୧୦ ବର୍ଷ ଧରି ଖାଲି ପଡିଥିବା ଏହି ପଦବୀ ହାତେଇଲେ ରାହୁଲ ଗାନ୍ଧୀ

ନୂଆଦିଲ୍ଲୀ: କ୍ରମାଗତ ଦ୍ୱିତୀୟ ଥର ପାଇଁ ଓମ ବିର୍ଲା ଲୋକସଭା ବାଚସ୍ପତି ଭାବରେ ନିର୍ବାଚିତ ହୋଇଛନ୍ତି। ଏହା ପରେ ଲୋକସଭା ବାଚସ୍ପତି ଓମ ବିର୍ଲା ରାହୁଲ ଗାନ୍ଧୀଙ୍କୁ ୧୦ ବର୍ଷ ପରେ ବିରୋଧୀ ଦଳର ନେତା ଭାବରେ ସ୍ୱୀକୃତି ଦେଇଛନ୍ତି। ମଙ୍ଗଳବାର କଂଗ୍ରେସ ସାଂସଦ ରାହୁଲ ଗାନ୍ଧୀ ବିରୋଧୀ ଦଳର ନେତା ହୋଇଥିଲେ। ଦଳର ସାଧାରଣ ସମ୍ପାଦକ କେ.ସି ଭେନୁଗୋପାଲ ତାଙ୍କ ନାମ ଘୋଷଣା କରିଥିଲେ। ଏହାପୂର୍ବରୁ ୨୦୦୯ ରୁ ୨୦୧୪ ପର୍ଯ୍ୟନ୍ତ ଭାରତୀୟ ଜନତା ପାର୍ଟିର ନେତ୍ରୀ ଦିବଂଗତ ସୁଷମା ସ୍ୱରାଜ ଲୋକସଭାରେ ବିରୋଧୀ ଦଳର ନେତ୍ରୀ ଥିଲେ। କଂଗ୍ରେସର ଶେଷ ବିରୋଧୀଦଳ ନେତ୍ରୀ ସୋନିଆ ଗାନ୍ଧୀ ୧୯୯୯ ରୁ ୨୦୦୪ ପର୍ଯ୍ୟନ୍ତ ଏହି ପଦବୀରେ ରହିଥିଲେ। ରାହୁଲ ଗାନ୍ଧୀଙ୍କୁ ଲୋକସଭାରେ ବିରୋଧୀ ଦଳର ନେତା ଭାବେ ନିଯୁକ୍ତ କରିବାର ନିଷ୍ପତ୍ତି ନୂଆଦିଲ୍ଲୀରେ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେଙ୍କ ବାସଭବନରେ ଇଣ୍ଡିଆ ମେଣ୍ଟର ନେତାଙ୍କ ବୈଠକରେ ନିଆଯାଇଥିଲା ।

ରାହୁଲ ଗାନ୍ଧୀ ପାଞ୍ଚ ଥର ସାଂସଦ ରହିଛନ୍ତି ଏବଂ ବର୍ତ୍ତମାନ ଲୋକସଭାରେ ରାଏବରେଲି ନିର୍ବାଚନମଣ୍ଡଳୀରୁ ପ୍ରତିନିଧିତ୍ୱ କରୁଛନ୍ତି। ଉଲ୍ଲେଖ ଥାଉ କି ଓମ ବିର୍ଲାଙ୍କୁ ଅଭିନନ୍ଦନ ଓ ଶୁଭେଚ୍ଛା ଜଣାଇ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଆପଣ ଦ୍ୱିତୀୟ ଥର ପାଇଁ ଏହି ଆସନରେ ବସିଛନ୍ତି, ଏହା ଏହି ସଦନର ସୌଭାଗ୍ୟ | ଦ୍ୱିତୀୟ ଥର ପାଇଁ ୧୮ ତମ ଲୋକସଭାର ଦାୟିତ୍ୱ ଗ୍ରହଣ କରିଥିବା ବାଚସ୍ପତି ଭାବେ ଏହା ଏକ ନୂଆ ରେକର୍ଡ ବୋଲି ସେ କହିଛନ୍ତି। ଲୋକସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀ ମଧ୍ୟ ନବ ନିର୍ବାଚିତ ବାଚସ୍ପତି ଓମ ବିର୍ଲାଙ୍କୁ ଅଭିନନ୍ଦନ ଜଣାଇବା ସହ ବିରୋଧୀଙ୍କୁ କହିବାର ସୁଯୋଗ ଦେଇ ସମ୍ବିଧାନର ସୁରକ୍ଷା ଦାୟିତ୍ୱ ପୂରଣ କରିବାର ଆଶା ରଖିଛନ୍ତି ବୋଲି କହିଥିଲେ |