ଜମ୍ମୁରେ ଗିରଫ ହୋଇଥିବା ୩ ଜଣଙ୍କ ଭିତରୁ ଜଣେ ପୁଲୱାମା ଆତ୍ମଘାତୀ ବିସ୍ଫୋରଣରେ ସଂଶ୍ଲିଷ୍ଟ ଆତଙ୍କବାଦୀର ଭାଇ !
ଶ୍ରୀନଗର: ଶୁକ୍ରବାର ପୂର୍ବାହ୍ନରେ ଜମ୍ମୁ ଉପକଣ୍ଠସ୍ଥିତ ନଗ୍ରୋତା ଅଞ୍ଚଳର ଏକ ଟୋଲ୍ ପ୍ଲାଜା ପାଖରେ ଆତଙ୍କବାଦୀ ଓ ପୁଲିସ୍ ମଧ୍ୟରେ ଗୁଳି ବିନିମୟ ହୋଇ ୩ ଆତଙ୍କବାଦୀ ନିପାତ ହୋଇଥିବା ସହ ୩ ଜଣଙ୍କୁ ଗିରଫ କରାଯାଇଛି। ସେମାନଙ୍କ ମଧ୍ୟରୁ ୨ ଜଣ ହେଲ୍ପର ହୋଇଥିବା ବେଳେ ଆଉ ଜଣେ ଥିଲା ଟ୍ରକ୍ ଡ୍ରାଇଭର୍। ପୁଲିସ୍ ସୂଚନା ଦେଇ କହିଛି ଯେ ଟ୍ରକ୍ ଚାଳକ ଜଣକ ପୁଲୱାମା ଆତ୍ମଘାତୀ ବିସ୍ଫୋରଣରେ ସଂଶ୍ଲିଷ୍ଟ ଥିବା ଆତଙ୍କବାଦୀର ସଂପର୍କୀୟ ଭାଇ ବୋଲି ସନ୍ଦେହ କରାଯାଉଛି। ଏମାନେ ସମସ୍ତେ ଜୈଶ୍-ଇ-ମହମ୍ମଦର ଆତଙ୍କବାଦୀ। ପୁଲିସ୍ ସଂଦିଗ୍ଧ ଆତଙ୍କବାଦୀମାନଙ୍କୁ ଧରିବା ସହ ସେମାନଙ୍କ ନିକଟରୁ ବହୁ ଅସ୍ତ୍ରଶସ୍ତ୍ର ବି ଜବତ କରିଛି।
Sambad is now on WhatsApp
Join and get latest news updates delivered to you via WhatsApp
ଉଲ୍ଲେଖଯୋଗ୍ୟ, ଆଜି ପୂର୍ବାହ୍ନରେ ଏକ ଟ୍ରକ୍ ଯୋଗେ ଶ୍ରୀନଗର ଆଡ଼େ ଯାଉଥିବା ଆତଙ୍କବାଦୀମାନଙ୍କ ଉପରକୁ ପୁଲିସ୍ ଗୁଳି ଚାଳନା କରିଥିଲା। ଜମ୍ମୁ-ଶ୍ରୀନଗର ଟୋଲ୍ ପ୍ଲାଜା ନିକଟରେ ଗାଡ଼ି ଅଟକାଇ ସିକ୍ୟୁରିଟି ଚେକ୍ ବେଳେ ଭୋର୍ ପ୍ରାୟ ୫ଟାରେ ହୋଇଥିବା ଏହି ଗୁଳି ବିନିିମୟରେ ଜଣେ ପୁଲିସ୍ ଆହତ ହୋଇଥିବା ସୂଚନା ରହିଛି।
ପୁଲିସ୍ ଗୁଳି ଚାଳନାରେ ୩ ଆତଙ୍କବାଦୀଙ୍କର ମୃତ୍ୟୁ ଘଟିଛି ଏବଂ ବାକି ଆତଙ୍କବାଦୀ ଆଖପାଖରେ ଥିବା ଜଙ୍ଗଲିଆ ଅଞ୍ଚଳକୁ ଖସି ପଳାଇ ଯାଇଥିବା କଥା ଜମ୍ମୁ ଓ କଶ୍ମୀରର ପୁଲିସ ମହାନିର୍ଦେଶକ ଦିଲ୍ବାଗ୍ ସିଂହ କହିଥିଲେ। ଆତଙ୍କବାଦୀମାନେ ଟ୍ରକ୍ ଯୋଗେ ଶ୍ରୀନଗର ଆଡ଼େ ଯାଉଥିବା ବେଳେ ଟୋଲ୍ ଗେଟ୍ ନିକଟରେ ପୁଲିସ୍ ଗାଡ଼ି ଅଟକାଇଥିଲା ଓ ସେଠାରେ ପୁଲିସ୍ ଓ ଆତଙ୍କବାଦୀ ଭିତରେ ଗୁଳି ବିନିମୟ ହୋଇଥିଲା।