୪ ରାଜ୍ୟର ଏକାଧିକ ସ୍ଥାନରେ ଚଢ଼ାଉ କରି ନକଲି ନୋଟ୍‌ କାରବାରର ପର୍ଦ୍ଦାଫାସ କଲା ତଦନ୍ତକାରୀ ସଂସ୍ଥା ଏନଆଇଏ

ମୁମ୍ବାଇ: ନକଲି ଭାରତୀୟ ନୋଟ୍‌ (ଏଫ୍‌ଆଇସିଏନ୍‌) ଉତ୍ପାଦନ ଓ ପ୍ରସାରଣରେ ସମ୍ପୃକ୍ତ ଏକ ନେଟୱାର୍କର ପର୍ଦ୍ଦାଫାସ କରି ଜାତୀୟ ତଦନ୍ତକାରୀ ଏଜେନ୍‌ସି (ଏନ୍‌ଆଇଏ) ଶନିବାର ୪ଟି ରାଜ୍ୟରେ ଚଢ଼ାଉ କରିଛି। ୬,୬୦୦ ଟଙ୍କାର ନକଲି ନୋଟ୍‌ (୫୦୦, ୨୦୦ ଓ ୧୦୦ ଟଙ୍କିଆ) ସହିତ ମୁଦ୍ରା ଛାପା କାଗଜ, ପ୍ରିଣ୍ଟର ଏବଂ ଡିଜିଟାଲ ଉପକରଣକୁ ମଧ୍ୟ ଜବତ କରିଛି ଏନ୍‌ଆଇଏ।

ନଭେମ୍ବର ୨୪ ତାରିଖରେ ଭାରତୀୟ ପିଙ୍ଗଳ କୋଡ୍‌ (ଆଇପିସି)ର ସମ୍ପୃକ୍ତ ଧାରା ଅନୁଯାୟୀ ଏକ ମାମଲା ରୁଜୁ ହେବା ପରେ ଏନଆଇଏ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା। ସୀମାରେ ନକଲି ନୋଟ୍‌ ଚାଲାଣ ଏବଂ ଭାରତର ବିଭିନ୍ନ ରାଜ୍ୟରେ ଏହାର ପ୍ରଚଳନକୁ ପ୍ରୋତ୍ସାହିତ କରିବା ପାଇଁ ଏକ ବଡ଼ ଷଡ଼ଯନ୍ତ୍ରର ଅଂଶ ବିଶେଷ ବୋଲି ସନ୍ଦେହ କରାଯାଉଥିବା ବ୍ୟକ୍ତିମାନଙ୍କୁ ଟାର୍ଗେଟ କରି ଏନ୍‌ଆଇଏ ପକ୍ଷରୁ ଏହି ଚଢ଼ାଉ କରା ଯାଇଥିଲା।

ବିଶ୍ୱସ୍ତ ସୂଚନା ଆଧାରରେ ଏନଆଇଏ ଟିମ୍‌ ବିଭିନ୍ନ ରାଜ୍ୟର ପ୍ରମୁଖ ସନ୍ଦିଗ୍ଧଙ୍କ ଘର ଉପରେ ନଜର ରଖିଥିଲା। ଅଭିଯୁକ୍ତମାନେ ହେଲେ ମହାରାଷ୍ଟ୍ରର କୋହ୍ଲାପୁର ଜିଲ୍ଲାର ରାହୁଲ ତାନାଜୀ ପାଟିଲ, ୟବତମାଲ ଜିଲ୍ଲାର ଶିବ ପାଟିଲ, ଉତ୍ତରପ୍ରଦେଶର ଶାହାଜାହାନପୁର ଜିଲ୍ଲାର ବିବେକ ଠାକୁର, କର୍ଣ୍ଣାଟକର ବଲ୍ଲାରୀ ଜିଲ୍ଲାର ମହେନ୍ଦ୍ର ଏବଂ ବିହାରର ରୋହତାସ ଜିଲ୍ଲାର ଶଶି ଭୂଷଣ।

ବିବେକ ଠାକୁରଙ୍କ ଘରୁ ନକଲି ନୋଟ୍‌ ଜବତ କରାଯାଇଛି। ଅନୁସନ୍ଧାନରୁ ଜଣାପଡିଛି ଯେ ସେ ଶିବ ପାଟିଲ ଏବଂ ଅନ୍ୟମାନଙ୍କ ସହ ମିଶି ପଡ଼ୋଶୀ ଦେଶରୁ ନକଲି ନୋଟ୍‌ ଏବଂ ପ୍ରିଣ୍ଟିଂ ଆକ୍ସେସରିଜ୍‌ କିଣି ଭାରତ ଭିତରେ ପ୍ରସାରିତ କରୁଥିଲେ। ମହେନ୍ଦ୍ରଙ୍କ ଘରୁ ଏହି ପ୍ରିଣ୍ଟର ଜବତ କରାଯାଇଛି।

ଅଧିକ ଅନୁସନ୍ଧାନରୁ ଜଣାପଡିଛି ଯେ ରାହୁଲ ତାନାଜୀ ପାଟିଲ ନକଲି ନୋଟ୍‌ ଯୋଗାଣର ପ୍ରତିଶ୍ରୁତି ଦେଇ ପେମେଣ୍ଟ ପାଇବା ପାଇଁ ଜାଲିଆତି କରିଥିବା ସିମ୍‌ କାର୍ଡ ବ୍ୟବହାର କରୁଥିଲେ।