ଗୀତା, ପ୍ରଧାନମନ୍ତ୍ରୀ ମୋଦୀଙ୍କ ଫଟୋ, ଆମାଜନିଆ-୧ ଏବଂ ଅନ୍ୟ ୧୮ଟି କୃତ୍ରିମ ଉପଗ୍ରହ ମହାକାଶକୁ ପଠାଇଲା ‘ଇସ୍ରୋ’ର ‘ପିଏସ୍ଏଲ୍ଭି-ସି୫୧’
ନୂଆଦିଲ୍ଲୀ: ‘ଇସ୍ରୋ’ ଆଜି ନିର୍ଦ୍ଧାରିତ ସମୟରେ ଇ-ଗୀତା, ପ୍ରଧାନମନ୍ତ୍ରୀ ମୋଦୀଙ୍କ ଫଟୋ, ଆମାଜନିଆ-୧ ଏବଂ ଅନ୍ୟ ୧୮ଟି କୃତ୍ରିମ ଉପଗ୍ରହ ସଫଳତାର ସହ ମହାକାଶକୁ ପ୍ରେରଣ କରିଛି।
Sambad is now on WhatsApp
Join and get latest news updates delivered to you via WhatsApp
ଆଜି ପୂର୍ବାହ୍ଣ ୧.୩୦ର ଅଳ୍ପକ୍ଷଣ ପୂର୍ବରୁ ୧୯ଟି କୃତ୍ରିମ ଉପଗ୍ରହ ସହ ଶ୍ରୀହରିକୋଟାସ୍ଥିତ ‘ସତୀଶ ଧାଓ୍ଵନ୍ ମହାକାଶ କେନ୍ଦ୍ର’ର ଲଞ୍ଚ୍ପ୍ୟାଡ୍ରୁ ‘ଭାରତୀୟ ମହାକାଶ ଗବେଷଣା ସଂସ୍ଥାନ’ର ‘ପିଏସ୍ଏଲ୍ଭି-ସି୫୧’ ମହାକାଶକୁ ଉତ୍କ୍ଷେପିତ ହୋଇଥିଲା।
ବ୍ରାଜିଲ୍ର ୬୩୭ କିଲୋ ଓଜନବିଶିଷ୍ଟ କୃତ୍ରିମ ଉପଗ୍ରହ ‘ଆମାଜନିଆ-୧’ ସହ ନିର୍ଦ୍ଧାରିତ ସମୟ ଠିକ୍ ୧୦.୨୪ରେ ମହାକାଶକୁ ଉଠିଥିଲା। ଏଥିସହ ଯାଇଥିବା ବାକି ୧୮ଟି କୃତ୍ରିମ ଉପଗ୍ରହ ମଧ୍ୟରେ ରହିଛି ୪ଟି ‘ଇନ୍-ସ୍ପେସ୍’ ଏବଂ ‘ଇସ୍ରୋ’ର ୧୪ଟି ବାଣିଜ୍ୟିକ ଶାଖା ‘ନିୟୁସ୍ପେସ୍ ଇଣ୍ଡିଆ’ର କୃତ୍ରିମ ଉପଗ୍ରହ।
ଏହାଛଡ଼ା ଆତ୍ମନିର୍ଭର ଉପକ୍ରମର ଏବଂ ମହାକାଶ ଘରୋଇକରଣ ସଙ୍କେତସ୍ୱରୂପ ପ୍ରଧାନମନ୍ତ୍ରୀ ମୋଦୀଙ୍କର ଏକ ଖୋଦିତ ଚିତ୍ର ଏବଂ ଏସ୍ଡି କାର୍ଡରେ ସେଭ୍ ହୋଇଥିବା ଏକ ‘ଇ-ଭଗବତ ଗୀତା’।
ସୂଚନାଯୋଗ୍ୟ, ଆଜିର ଏହି ଉତ୍କ୍ଷେପଣରେ ‘ଆମାଜନିଆ-୧’ ଛଡ଼ା ଆହୁରି ୨୦ଟି କୃତ୍ରିମ ଉପଗ୍ରହ ଯାଇଥାଆନ୍ତା। କିନ୍ତୁ, ବୈଷୟିକ ତ୍ରୁଟିବିଚ୍ୟୁତି ଯୋଗୁଁ ଗତ ସପ୍ତାହରେ ୨ଟି କୃତ୍ରିମ ଉପଗ୍ରହକୁ ଏଥିରୁ ବାଦ ଦିଆଯାଇଥିଲା।