ଚାଷୀମାନେ ଦେଢ ବର୍ଷ ଦିଲ୍ଲୀ ସୀମାରେ ବସିଥିଲେ, ମୋଦୀ ୧୫ ମିିନିଟ୍ ଅଟକିଲେ ବୋଲି ଅସୁବିଧା ହୋଇଗଲା : ସିଦ୍ଧୁ

ଚଣ୍ଡିଗଡ଼: ବୁଧବାର ପଞ୍ଜାବରେ ପ୍ରଧାନମନ୍ତ୍ରୀ ମୋଦୀଙ୍କ କାରକେଡ୍ ୧୫ରୁ ୨୦ ମିନିଟ୍ ଧରି ଓଭରବ୍ରିଜ୍ ଉପରେ ଅଟକି ରହିବା ପରେ ଏବେ ଏହାକୁ ନେଇ ମୁହଁ ଖୋଲିଛନ୍ତି ପଞ୍ଜାବ କଂଗ୍ରେସ ସଭାପତି ନବଜୋତ୍ ସିଂହ ସିଦ୍ଧୁ । ଗୁରୁବାର ସିଦ୍ଧୁ ବରନାଲରେ ଏକ ଜନସଭାକୁ ସମ୍ବୋଧିତ କରି କହିଛନ୍ତି ଯେ, ଚାଷୀମାନେ ଦିଲ୍ଲୀ ସୀମାରେ ଏକବର୍ଷରୁ ଅଧିକ ସମୟ ଧରି ବସିରହିଲେ। ହେଲେ ଯେବେ ପ୍ରଧାନମନ୍ତ୍ରୀ କେବଳ ୧୫ ମିନିଟ୍ ପାଇଁ ଅଟକି ଯିବାରୁ, ସେଥିରେ ଏତେ ଅସୁବିଧା ହୋଇଗଲା । ଏମିତି ଦୋମୁହାଁ ନୀତି କ’ଣ ପାଇଁ ବୋଲି ସେ ପ୍ରଶ୍ନ କରିଛନ୍ତି । ଖାଲି ସେତିକି ନୁହେଁ ବିଜେପି ଓ ପ୍ରଧାନମନ୍ତ୍ରୀଙ୍କୁ ଟାର୍ଗେଟ କରି ସିଦ୍ଧୁ କହିଛନ୍ତି ଯେ, ମୋଦୀଜୀ ଚାଷୀଭାଇମାନଙ୍କୁ ଦୁଇଗୁଣା ଆୟର ପ୍ରତିଶ୍ରୁତି ଦେଇଥିଲେ, ହେଲେ ସେ ଚାଷୀଙ୍କ ପାଖରେ ଯାହା ବି କିଛି ଥିଲା ତାକୁ ବି ନେଇଗଲେ ।

ସୂଚନାଯୋଗ୍ୟ ଯେ, ଗତକାଲି ପ୍ରଧାନମନ୍ତ୍ରୀ ମୋଦୀଙ୍କ ପଞ୍ଜାବ ଗସ୍ତ ସମୟରେ ସୁରକ୍ଷାକୁ ନେଇ ବଡ ତ୍ରୁଟି ଦେଖିବାକୁ ମିଳିଥିଲା, ଯାହା ଫଳରେ ୧୫ରୁ ୨୦ ମିନିଟ୍ ଧରି ମୋଦୀଙ୍କ କାରକେଡ୍ ଫ୍ଲାଏଓଭର ଉପରେ ଅଟକି ରହିଥିଲା । କିଛି ପ୍ରଦର୍ଶନକାରୀ ରାସ୍ତା ଅବରୋଧ କରିଥିବା କାରଣରୁ ଏପରି ହୋଇଥିବା କୁହାଯାଇଥିଲା । ଏହାକୁ ନେଇ ସାରା ଦେଶରେ ଚର୍ଚ୍ଚା ହେବା ସହିତ ପ୍ରଧାନମନ୍ତ୍ରୀଙ୍କ ସୁରକ୍ଷାରେ ଏହା ବଡ ତ୍ରୁଟି ବୋଲି କୁହାଯାଇଥିଲା ।

#WATCH Farmers sat on protest at Delhi borders for over a year,but yesterday when PM had to wait for around 15 mins he was troubled by it. Why these double standards? Modi Ji, you had said that you’ll double farmers’ income but you even took away what they had: Navjot Sidhu, Cong pic.twitter.com/qtflt4WmOI

— ANI (@ANI) January 6, 2022

ଏହି ଘଟଣାରେ ବିଜେପି ନେତାମାନେ କଂଗ୍ରେସ ଓ ପଞ୍ଜାବ ସରକାରକୁ ଟାର୍ଗେଟ କରିବା ବେଳେ ଏହାକୁ ନେଇ ମୁହଁ ଖୋଲିଥିଲେ ଖୋଦ୍ ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ୍ ସିଂହ ଚନ୍ନୀ। ସଭାକୁ ଉଦବୋଧନ ନଦେଇ ମୋଦୀ ପୁଣି ଦିଲ୍ଲୀ ଫେରିଯିବାକୁ ନେଇ ସେ ଦୁଃଖ ପ୍ରକାଶ କରିବା ସହ ସୁରକ୍ଷା ବ୍ୟବସ୍ଥାରେ କୌଣସି ତ୍ରୁଟି ହୋଇନଥିବା କହିଥିଲେ । ତେବେ ଏହି ଘଟଣାର ପୂରା ଯାଞ୍ଚ କରାଯିବ ବୋଲି ସେ କହିଛନ୍ତି ।