ୟୁକ୍ରେନ ୟୁରୋପୀୟ ସଂଘର ସଦସ୍ୟ ହେଲେ ଆମର କୌଣସି ଆପତ୍ତି ନାହିଁ : ପୁଟିନ
ବ୍ରସେଲ୍ସ : ୟୁରୋପୀୟ ସଂଘର ସଦସ୍ୟ ହେବାକୁ ୟୁକ୍ରେନର ଆବେଦନ ସଂପର୍କରେ ଆସନ୍ତା ୨୩ ତାରିଖରେ ବିଚାର କରିବ ୟୁରୋପୀୟ ପରିଷଦ । ଏହି ବୈଠକରେ ୟୁରୋପୀୟ ସଂଘର ସମସ୍ତ ୨୭ ସଦସ୍ୟ ରାଷ୍ଟ୍ର ଓ ୟୁରୋପୀୟ କମିସନଙ୍କ ସମର୍ଥନ ଆବଶ୍ୟକ ହେବ । ତେବେ ପୂର୍ବରୁ ହିଁ ୟୁରୋପୀୟ କମିସନ ୟୁକ୍ରେନର ସଦସ୍ୟତାକୁ ସମର୍ଥନ କରିସାରିଛି ।
Sambad is now on WhatsApp
Join and get latest news updates delivered to you via WhatsApp
ତେବେ ଆଶ୍ଚର୍ଯ୍ୟ କଥା ହେଉଛି ୟୁକ୍ରେନ ଉପରେ ଆକ୍ରମଣ କରୁଥିବା ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ କହିଛନ୍ତି ଯେ ୟୁକ୍ରେନ ୟରୋପୀୟ ସଂଘର ସଦସ୍ୟ ହେଲେ ତାଙ୍କର କୌଣସି ଆପତ୍ତି ନାହିଁ ।
ସେ କହିଛନ୍ତି ଯେ, ୟୁରୋପୀୟ ସଂଘ ଏକ ସାମରିକ ମେଣ୍ଟ ନୁହେଁ, ଏହାର ଉଦ୍ଦେଶ୍ୟ ଅର୍ଥନୈତିକ । ଏଣୁ ୟୁକ୍ରେନର ସଦସ୍ୟତାକୁ ନେଇ ରୁଷର କୌଣସି ଆପତ୍ତି ନାହିଁ । ଏକ ଅର୍ଥନୈତିକ ମେଣ୍ଟର ସଦସ୍ୟ ହେବା ନ ହେବା ଏକ ସାର୍ବଭୌମ ରାଷ୍ଟ୍ରର ନିଜସ୍ବ ନିଷ୍ପତ୍ତି ।
ଶୁକ୍ରବାରଦିନ ୟୁରୋପୀୟ ସଂଘର ସଦସ୍ୟତା ପାଇଁ ୟୁକ୍ରେନକୁ ସମର୍ଥନ ସଂପର୍କରେ ୟୁରୋପୀୟ କମିସନର କାର୍ଯ୍ୟନିର୍ବାହୀ କମିସନର ମୁଖ୍ୟ ଉର୍ସୁଲା ଭାନ ଡର ଲେୟେନ ଘୋଷଣା କରିଥିଲେ । ଏହି ଘୋଷଣା କରିବା ବେଳେ ସେ ୟୁକ୍ରେନ ଜାତୀୟ ପତାକାର ରଙ୍ଗ- ହଳଦିଆ ଓ ନୀଳ ରଙ୍ଗର ଏକ ପୋଷାକ ପିନ୍ଧିଥିଲେ ।
ୟୁକ୍ରେନ ଉପରେ ରୁଷର ଆକ୍ରମଣ ଆରମ୍ଭ ହେବାର ୪ ଦିନ ପରେ ୟୁକ୍ରେନ ସରକାର .ୟୁରୋପୀୟ ସଂଘରେ ସାମିଲ ହେବାକୁ ଆବେଦନ କରିଥିଲେ । ସେବେଠାରୁ ଏହି ଆବେଦନ ବିଚାରାଧୀନ ଥିଲା ।