍ରଶ୍ନର ଉତ୍ତର ଦେଇଥାନ୍ତି।