ପୁଡ଼ୁଚେରୀ ଉପ-ରାଜ୍ୟପାଳ କିରଣ ବେଦୀଙ୍କୁ ହଟାଇବାକୁ ରାଷ୍ଟ୍ରପତିଙ୍କୁ ଅନୁରୋଧ କଲେ ମୁଖ୍ୟମନ୍ତ୍ରୀ ନାରାୟଣସ୍ୱାମୀ
ପୁଡ଼ୁଚେରୀ : ପୁଡ଼ୁଚେରୀ ଉପ-ରାଜ୍ୟପାଳ କିରଣ ବେଦୀ ଓ ମୁଖ୍ୟମନ୍ତ୍ରୀ ଭି.ନାରାୟଣ ସ୍ୱାମୀଙ୍କ ମଧ୍ୟରେ ମତଭେଦ ବଢିବାରେ ଲାଗିଛି । ସ୍ଥିତି ଏତେ ବିଗିଡ଼ିଯାଇଛି ଯେ କିରଣଙ୍କୁ ହଟାଇବାକୁ ରାଷ୍ଟ୍ରପତି ରାମନାଥ କୋବିନ୍ଦଙ୍କ ହସ୍ତକ୍ଷେପ ଲୋଡ଼ିଛନ୍ତି ମୁଖ୍ୟମନ୍ତ୍ରୀ ।
Sambad is now on WhatsApp
Join and get latest news updates delivered to you via WhatsApp
ଗତ ୨୩ ତାରିଖରେ ରାଷ୍ଟ୍ରପତି ପୁଡ଼ୁଚେରୀ ଗସ୍ତରେ ଆସିବାବେଳେ ମୁଖ୍ୟମନ୍ତ୍ରୀ ନାରାୟଣ ସ୍ୱାମୀ ତାଙ୍କୁ ଏକ ସ୍ମାରକପତ୍ର ଦେଇ ଉପ-ରାଜ୍ୟପାଳଙ୍କ ବିରୋଧରେ ଅଭିଯୋଗ କରିଛନ୍ତି । ସେ କହିଛନ୍ତି ଯେ ଉପ-ରାଜ୍ୟପାଳ ରାଜ୍ୟର ବିଭିନ୍ନ କ୍ୟାବିନେଟ ନିଷ୍ପତ୍ତିରେ ହସ୍ତକ୍ଷେପ କରିବା ସହ ଓ ଜନକଲ୍ୟାଣମୂଳକ କାର୍ଯ୍ୟକ୍ରମକୁ କାର୍ଯ୍ୟକାରୀ କରାଇଦେଉନାହାନ୍ତି । ଉପ-ରାଜ୍ୟପାଳ ନିଜେ ଏକ ସମାନ୍ତରାଳ ସରକାର ଚଳାଉଛନ୍ତି ଓ ମନଇଚ୍ଛା ନିଷ୍ପତ୍ତି ନେଉଛନ୍ତି । କିରଣ ବେଦୀଙ୍କ ଏପରି ସ୍ୱେଚ୍ଛାଚାରୀ କାର୍ଯ୍ୟକଳାପ ରାଜ୍ୟର ପ୍ରଗତିରେ ପ୍ରତିବନ୍ଧକ ହେଉଛି । ଏଣୁ ରାଷ୍ଟ୍ରପତିଙ୍କ ହସ୍ତକ୍ଷେପ ଲୋଡ଼ାଯାଇଛି ବୋଲି ସେ ସାମ୍ବାଦିକମାନଙ୍କୁ କହିଛନ୍ତି । ସେ ମଧ୍ୟ ପୁଡୁଚେରୀକୁ ସଂପୂର୍ଣ୍ଣ ରାଜ୍ୟର ମାନ୍ୟତା ଦେବାକୁ ରାଷ୍ଟ୍ରପତିଙ୍କ ନିକଟରେ ଦାବି କରିଛନ୍ତି । ୧୯୮୭ରୁ ଏପର୍ଯ୍ୟନ୍ତ ଅନେକ ଥର ଏ ନେଇ ପୁଡ଼ୁଚେରୀ ବିଧାନସଭାରେ ପ୍ରସ୍ତାବ ଗୃହୀତ ହୋଇଥିବା ସେ ରାଷ୍ଟ୍ରପତିଙ୍କୁ ଅବଗତ କରାଇଛନ୍ତି । ସେ ମଧ୍ୟ କେନ୍ଦ୍ର ସରକାରଙ୍କ ଏନଆରସିକୁ ସମାଲୋଚନା କରିଛନ୍ତି ।
ପୁଡ଼ୁଚେରୀ ଉପ-ରାଜ୍ୟପାଳ କିରଣ ବେଦୀ ଓ ମୁଖ୍ୟମନ୍ତ୍ରୀ ଭି.ନାରାୟଣ ସ୍ୱାମୀଙ୍କ ମଧ୍ୟରେ ମତଭେଦ ନୂଆ ନୁହେଁ । ପୂର୍ବରୁ ମଧ୍ୟ ଏକାଧିକ ଥର ସେ କିରଣଙ୍କୁ ହଟାଇବାକୁ ରାଷ୍ଟ୍ରପତିଙ୍କ ନିକଟରେ ଦାବି କରିସାରିଛନ୍ତି ।