କରୋନା ସନ୍ଦିଗ୍ଧ ନିଜାମୁଦ୍ଦିନ ଫେରନ୍ତାଙ୍କୁ ଆଶ୍ରୟ ଦେଇଥିବାରୁ ପ୍ରଫେସର ଗିରଫ
ଆହ୍ଲାବାଦ: କରୋନା ସଂକ୍ରମଣ ପାଇଁ ନିଜାମୁଦ୍ଦିନର ତଵଲିଗି ଜମାତ ଲିଙ୍କ ବାବଦରେ ସୂଚନା ପାଇବା ପରେ ଉତ୍ତରପ୍ରଦେଶ ପୁଲିସ ଦୃଢ କାର୍ଯ୍ୟାନୁଷ୍ଠାନ ନେବା ଆରମ୍ଭ କରିଛି | ରାଜ୍ୟର ପ୍ରତ୍ୟେକ ଜିଲ୍ଲାରେ ସନ୍ଦିଗ୍ଧ ନିଜାମୁଦ୍ଦିନ ଫେରନ୍ତାଙ୍କୁ ଖୋଜା ଚାଲିଥିବାବେଳେ ଏବଂ ସେମାନଙ୍କୁ ସଙ୍ଗରୋଧରେ ରଖାଯାଉଛି | ଏହା ସହିତ ସନ୍ଦିଗ୍ଧ ନିଜାମୁଦ୍ଦିନ ଫେରନ୍ତାଙ୍କୁ ଲୁଚାଇରଖୁଥିବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଏହି କ୍ରମରେ ଆହ୍ଲାବାଦ ବିଶ୍ୱବିଦ୍ୟାଳୟର ପ୍ରଫେସର ସାହିଦ ଏବଂ ୧୬ ଜଣ ବିଦେଶୀ ଜମାତଙ୍କ ସମେତ ମୋଟ ୩୦ ଜଣଙ୍କୁ ଗିରଫ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ବିଦେଶୀ ଅଧିନିୟମ ଅନୁଯାୟୀ ପଞ୍ଜୀକୃତ ହୋଇଥିବା ମାମଲାରେ ବିଦେଶୀଙ୍କୁ ଗିରଫ କରାଯାଇଥିବାବେଳେ ପ୍ରଫେସର ସାହିଦଙ୍କୁ ଜମାତୀୟମାନଙ୍କୁ ଗୁପ୍ତରେ ଆଶ୍ରୟ ଦେବା ଅଭିଯୋଗରେ ଗିରଫ କରାଯାଇଛି। ତଵଲିଗି ଜମାତରୁ ଫେରି ଆସିଥିବା ଜମାତୀୟମାନଙ୍କୁ ଆଗକୁ ଆସିବା ଏବଂ ଆବେଦନ କରାଯିବାକୁ ନିବେଦନ କରାଯାଇଥିଲା। ଏହା ସତ୍ତ୍ୱେ ପ୍ରୟାଗରାଜରେ ଅନେକ ଜମାତୀୟ ଲୁଚି ରହିଥିଲେ |
ଏହି ପରିପ୍ରେକ୍ଷୀରେ ପୁଲିସ ଛାନଭିନ କରି ମଙ୍ଗଳବାର ଦିନ ଶାହାଗଞ୍ଜ ପୁଲିସ ସାତ ଜଣ ବିଦେଶୀଙ୍କ ସମେତ ୧୭ ଜଣଙ୍କୁ ଗିରଫ କରିଛି। ଏହା ବ୍ୟତୀତ ୯ ଜଣ ବିଦେଶୀଙ୍କ ସମେତ ୧୨ ଜଣଙ୍କୁ କରେଁଲି ପୁଲିସ ଗିରଫ କରିଛି। ଏଥି ସହ ଶିବକୁଟି ପୁଲିସ ପ୍ରଫେସର ସାହିଦଙ୍କୁ ଗିରଫ କରିଛି। ଉତ୍ତରପ୍ରଦେଶରେ ଏପର୍ଯ୍ୟନ୍ତ ୧୧୮୪ ଟି କରୋନା ପଜିଟିଭ ମାମଲା ସାମ୍ନାକୁ ଆସିଛି । ଏଥିମଧ୍ୟରୁ ୧୮ ଜଣଙ୍କର ମୃତ୍ୟୁ ହୋଇଥିବାବେଳେ ୧୪୦ ଜଣ ଆରୋଗ୍ୟ ଲାଭ କରିଛନ୍ତି।