ପଞ୍ଜାବ ଦଖଲ ପରେ ଏବେ ଗୁଜୁରାଟ ଉପରେ ଆପ୍ର ନଜର, ରାଘବ ଚଢ଼ାଙ୍କୁ ମିଳିପାରେ ଗୁରୁଦାୟିତ୍ବ
ନୂଆଦିଲ୍ଲୀ: ଆମ୍ ଆଦମୀ ପାର୍ଟି (ଆପ୍) ଚଳିତ ବର୍ଷ ହେବାକୁ ଥିବା ଗୁଜୁରାଟ ବିଧାନସଭା ନିର୍ବାଚନରେ ସମସ୍ତ ଶକ୍ତି ସହିତ ଲଢ଼ି ଗୁଜୁରାଟର ଶାସନ କ୍ଷମତା ହାତେଇବାକୁ ଜୋରସୋରରେ ପ୍ରୟାସ ଆରମ୍ଭ କରି ଦେଇଛି। ସୂଚନାନୁସାରେ, ରାଜ୍ୟରେ ଏହି ଅଭିଯାନର ନେତୃତ୍ୱ ନେବାକୁ ଦଳ ଜଣେ ବଡ ଯୁବ ନେତାଙ୍କୁ ନେବାକୁ ଯୋଜନା କରୁଛି। ଆଲୋଚନା ହେଉଛି ଯେ ସାଂସଦ ରାଘବ ଚଢ଼ା ସେହି ବ୍ୟକ୍ତି ହୋଇପାରନ୍ତି। ଚଳିତ ବର୍ଷ ପ୍ରାରମ୍ଭରେ ପଞ୍ଜାବରେ ଆମ୍ ଆଦମୀ ପାର୍ଟିର ବିପୁଳ ବିଜୟରେ ଚଢ଼ା ମଧ୍ୟ ପ୍ରମୁଖ ଭୂମିକା ଗ୍ରହଣ କରିଥିଲେ। ରାଘବ ଚଢ଼ା ଉଭୟ ଦିଲ୍ଲୀ ଏବଂ ପଞ୍ଜାବରେ ଗୁରୁତ୍ୱପୂର୍ଣ୍ଣ ପଦବୀରେ ଅବସ୍ଥାପିତ ହୋଇଛନ୍ତି ଏବଂ ଦଳର ଯୁବ ପିଢ଼ି ମଧ୍ୟରେ ସେ ଏକ ଲୋକପ୍ରିୟ ଚେହେରା ଭାବରେ ଦେଖାଯାଉଛନ୍ତି ।
Sambad is now on WhatsApp
Join and get latest news updates delivered to you via WhatsApp
ବର୍ତ୍ତମାନ ଗୁଜୁରାଟ ହେଉଛି ଆମ୍ ଆଦମୀ ପାର୍ଟି ପାଇଁ ପରବର୍ତ୍ତୀ ବଡ ଲକ୍ଷ୍ୟ, ଯେଉଁଠାରେ ଚଳିତ ବର୍ଷ ଶେଷରେ ନିର୍ବାଚନ ହେବାକୁ ଯାଉଛି । ନିକଟରେ ଆପ୍ର ସଂଯୋଜକ ଅରବିନ୍ଦ କେଜ୍ରିୱାଲ ଗୁଜରାଟ ରାଜ୍ୟ ଗସ୍ତରେ ଯାଇଛନ୍ତି ଏବଂ ସମସ୍ତଙ୍କ ପାଇଁ ଚାକିରି, ମାଗଣା ବିଦ୍ୟୁତ୍, ଜଳ ଓ ସ୍ୱାସ୍ଥ୍ୟ-ଶିକ୍ଷା କ୍ଷେତ୍ରରେ ସଂସ୍କାର ଆଣିବାକୁ ପ୍ରତିଶ୍ରୁତି ଦେଇ ଲୋକଙ୍କୁ ପ୍ରଲୋଭିତ କରିବାକୁ ଚେଷ୍ଟା କରିଛନ୍ତି। କେବଳ ଏତିକି ନୁହେଁ ଆମ୍ ଆଦମୀ ପାର୍ଟି ମଧ୍ୟ ଗାଁ ମୁଖିଆଙ୍କ ପାଇଁ ଏକ ଦରମା ଘୋଷଣା କରିଛି । କେଜ୍ରିୱାଲ ତାଙ୍କ ଦଳକୁ ଗୁଜରାଟରେ ଶାସକ ବିଜେପିର ମୁଖ୍ୟ ପ୍ରତିଦ୍ୱନ୍ଦ୍ୱୀ ଭାବରେ ଦେଖୁଛନ୍ତି। ଏପର୍ଯ୍ୟନ୍ତ ଏହି ସ୍ଥାନ କଂଗ୍ରେସ ହାତରେ ରହିଛି।
ସୂଚନାନୁସାରେ, ରାଜ୍ୟ ୟୁନିଟର ସଦସ୍ୟମାନଙ୍କୁ ସମ୍ବୋଧିତ କରିବାବେଳେ କେଜ୍ରିୱାଲ କହିଛନ୍ତି, “ଏପରି କିଛି ଲୋକ ଅଛନ୍ତି ଯେଉଁମାନେ ରାଜ୍ୟରେ ବିଜେପି ଶାସନ ଚାହୁଁ ନାହାଁନ୍ତି ଏବଂ ସେମାନେ କଂଗ୍ରେସକୁ ମଧ୍ୟ ଭୋଟ୍ ଦେବାକୁ ଚାହୁଁନାହାନ୍ତି । ଆମକୁ ସେମାନଙ୍କର ଭୋଟ୍ ପାଇବାକୁ ପଡିବ କାରଣ ଆମେ ରାଜ୍ୟରେ ବିଜେପିର ଏକମାତ୍ର ବିକଳ୍ପ। ” ଗୁଜୁରାଟରେ ଆପ୍ ଏହାର ‘ଚେହେରା’ ଭାବରେ କାହାକୁ ପ୍ରୋଜେକ୍ଟ କରିବ ତାହା ଏଯାଏଁ ସ୍ପଷ୍ଟ ହୋଇନାହିଁ। ଗୁଜୁରାଟ ଏପରି ଏକ ରାଜ୍ୟ ଯେଉଁଠାରେ ଗତ ତିନି ଦଶନ୍ଧି ଧରି ବିଜେପି କ୍ଷମତାରେ ଅଛି। ଏହି ପ୍ରଶ୍ନକୁ ବାରମ୍ବାର ପଚରାଯିବା ସତ୍ୱେ କେଜ୍ରିୱାଲ ଏବଂ ତାଙ୍କର ପ୍ରମୁଖ ନେତାମାନେ ଏହି ପ୍ରଶ୍ନ ଉପରେ ନିରବ ରହିଛନ୍ତି।