କରୋନାଭାଇରସ୍ ବିରୋଧରେ ଲଢ଼େଇ ପାଇଁ ପଞ୍ଜାବରେ ଆରମ୍ଭ ହେଲା ‘ଲକଡାଉନ୍’
ଚଣ୍ଡିଗଡ଼: କରୋନାଭାଇସର୍ ସଂକ୍ରମଣ ନିୟନ୍ତ୍ରଣ କରିବାକୁ ରବିବାର ଦିନ ପଞ୍ଜାବର ମୁଖ୍ୟମନ୍ତ୍ରୀ କ୍ୟାପ୍ଟେନ୍ ଅମ୍ରିନ୍ଦର ସିଂହ ସମଗ୍ର ରାଜ୍ୟରେ ସମ୍ପୂର୍ଣ୍ଣ “ଲକଡାଉନ୍’ ପାଇଁ ନିର୍ଦେଶ ଦେଇଛନ୍ତି । କେବଳ ଅତ୍ୟାବଶ୍ୟକ ସେବାକୁ “ଲକଡାଉନ୍’ରୁ ବାଦ ଦିଆଯିବ । ଖୁବ୍ ଶୀଘ୍ର ଏଥିପାଇଁ ବିଧିବଦ୍ଧ ଆଦେଶନାମା ଜାରି ହେବ ବୋଲି ସରକାରୀ ଅଧିକାରୀମାନେ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
‘କରୋନାଭାଇରସ୍’ର ମୁକାବିଲା ନିମନ୍ତେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆହ୍ୱାନ ଦେଇଥିବା ‘ଜନତା କର୍ଫ୍ୟୁ’ ଯୋଗୁଁ ରବିବାର ଦିନ ପଞ୍ଜାବ, ହରିୟାଣା ଏବଂ ରାଜଧାନୀ ଚଣ୍ଡିଗଡ଼ରେ ରାସ୍ତା ଓ ସର୍ବସାଧାରଣ ସ୍ଥାନ ଜନଶୂନ୍ୟ ହୋଇଯାଇଛି ।
ରବିବାର ସକାଳେ ଚଣ୍ଡିଗଡ଼ ଭୂତ ନଗରୀ ଭଳି ଦେଖାଯାଇଛି । ରାସ୍ତାଘାଟରେ ଗାଡ଼ିମଟର ଚଳାଚଳ କରୁ ନାହିଁ । ସହରର ଟ୍ରାନସପୋର୍ଟ ଲାଇଟ୍ ପଏଣ୍ଟ୍, ଟ୍ରିବ୍ୟୁନ୍ ଚୌକ୍ ଏବଂ ସେକ୍ଟର୍ ୪୩ରେ ଥିବା ଇଣ୍ଟର୍ ଷ୍ଟେଟ୍ ବସ୍ ଟର୍ମିନାଲ୍ ଭଳି ଜନଗହଳିପୂର୍ଣ୍ଣ ସ୍ଥାନଗୁଡ଼ିକ ଫାଙ୍କା ରହିଛି । ଲୋକପ୍ରିୟ ସ୍ଥାନ ସୁଖନା ହ୍ରଦ ଏବଂ ସେକ୍ଟର୍ ୧୭ ପ୍ଲାଜା ମଧ୍ୟ ପୂରା ନିକାଞ୍ଚନ ରହିଛି ।
ପଞ୍ଜାବରେ ୧୧ଜଣ କରୋନାଭାଇରସରେ ଆକ୍ରାନ୍ତ ହୋଇଥିବା କଥା ଶନିବାର ଦିନ ଜଣାପଡ଼ିବା ପରେ ରାଜ୍ୟ ସରକାର “ଲକଡାଉନ୍’ କରିବାକୁ ନିଷ୍ପତ୍ତି ଗ୍ରହଣ କରିଛନ୍ତି । ପୂର୍ବରୁ ପଞ୍ଜାବରେ କରୋନାଭାଇରସ୍ ଦ୍ୱାରା ଆକ୍ରାନ୍ତ ଜଣେ ବ୍ୟକ୍ତିଙ୍କର ମୃତ୍ୟୁ ଘଟିଥିଲା ।