ନୂଆଦିଲ୍ଲୀ : ରୁଷ-ୟୁକ୍ରେନ ଯୁଦ୍ଧ ସମାପ୍ତି ପାଇଁ ତୁର୍କୀରେ ଚାଲିଥିବା ଆଲୋଚନାରେ ଉଲ୍ଲେଖନୀୟ ଅଗ୍ରଗତି ହୋଇଥିବା କୁହାଯାଉଛି । ଏହା ଫଳରେ ଆଗକୁ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଓ ୟୁକ୍ରେନ ରାଷ୍ଟ୍ରପତି ଭୋଲଦମିର ଜେଲେନସ୍କିଙ୍କ ମଧ୍ୟରେ ସିଧାସଳଖ ଆଲୋଚନା ଲାଗି ବାଟ ଫିଟିବାରେ ଲାଗିଛି । ଏପରି ହେଲେ ଆଗାମୀ କିଛି ଦିନରେ ଯୁଦ୍ଧ ସମାପ୍ତ ହେବା ନେଇ ଆଶା ସୃଷ୍ଟି ହୋଇଛି ।
Sambad is now on WhatsApp
Join and get latest news updates delivered to you via WhatsApp
ରୁଷ ସହ ଆଲୋଚନାରେ ଭାଗ ନେଇଥିବା ୟୁକ୍ରେନ ପ୍ରତିନିଧିମଣ୍ଡଳର ମୁଖ୍ୟ ଡେଭିଡ୍ ଆରାଖାମିଆ କହିଛନ୍ତି ଯେ, ଆଜି ଅନୁଷ୍ଠିତ ବୈଠକରେ ଦୁଇ ଦେଶର ରାଷ୍ଟ୍ରପତିଙ୍କ ମଧ୍ୟରେ ଆଲୋଚନା ପାଇଁ କ୍ଷେତ୍ର ପ୍ରସ୍ତୁତ ହୋଇଛି ।
ପୂର୍ବରୁ ପୁଟିନଙ୍କ ସହ ସିଧାସଳଖ କଥାବାର୍ତ୍ତା ପାଇଁ ବାରମ୍ବାର ୟୁକ୍ରେନ ପକ୍ଷରୁ ପ୍ରସ୍ତାବ ଦିଆଯାଇଥିବା ସତ୍ତ୍ବେ ରୁଷ ପକ୍ଷରୁ ତାହାକୁ ଗ୍ରହଣ କରାଯାଉନଥିଲା । ତେବେ ଏବେ ଏଥିପାଇଁ ରୁଷ ପକ୍ଷରୁ ସକାରାତ୍ମକ ସଂକେତ ମିଳିଥିବା କୁହାଯାଉଛି ।
ଏହା ପୂର୍ବରୁ ରୁଷର ଉପ-ପ୍ରତିରକ୍ଷାମନ୍ତ୍ରୀ ଆଲେକ୍ସାଣ୍ଡାର ଫୋମିନ କହିଥିଲେ ଯେ ୟୁକ୍ରେନ ନିରପେକ୍ଷ ରହିବା ଓ ଅଣ-ଆଣବିକ ଶକ୍ତି ହେବାକୁ ରାଜି ହେବା ପରେ ସ୍ଥିତିରେ ଉନ୍ନତି ଆସିଛି । ଏ ସଂପର୍କରେ ଏକ ରାଜିନାମା ପାଇଁ ଆଲୋଚନା ଚାଲିଥିବାରୁ ଉତ୍ତର ୟୁକ୍ରେନ ବିଶେଷକରି ରାଜଧାନୀ କିବ ଓ ଚେର୍ନିହିବରେ ସାମରିକ ଅଭିଯାନକୁ ସାମୟିକଭାବେ ହ୍ରାସ କରିବାକୁ ଏକ ନିଷ୍ପତ୍ତି ନିଆଯାଇଛି ।