ଚଣ୍ଡିଗଡ଼ : ପଞ୍ଜାବରେ ବିଷାକ୍ତ ମଦ ପିଇ ଆଉ ୨୩ ଜଣ ମୃତ୍ୟୁବରଣ କରିଛନ୍ତି । ଫଳରେ ଏହି ଘଟଣାରେ ମୃତ୍ୟୁବରଣ କରିଥିବା ଲୋକମାନଙ୍କ ସଂଖ୍ୟା ୮୬ରେ ପହଞ୍ଚିଛି । ତରନ ତାରନ ଜିଲ୍ଲାରେ ସବୁଠାରୁ ଅଧିକ ଲୋକ ମୃତ୍ୟୁ ବରଣ କରିଛନ୍ତି । କେବଳ ଏହି ଜିଲ୍ଲାରେ ୪୨ ଜଣ ମୃତ୍ୟୁବରଣ କରିଛନ୍ତି । ଏହାଛଡ଼ା ଅମୃତସରରେ ୧୧ ଜଣ ଓ ଗୁରୁଦାସପୁରରେ ୯ ଜଣ ମୃତ୍ୟୁବରଣ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏହି ମାମଲାରେ ମୁଖ୍ୟମନ୍ତ୍ରୀ ଅମରିନ୍ଦର ସିଂହ ଉଚ୍ଚସ୍ତରୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି। ପଂଜାବ ପୁଲିସ ମହାନିର୍ଦ୍ଦେଶକ ଦିନକର ଗୁପ୍ତା କହିଛନ୍ତି ଯେ ୩ଟି ଜିଲ୍ଲାକୁ ଏକ ନିର୍ଦ୍ଦିଷ୍ଟ ଗୋଷ୍ଠୀ ଦ୍ବାରା ଯୋଗାଣ ହୋଇଥିବା ମଦ ଯୋଗୁଁ ଏଭଳି ବିଭୀଷିକା ସୃଷ୍ଟି ହୋଇଛି ।
କେତେକ ବ୍ୟକ୍ତି ଗୁରୁତର ଅସୁସ୍ଥ ହୋଇ ବିଭିନ୍ନ ହସ୍ପିଟାଲରେ ଭର୍ତ୍ତି ହୋଇଛନ୍ତି। ମଦ ମୃତ୍ୟୁ ହୋଇଥିବା ସମସ୍ତ ଅଂଚଳରେ ବ୍ୟାପକ ଚଢ଼ଉ ଚାଲିଛି । ପୁଲିସ ଦ୍ୱାରା ପ୍ରାୟ ୧୦୦ଟି ସ୍ଥାନରେ ଚଢଉ କରାଯାଇ ୧୭ରୁ ଅଧିକ ଲୋକଙ୍କୁ ଗିରଫ କରାଯାଇଛି । ଗିରଫ ବ୍ୟକ୍ତିମାନଙ୍କ ମଧ୍ୟରେ ଜଣେ ମଦ ମାଫିଆ, ଜଣେ ଦାଗି ଅପରାଧୀ, ଜଣେ ମହିଳା ଚୋରାଚାଲାଣକାରୀ, ଜଣେ ଟ୍ରାନ୍ସପୋର୍ଟ ସଂସ୍ଥା ମାଲିକ, ବିଭିନ୍ନ ଢାବାର ମାଲିକ ଓ ପରିଚାଳକ ଅଛନ୍ତି । ଏହି ଚଢଉ ବେଳେ ବିଭିନ୍ନ ସ୍ଥାନରୁ ପ୍ରାୟ ୭୫୦ ଲିଟର ବିଷାକ୍ତ ମଦ ଜବତ ହୋଇଛି ।