ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋରଙ୍କୁ ମୁଖ୍ୟ ପରାମର୍ଶଦାତା ଭାବେ ନିଯୁକ୍ତ କଲେ ପଞ୍ଜାବ ମୁଖ୍ୟମନ୍ତ୍ରୀ କ୍ୟାପଟେନ ଅମ୍ରିନ୍ଦର ସିଂ
ଚଣ୍ଡିଗଡ଼: ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋରଙ୍କୁ ମୁଖ୍ୟ ପରାମର୍ଶଦାତା ଭାବରେ ନିଯୁକ୍ତ କଲେ ପଞ୍ଜାବର ମୁଖ୍ୟମନ୍ତ୍ରୀ କ୍ୟାପଟେନ ଅମ୍ରିନ୍ଦର ସିଂ। ବର୍ତ୍ତମାନ ଆଗାମୀ ନିର୍ବାଚନ ପାଇଁ ସେ ପଞ୍ଜାବରେ ମୁଖ୍ୟମନ୍ତ୍ରୀ କ୍ୟାପଟେନ ଅମ୍ରିନ୍ଦର ସିଂଙ୍କ ପାଇଁ କାମ କରିବେ।
ମୁଖ୍ୟମନ୍ତ୍ରୀ ଅମ୍ରିନ୍ଦର ସିଂ ଏହି ସୂଚନାକୁ ନିଜ ଟ୍ୱିଟର ଆକାଉଣ୍ଟରେ ସାର୍ବଜନୀନ କରି ଲେଖିଛନ୍ତି ଯେ, ପ୍ରଶାନ୍ତ କିଶୋର ମୋର ମୁଖ୍ୟ ପରାମର୍ଶଦାତା ଭାବରେ ଯୋଗ ଦେଇଛନ୍ତି। ଏହି ଖବର ସେୟାର କରି ମୁଁ ଖୁସି। ପଞ୍ଜାବର ଲୋକଙ୍କ ଉନ୍ନତି ପାଇଁ ମିଳିତ ଭାବେ କାମ କରିବାକୁ ସେ ଆଗ୍ରହୀ।
Happy to share that @PrashantKishor has joined me as my Principal Advisor. Look forward to working together for the betterment of the people of Punjab!
— Capt.Amarinder Singh (@capt_amarinder) March 1, 2021
ସୂଚନା ମୁତାବକ, ଆସନ୍ତା ବର୍ଷ ପଞ୍ଜାବରେ ବିଧାନସଭା ନିର୍ବାଚନ ହେବ। ତେଣୁ କ୍ୟାପଟେନ ଅମ୍ରିନ୍ଦର ସିଂ ନିର୍ବାଚନ ରଣନୀତି ଉପରେ ଏବେଠୁ କାମ କରିବା ଆରମ୍ଭ କରି ଦେଇଛନ୍ତି। ଏ ନେଇ ନିର୍ବାଚନରେ ତାଙ୍କୁ ସାହାଯ୍ୟ କରିବା ପାଇଁ ସେ ପ୍ରଶାନ୍ତ କିଶୋରଙ୍କୁ ମୁଖ୍ୟ ପରାମର୍ଶଦାତା ଭାବେ ବାଛିଛନ୍ତି। ଏହା ପୂର୍ବରୁ ୨୦୧୭ ପଞ୍ଜାବ ନିର୍ବାଚନରେ କଂଗ୍ରେସ ପାଇଁ ନିର୍ବାଚନ ରଣନୀତି ପ୍ରସ୍ତୁତ କରିବା କାମ କରିଥିଲେ ପ୍ରଶାନ୍ତ କିଶୋର। ତାଙ୍କ ରଣନୀତି ପାଇଁ ଗତ ବିଧାନସଭା ନିର୍ବାଚନରେ କଂଗ୍ରେସ ୧୧୭ଟି ଆସନ ମଧ୍ୟରୁ ୭୭ଟି ଆସନ ଜିତିପାରିଥିଲା।
ପ୍ରଶାନ୍ତ କିଶୋରଙ୍କ ଟିମ୍ ‘ଆଇ-ପ୍ୟାକ୍’ ବର୍ତ୍ତମାନ ପଶ୍ଚିମବଙ୍ଗରେ ମମତା ବାନାର୍ଜୀଙ୍କ ପାର୍ଟି ତୃଣମୂଳ କଂଗ୍ରେସ (ଟିଏମସି) ଏବଂ ତାମିଲନାଡୁର ଡିଏମକେ ପାଇଁ ନିର୍ବାଚନ ପ୍ରଚାର ଯୋଜନା ପରିଚାଳନା କରୁଛି। ଏହା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ, ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡୀଙ୍କୁ ନିର୍ବାଚନ ଜିତିବା କ୍ଷେତ୍ରରେ ପ୍ରଶାନ୍ତ କିଶୋର ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।
