ପଞ୍ଜାବ : ବିଜେପି ନେତାଙ୍କୁ ବନ୍ଧକ ରଖିଲେ ଆନ୍ଦୋଳନକାରୀ କୃଷକ, ୧୨ ଘଣ୍ଟା ପରେ ଉଦ୍ଧାର କଲା ପୁଲିସ୍
ଚଣ୍ଡିଗଡ଼ : ପଂଜାବର ରାଜାପୁରା ଗ୍ରାମରେ ଆନ୍ଦୋଳନକାରୀ କୃଷକ ସଂଗଠନର ସଦସ୍ୟମାନେ କିଛି ବିଜେପି ନେତାଙ୍କୁ ପ୍ରାୟ ୧୨ ଘଣ୍ଟା ବନ୍ଧକ ରଖିବା ପରେ ମୁକ୍ତ କରିଦେଇଛନ୍ତି । ହାଇକୋର୍ଟଙ୍କ ହସ୍ତକ୍ଷେପ ପରେ ପୁଲିସ ବିଜେପି ନେତାମାନଙ୍କୁ ମୁକ୍ତ କରିଥିବା କୁହାଯାଉଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ରବିବାର ପଂଜାବ ବିଜେପିର ମହାସଚିବ ଭୂପେଶ ଅଗ୍ରଓ୍ବାଲଙ୍କ ସମେତ ଆଉ କିଛି ନେତା କର୍ମୀ ଏକ ଦଳୀୟ ବୈଠକ ପାଇଁ ରାଜାପୁରାରେ ଏକତ୍ରିତ ହୋଇଥିଲେ । ଏହା ବୈଠକ ସମ୍ପର୍କରେ ଖବର ପାଇଁ ଆନ୍ଦୋଳନକାରୀ କୃଷକମାନେ ସେଠାରେ ପହଞ୍ଚି ଉକ୍ତ ବୈଠକ ସ୍ଥଳରେ ଭଙ୍ଗାରୁଜା କରିଥିଲେ । ପରେ ସେମାନେ ଆଉ ଏକ ଘରେ ବୈଠକ କରୁଥିବାବେଳେ ଆନ୍ଦୋନକାରୀମାନେ ସେଠାରେ ପହଞ୍ଚି ଅଗ୍ରଓ୍ବାଲ ଓ ଅନ୍ୟମାନଙ୍କୁ ବନ୍ଧକ ରଖିଥିଲେ । ସେମାନେ ପ୍ରାୟ ୧୨ ଘଣ୍ଟା ବନ୍ଧକ ରହିବା ପରେ ହାଇକୋର୍ଟଙ୍କ ହସ୍ତକ୍ଷେପ ପରେ ମୁକ୍ତ ହୋଇଥିଲେ ।
ଆନ୍ଦୋଳନକାରୀମାନେ ବିଜେପି ନେତାମାନଙ୍କୁ ମାଡ଼ ମାରିଥିବା ଅଗ୍ରଓ୍ବାଲ ଅଭିଯୋଗ କରିଛନ୍ତି । ତେବେ ସେମାନଙ୍କ ଉପରେ ଆକ୍ରମଣ ହୋଇନଥିବା ସ୍ଥାନୀୟ ପୁଲିସ କହିଛି । ଅନ୍ୟପକ୍ଷରେ କୃଷକ ନେତା ପ୍ରେମ ସିଂ ଭାଙ୍ଗୁ କହିଛନ୍ତି ଯେ ଅଗ୍ରଓ୍ବାଲ ସେମାନଙ୍କୁ ଉତ୍ତେଜିତ କରିଥିଲେ ।