ପ୍ରିୟଙ୍କାଙ୍କୁ କଂଗ୍ରେସର ସାଧାରଣ ସଂପାଦକ କରାଯିବା ପରେ ଏଭଳି ପ୍ରତିକ୍ରିୟା ରଖିଲେ ଭାଇ ରାହୁଲ ଏବଂ ସ୍ବାମୀ ରବର୍ଟ ଭଦ୍ରା
ନୂଆଦିଲ୍ଲୀ : ପ୍ରିୟଙ୍କା ଗାନ୍ଧି ଭଦ୍ରାଙ୍କୁ କଂଗ୍ରେସ ପାର୍ଟି ପକ୍ଷରୁ ପୂର୍ବ ଉତ୍ତରପ୍ରଦେଶର ସାଧାରଣ ସଂପାଦକ ଭାବରେ ନିଯୁକ୍ତି ଦିଆଯିବା ପରେ ରାଜନୀତିରେ ଉଷ୍ମତା ଦେଖା ଯାଇଛି । ପ୍ରିୟଙ୍କାଙ୍କ ରାଜନୀତିରେ ପ୍ରବେଶକୁ ନେଇ ରାଜନେତାମାନେ ଭିନ୍ନ ଭିନ୍ନ ମତ ରଖିଛନ୍ତି । କଂଗ୍ରେସକୁ ଶୁଭେଚ୍ଛା ଜଣାଇବା ସହ ରାହୁଲ ରାଜନୀତି କରିବାରେ ଅସଫଳ ବୋଲି କଂଗ୍ରେସ ପ୍ରମାଣ ଦେଇଥିବା କହିଛି ବିଜେପି। ତେବେ ପ୍ରିୟଙ୍କାଙ୍କ ପ୍ରବେଶକୁ ନେଇ ରାହୁଲଙ୍କୁ ସମାଲୋଚନା କରାଯାଉଥିବା ବେଳେ ରାହୁଲଙ୍କ ଉପରେ ଏହାର କୌଣସି ପ୍ରଭାବ ପଡ଼ି ନ ଥିବା ତାଙ୍କ ପ୍ରତିକ୍ରିୟାରୁ ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ପ୍ରିୟଙ୍କାଙ୍କୁ କଂଗ୍ରେସର ସାଧାରଣ ସଂପାଦକ କରାଯିବା ପରେ ତାଙ୍କୁ ଶୁଭେଚ୍ଛା ଜଣାଇବା ସହ ଉତ୍ତରପ୍ରଦେଶ ରାଜନୀତିରେ ପରିବର୍ତ୍ତନ ଆଣିବା ପାଇଁ ପ୍ରିୟଙ୍କା ଗାନ୍ଧି ଏବଂ ଜ୍ୟୋର୍ତିଆଦିତ୍ୟ ସିନ୍ଧିଆଙ୍କ ଭଳି ଶକ୍ତିଶାଳୀ ନେତାଙ୍କ ଆବଶ୍ୟକତା ରହିଥିଲା । ମାୟାବତୀଜୀ ଏବଂ ଅଖିଲେଶଜୀଙ୍କ ସହ ଆମର କୌଣସି ଶତ୍ରୁତା ନାହିଁ । ବାସ୍ତବରେ ମୁଁ ତାଙ୍କୁ ବହୁତ ସମ୍ମାନ ଦିଏ । ଯେତେ ସମ୍ଭବ ମୁଁ ତାଙ୍କର ସହଯୋଗ କରିବା ପାଇଁ ପ୍ରସ୍ତୁତ ଅଛି । କାରଣ ଆମ ୩ ଜଣଙ୍କର ଲକ୍ଷ୍ୟ ବିଜେପିକୁ ହରାଇବା ବୋଲି କହିଛନ୍ତି ରାହୁଲ ।
କେବଳ ରାହୁଲ ନୁହନ୍ତି, ସ୍ୱାମୀ ରବର୍ଟ ଭଦ୍ରା ମଧ୍ୟ ପ୍ରିୟଙ୍କାଙ୍କ ରାଜନୀତିରେ ପ୍ରବେଶକୁ ନେଇ ଫେସ୍ବୁକ୍ରେ ତାଙ୍କୁ ଶୁଭେଚ୍ଛା ଜଣାଇବା ସହ ମୁଁ ସବୁ ସମୟରେ ତୁମ ସହ ରହିଛି । ତୁମେ ଏହି କ୍ଷେତ୍ରରେ ଭଲ ପ୍ରଦର୍ଶନ କର ବୋଲି ଲେଖିଥିବା ଦେଖାଯାଇଛି । ପୂର୍ବ ଉତ୍ତରପ୍ରଦେଶର ସାଧାରଣ ସଂପାଦକ ଭାବରେ ପ୍ରିୟଙ୍କା ଗାନ୍ଧୀଙ୍କୁ ନିଯୁକ୍ତି ଦିଆ ଯାଇଥିବା ବେଳେ ପଶ୍ଚିମ ଉତ୍ତରପ୍ରଦେଶର ସାଧାରଣ ସଂପାଦକ ଭାବରେ ଜ୍ୟୋର୍ତିଆଦିତ୍ୟ ସିନ୍ଧିଆଙ୍କୁ ନିଯୁକ୍ତି ଦିଆଯାଇଛି ।