ରୋଗୀଙ୍କ ଶୋଇବା ପାଇଁ ଜାଗା ନାହିଁ, ବେଡ଼ରେ ଗହମ ଶୁଖାଉଛନ୍ତି ମେଡିକାଲ କର୍ମଚାରୀ
ସ୍ୱାସ୍ଥ୍ୟସେବାର ବିକଳ ଚିତ୍ର ଦେଖାଇଲେ ଶାସକ ଦଳର ବିଧାୟକ
ପାଟନା: ରୋଗୀଙ୍କୁ ଶୋଇବା ପାଇଁ ଜାଗା ନାହିଁ, ମେଡିକାଲ ବାରଣ୍ଡାରେ ରୋଗୀ ଶୋଇବାକୁ ବାଧ୍ୟ ହେଉଥିବାବେଳେ ଏବେ ବିହାରର ଏକ ଡାକ୍ତରଖାନାର ବିକଳ ଚିତ୍ର ସାମ୍ନାକୁ ଆସିଛି | କାରଣ ରୋଗୀଙ୍କ ପାଇଁ ଉଦ୍ଦିଷ୍ଟ ମେଡିକାଲ ବେଡ଼ରେ ଗହମ ଶୁଖାଉଛନ୍ତି ମେଡିକାଲ କର୍ମଚାରୀ | ତେବେ ଏହି କଥା ଆମେ କହୁନାହୁଁ ବରଂ ଶାସକ ଦଳର ଜଣେ ବିଧାୟକ, ସ୍ୱାସ୍ଥ୍ୟସେବାର ପୋଲ ଖୋଲିଛନ୍ତି | ବିହାରର ପଶ୍ଚିମ ଚମ୍ପାରଣ ଜିଲ୍ଲାର ବାଲ୍ମୀକି ନଗରର ଜେଡିୟୁ ବିଧାୟକ, ଧିରେନ୍ଦ୍ର ପ୍ରତାପ ସିଂ ତାଙ୍କ ନିର୍ବାଚନମଣ୍ଡଳୀରେ ଥିବା ଏକ କମ୍ୟୁନିଟି ହେଲ୍ଥ ସେଣ୍ଟରକୁ ଅଚାନକ ପରିଦର୍ଶନରେ ଯାଇଥିଲେ | ଆଉ ଅଚାନକ ପରିଦର୍ଶନ ସମୟରେ ପରିଚାଳନାଗତ ତ୍ରୁଟି ସାମ୍ନାକୁ ଆସିଥିଲା | ବିଧାୟକ ଜଣକ ଦେଖିଥିଲେ ଯେ ରୋଗୀମାନେ ମେଡିକାଲ ବାରଣ୍ଡାରେ ଶୋଇଥିବାବେଳେ ରୋଗୀଙ୍କ ପାଇଁ ଉଦ୍ଦିଷ୍ଟ ମେଡିକାଲ ବେଡ଼ରେ କର୍ମଚାରୀ ଗହମ ଶୁଖାଇଥିଲେ ।
Sambad is now on WhatsApp
Join and get latest news updates delivered to you via WhatsApp
କେବଳ ଏତିକି ନୁହେଁ ବିଧାୟକ ଜାଣିବାକୁ ପାଇଥିଲେ ଯେ ମେଡିକାଲରେ ଥିବା ଅପରେସନ୍ ଥିଏଟରକୁ ଷ୍ଟୋର ରୁମ୍ ଭାବରେ ବ୍ୟବହାର କରାଯାଉଛି ଏବଂ ଭଲ ଔଷଧକୁ ଡଷ୍ଟବିନରେ ଫୋପାଡି ଦିଆଯାଉଛି। ସେହିପରି ପୁରୁଷ ଓ ମହିଳା ୱାର୍ଡ ଅପରିଷ୍କାର ଅପରିଛନ୍ନ ହୋଇଥିବାବେଳେ ସଫା ହୋଇନଥିଲା | ଏନେଇ ବିଧାୟକ କହିଛନ୍ତି ଯେ ଯେତେବେଳେ ଡାକ୍ତରଖାନାର ରେଜିଷ୍ଟର ଯାଞ୍ଚ କରିଥିଲୁ, ସେତେବେଳେ ଅନେକ ଡାକ୍ତର ଏବଂ ନର୍ସ ଅନୁପସ୍ଥିତ ଥିବା ଦେଖିବାକୁ ମିଳିଥିଲା | ଏନେଇ ଉଚ୍ଚପଦସ୍ଥ ଅଧିକାରୀଙ୍କୁ ଜଣାଇବେ ବୋଲି ବିଧାୟକ କହିଛନ୍ତି |