୭ଦିନରେ କରୋନାରୁ ଆରୋଗ୍ୟ ଲାଭକଲେ ବ୍ରିଟେନର ଯୁବରାଜ ପ୍ରିନ୍ସ ଚାର୍ଲସ
ନୂଆଦିଲ୍ଲୀ: କିଛି ଦିନ ତଳେ ବ୍ରିଟେନର ଯୁବରାଜ ଚାର୍ଲସ କରୋନା ସଂକ୍ରମିତ ହୋଇଥିବା ନେଇ ଖବର ହସ୍ତଗତ ହୋଇଥିଲା । ତେବେ ତାଙ୍କର ସ୍ୱାସ୍ଥ୍ୟାବସ୍ଥା ସ୍ଥିର ରହିଛି ବୋଲି ଚାର୍ଲସଙ୍କ ମୁଖପାତ୍ର କହିଥିଲେ | ଡ୍ୟୁକ ଅଫ କର୍ନଓ୍ୱାଲ ଭାବରେ ପରିଚିତ ପ୍ରିନ୍ସ ଚାର୍ଲସଙ୍କ ନମୁନା ପରୀକ୍ଷା ପଜିଟିଭ ବାହାରି ଥିଲେ ମଧ୍ୟ ତାଙ୍କ ଶରୀରରେ କରୋନାର ସାମାନ୍ୟ ଲକ୍ଷଣ ରହିଛି ଓ ସେ ନିଜର ସ୍ୱାଭାବିକ କାର୍ଯ୍ୟ କରୁଛନ୍ତି । ସାମାନ୍ୟ ସଂକ୍ରମଣ ପାଇଁ ସେ ସ୍କଟଲାଣ୍ଡରେ ଏକାନ୍ତବାସରେ ରହୁଛନ୍ତି ବୋଲି ତାଙ୍କ ଅଫିସ ପକ୍ଷରୁ କୁହାଯାଇଥିବା ବେଳେ ଏବେ ସେ କରୋନା ଭୂତାଣୁ ମୁକ୍ତ ହୋଇଥିବା ଜଣା ପଡିଛି | ସଂକ୍ରମିତ ହୋଇଥିବା ଖବର ଆସିବାର ୭ଦିନ ପରେ ସେ କରୋନା ଭୂତାଣୁ ମୁକ୍ତ ହୋଇଛନ୍ତି |
Sambad is now on WhatsApp
Join and get latest news updates delivered to you via WhatsApp
ତେଣେ ବକିଙ୍ଗହାମ୍ ରାଜପ୍ରାସାଦର ଜଣେ କର୍ମଚାରୀ କରୋନାଭାଇରସ୍ ଆକ୍ରାନ୍ତ ହୋଇଥିବା ଜଣାପଡ଼ିବା ପରେ ରାଣୀ ଦ୍ୱିତୀୟ ଏଲିଜାବେଥ୍ ସେଠାରୁ ଅନ୍ୟତ୍ର ଚାଲିଯାଇଛନ୍ତି । ପ୍ରତିଷେଧାତ୍ମକ ବ୍ୟବସ୍ଥାସ୍ୱରୂପ ୯୩ ବର୍ଷୀୟା ରାଣୀଙ୍କୁ ଗୁରୁବାର ଦିନ ୱିଣ୍ଡସର କ୍ୟାସେଲକୁ ସ୍ଥାନାନ୍ତର କରାଯାଇଛି । ରାଣୀ ସେଠାରେ ଅନିର୍ଦ୍ଦିଷ୍ଟ କାଳଯାଏଁ ରହିବେ । ତାଙ୍କର ସମସ୍ତ କାର୍ଯ୍ୟକ୍ରମ ମଧ୍ୟ ବାତିଲ କରାଯାଇଛି । ତାଙ୍କର ସ୍ୱାସ୍ଥ୍ୟାବସ୍ଥା ଭଲ ଥିବା କଥା ଜଣାପଡ଼ିଛି । ରାଣୀ ବକିଙ୍ଗହାମ ପ୍ରାସାଦରେ ଥିବାବେଳେ ସମ୍ପୃ୍କ୍ତ ରାଜ କର୍ମଚାରୀଜଣକ କରୋନାଭାଇରସ ସଂକ୍ରମିତ ହୋଇଥିବା କଥା ପରୀକ୍ଷାରୁ ଜଣାପଡ଼ିଥିଲା । କିନ୍ତୁ, ସେ କେତେଦୂର ରାଣୀଙ୍କ ସହ ମିଳାମିଶା କରିଛନ୍ତି, ତାହା ଜଣାପଡ଼ିନାହିଁ । ସେ କର୍ମଚାରୀଙ୍କୁ ଏକାନ୍ତବାସରେ ରଖାଯାଇଛି ।