ସେପ୍ଟେମ୍ବରରେ ଭାରତ ଗସ୍ତରେ ଆସିବେ ପୁଟିନ୍ ! ଜି-୨୦ ସମ୍ମିଳନୀରେ ଯୋଗ ଦେବେ
ନୂଆଦିଲ୍ଲୀ: ଦିଲ୍ଲୀରେ ହେବାକୁ ଥିବା ଜି-୨୦ ଶିଖର ସମ୍ମିଳନୀ ପାଇଁ ଜୋରସୋରରେ ପ୍ରସ୍ତୁତି ଚାଲିଛି। ସେପଟେ ରୁଷରାଷ୍ଟ୍ରପତି ଭ୍ଲାଦିମିର ପୁଟିନ ମଧ୍ୟ ଭାରତ ଗସ୍ତରେ ଆସିବାର ସମ୍ଭାବନା ରହିଛି । ସେପ୍ଟେମ୍ବରରେ ଭାରତର ରାଜଧାନୀ ନୂଆଦିଲ୍ଲୀରେ ହେବାକୁ ଥିବା ଜି-୨୦ ଶିଖର ସମ୍ମିଳନୀରେ ରୁଷ୍ ରାଷ୍ଟ୍ରପତି ଭ୍ଲାଦିମିର ପୁଟିନ୍ ଯୋଗଦେବେ ବୋଲି ଅନ୍ତର୍ଜାତୀୟ ଗଣମାଧ୍ୟମ ସୁତ୍ରରୁ ଖବର ମିଳିଛି । ମିଳିଥିବା ସୂଚନା ଅନୁଯାୟୀ, ପୁଟିନଙ୍କ ଗସ୍ତ ପାଇଁ ରୁଷ ସରକାର ମଂଜୁରୀ ଦେଇପାରନ୍ତି ।
Sambad is now on WhatsApp
Join and get latest news updates delivered to you via WhatsApp
ଋଷ ରାଷ୍ଟ୍ରପତିଙ୍କ ଭାରତ ଗସ୍ତ ସମ୍ପର୍କରେ କୌଣସି ଆନୁଷ୍ଠାନିକ ସୂଚନା ଜାରି କରାଯାଇ ନାହିଁ, ଯଦିଓ ଭାରତ ଆନୁଷ୍ଠାନିକ ଭାବେ ପୁଟିନଙ୍କୁ ନିମନ୍ତ୍ରଣ କରିଛି ଏବଂ ରୁଷ ସରକାର ଏହାକୁ ଗ୍ରହଣ କରିଛନ୍ତି। ଭାରତରେ ହେବାକୁ ଥିବା ଜି-୨୦ ଶିଖର ବୈଠକ ସମୟରେ ରୁଷର ଭ୍ଲାଦିଭୋସ୍ତକରେ ଏକ ଆର୍ଥିକ ସମ୍ମିଳନୀ ଆୟୋଜନ କରାଯାଇଥିଲା । କିନ୍ତୁ ଭାରତ ଆସିବା ପାଇଁ ପୁଟିନଙ୍କୁ ମୁକ୍ତ ରଖିବାକୁ ଏହି ବୈଠକକୁ ଆଉ କିଛି ଦିନ ଘୁଞ୍ଚାଇଦିଆଯାଇଛି ।
ସୂଚନାଯୋଗ୍ୟ ଯେ, ଗତବର୍ଷ ଇଣ୍ଡୋନେସିଆର ବାଲିରେ ଆୟୋଜିତ ଜି-୨୦ କାର୍ଯ୍ୟକ୍ରମରେ ପୁଟିନ୍ ଯୋଗ ଦେଇନଥିଲେ ଏବଂ ତାଙ୍କ ସ୍ଥାନରେ ବୈଦେଶିକ ମନ୍ତ୍ରୀ ସେର୍ଗେଇ ଲାଭରୋଭଙ୍କୁ ପଠାଇଥିଲେ । କିନ୍ତୁ ଭାରତ ଗସ୍ତରେ ଆସିବାକୁ ପୁଟିନ ରାଜି ହେବା ଦୁଇ ଦେଶ ମଧ୍ୟରେ ଥିବା ବନ୍ଧୁତାକୁ ଦର୍ଶାଉଛି ।