ସ୍ନାକ୍ସ ମୂଲ୍ୟ କମାଇଲା ପିଭିଆର୍‌ ଆଇନକ୍ସ

ଭୁବନେଶ୍ବର: ପିଭିଆର୍‌ ଆଇନକ୍ସର ସିନେ ଦର୍ଶକମାନେ କମ୍ ଦାମ୍‌ରେ ସ୍ନାକ୍ସ କିଣିବାର ଲାଭ ପାଇବେ। କଂପାନି ପକ୍ଷରୁ ସିନେପ୍ରେମୀଙ୍କ ପାଇଁ ବିଭିନ୍ନ ପ୍ରକାର ସ୍ନାକ୍ସ ଦାମ୍ ହ୍ରାସ କରାଯାଇଛି। ସୋମବାରରୁ ଗୁରୁବାର ପର୍ଯ୍ୟନ୍ତ ସକାଳ ୯ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଦର୍ଶକମାନେ ୯୯ ଟଙ୍କାରୁ ଆରମ୍ଭ ହେଉଥିବା ବର୍ଗର, ହଟ୍‌ଡଗ୍‌, ପପକର୍ଣ୍ଣ, ସାଣ୍ଡ୍‌ୱିଚ୍‌ ଓ ପାନୀୟ ଆଦି କିଣିପାରିବେ। କଂପାନି ଏହାର ଖାଦ୍ୟ ଓ ପାନୀୟ ମୂଲ୍ୟରେ ୪୦ ପ୍ରତିଶତ ପର୍ଯ୍ୟନ୍ତ ହ୍ରାସ କରିଛି।

ମଲ୍ଟିପ୍ଲେକ୍ସରେ ଖାଦ୍ୟ ଓ ପାନୀୟର ଦାମ୍ ଅତ୍ୟଧିକ ରହୁଥିବା ନେଇ ଅନେକ ସମୟରେ ଲୋକମାନେ ସୋସିଆଲ ମିଡିଆରେ ନିଜର ଅସନ୍ତୋଷ ଜାହିର କରୁଛନ୍ତି। ନିକଟରେ ନୋଏଡାସ୍ଥିତ ପିଭିଆର୍‌ସିନେମାରେ ଜଣେ ଗ୍ରାହକ ଚିଜ୍ ପପକର୍ଣ୍ଣ ଓ ପେପ୍‌ସି କିଣିବାରେ ୮୨୦ ଟଙ୍କା କିଣିବା ପରେ ତାହାକୁ ନେଇ ଏକ ଟ୍ବିଟ୍‌ କରିଥିଲେ। ପରିବାର ସହ ସିନେମା ଦେଖିବା ବେଶ ମହଙ୍ଗା ହୋଇଗଲାଣି ବୋଲି ସେ ଲେଖିଥିଲେ। ସେହି ଟ୍ବିଟ୍‌ ଉପରେ ପ୍ରତିକ୍ରିୟା ରଖି ପିଭିଆର୍‌ ସିନେମା ଜଣାଇଥିଲା ଯେ ଆମେ ପ୍ରତି ମତାମତକୁ ଗୁରୁତ୍ବ ‌ଓ ସମ୍ମାନ ଜଣାଉଛୁ। ସେଥିରେ ସ୍ନାକ୍ସ ମୂଲ୍ୟ ହ୍ରାସ ସମ୍ପର୍କରେ ସୂଚନା ଦିଆଯାଇଥିଲା।