ମାୟାବତୀଙ୍କ ଦଳରେ ବିଦ୍ରୋହ, ବସପା ରାଜ୍ୟସଭା ପ୍ରାର୍ଥୀଙ୍କଠାରୁ ସମର୍ଥନ ପ୍ରତ୍ୟାହାର କଲେ ୬ ବିଧାୟକ
ଲକ୍ଷ୍ନୌ: ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ମାୟାବତୀଙ୍କ ନେତୃତ୍ବାଧୀନ ବିଏସ୍ପି (ବହୁଜନ ସମାଜ ପାର୍ଟି)ରେ ବିଦ୍ରୋହ ଦେଖାଦେଇଛି। ଏକ ଅପ୍ରତ୍ୟାଶିତ ଘଟଣାକ୍ରମରେ ବିଏସ୍ପିର ୬ ଜଣ ବିଧାୟକ ରାଜ୍ୟସଭା ଦ୍ବିବର୍ଷୀୟ ନିର୍ବାଚନ ପାଇଁ ବିଏସ୍ପି ପ୍ରାର୍ଥୀ ରାମ୍ଜୀ ଗୌତମଙ୍କଠାରୁ ସେମାନଙ୍କ ସମର୍ଥନ ପ୍ରତ୍ୟାହାର କରିନେଇଛନ୍ତି। ଉକ୍ତ ୬ ବିଧାୟକ ନିର୍ବାଚନ ଅଧିକାରୀଙ୍କୁ କହିଛନ୍ତି, ବରିଷ୍ଠ ନେତା ରାମ୍ଜୀ ଗୌତମଙ୍କ ପ୍ରାର୍ଥିପତ୍ରରେ ସେମାନଙ୍କ ସ୍ବାକ୍ଷରକୁ ନକଲ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ଆସନ୍ତା ମାସରେ ରାଜ୍ୟସଭା ନିର୍ବାଚନ ଥିବାବେଳେ ବିଏସ୍ପିର ୧୦ ଜଣ ବିଧାୟକଙ୍କ ମଧ୍ୟରୁ ୬ ଜଣ ଦଳ ବିରୋଧରେ ଯାଇଛନ୍ତି। ତେବେ ନିର୍ବାଚନ ଅଧିକାରୀଙ୍କୁ ଏ ସଂକ୍ରାନ୍ତରେ ଜଣାଇବାର ମାତ୍ର କିଛି ସମୟ ପରେ ୬ ବିଧାୟକ ସମାଜବାଦୀ ପାର୍ଟି (ସପା) ଅଫିସ୍ ଯାଇ ସଭାପତି ଅଖିଳେଶ ଯାଦବଙ୍କୁ ସାକ୍ଷାତ କରିଥିଲେ। ସେମାନେ ସପାରେ ଯୋଗ ଦେବେ ବୋଲି ଜଣାପଡ଼ିଛି। ବିଏସ୍ପି ବିଧାୟକ ଉମା ଶଙ୍କର ସିଂହ ଅଭିଯୋଗ କରିଛନ୍ତି ଯେ, ଦଳ ବିରୋଧରେ ବିଦ୍ରୋହ କରିଥିବା ୫ ବିଧାୟକଙ୍କୁ ପ୍ରଚୁର ଅର୍ଥ ଲୋଭ ଦେଖାଯାଇଛି। ଜଣେ ଦଳିତଙ୍କୁ ରାଜ୍ୟସଭା ଯିବାକୁ ନଦେବାପାଇଁ ଏଭଳି କାର୍ଯ୍ୟ କରାଯାଇଛି ବୋଲି ଅଭିଯୋଗ ହୋଇଛି।