ଆମେଥି ଆସନରୁ ରାହୁଲଙ୍କ ପ୍ରତିଦ୍ୱନ୍ଦ୍ୱିତାକୁ ନେଇ ଦ୍ବନ୍ଦ୍ବ ଜାରି
ଲକ୍ଷ୍ନୌ: ଉତ୍ତରପ୍ରଦେଶର ଉଚ୍ଚ-ପ୍ରୋଫାଇଲ୍ ଆମେଥି ଆସନରୁ ପ୍ରତିଦ୍ୱନ୍ଦ୍ୱିତାକୁ ନେଇ ଦ୍ବନ୍ଦ୍ବ ଜାରି ରହିଛି। କଂଗ୍ରେସ ନେତା ରାହୁଲ ଗାନ୍ଧୀ କହିଛନ୍ତି ଯେ ଏହା ଦଳର କେନ୍ଦ୍ରୀୟ ନିର୍ବାଚନ କମିଟି (ସିଇସି)ର ନିଷ୍ପତ୍ତି। ସେ ସିଇସିର ନିଷ୍ପତ୍ତିକୁ ପାଳନ କରିବେ। ଏକଦା ରାହୁଲ ଗାନ୍ଧୀଙ୍କ ଗଡ଼ ଥିବା ଆମେଥି ଆସନରୁ ବିଜେପି ସ୍ମୃତି ଇରାନୀଙ୍କୁ ପୁନର୍ବାର ମନୋନୀତ କରିଥିବା ବେଳେ କଂଗ୍ରେସ ଏପର୍ଯ୍ୟନ୍ତ ଏହାର ନାମାଙ୍କନପତ୍ର ଦେଇନାହିଁ।
ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବଙ୍କ ସହ ମିଳିତ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି ରାହୁଲ ଗାନ୍ଧୀ କହିଛନ୍ତି ଯେ ‘‘ସିଇସି ଏବଂ କଂଗ୍ରେସ ସଭାପତି ଯାହା କରିବାକୁ କହିବେ ମୁଁ ତାହା କରିବି।’’
Sambad is now on WhatsApp
Join and get latest news updates delivered to you via WhatsApp
କେରଳର ୱାୟାନାଡରୁ କଂଗ୍ରେସ ପକ୍ଷରୁ ନିର୍ବାଚନ ଲଢ଼ିବାକୁ ଯାଉଥିବା ରାହୁଲ ଗାନ୍ଧୀ ମଧ୍ୟ ଆମେଥିରୁ ପ୍ରତିଦ୍ୱନ୍ଦ୍ୱିତା କରିପାରନ୍ତି ବୋଲି କଳ୍ପନାଜଳ୍ପନା ପ୍ରକାଶ ପାଇଛି। ୨୦୦୪ ପରଠାରୁ ରାହୁଲ ଗାନ୍ଧୀ ଲଗାତାର ତିନିଥର ଆମେଥି ଆସନ ଜିତିଛନ୍ତି। ଏହି ସାମ୍ବାଦିକ ସମ୍ମିଳନୀରେ କଂଗ୍ରେସ ନେତା କହିଛନ୍ତି ଯେ ବିଜେପି ମାତ୍ର ୧୫୦ଟି ଆସନରେ ସୀମିତ ରହିବ।
ପ୍ରାୟ ୧୫-୨୦ ଦିନ ପୂର୍ବରୁ ମୁଁ ଭାବୁଥିଲି ବିଜେପି ପ୍ରାୟ ୧୮୦ ଟି ଆସନ ଜିତିବ, କିନ୍ତୁ ବର୍ତ୍ତମାନ ମୁଁ ଭାବୁଛି ସେମାନେ ୧୫୦ ଟି ଆସନ ପାଇବେ। ଆମେ ପ୍ରତ୍ୟେକ ରାଜ୍ୟରୁ ଖବର ପାଇ ଆସୁଛୁ ଯେ ଆମେ ଆଗକୁ ବଢୁଛୁ। ଉତ୍ତରପ୍ରଦେଶରେ ଆମର ଏକ ଦୃଢ଼ ସହଯୋଗ ଅଛି ଏବଂ ଆମେ ବହୁତ ଭଲ ପ୍ରଦର୍ଶନ କରିବୁ ବୋଲି ସେ କହିଛନ୍ତି। ସେ ପିଏମ ମୋଦୀଙ୍କୁ “ଦୁର୍ନୀତିର ଚାମ୍ପିୟନ” ବୋଲି ମଧ୍ୟ କହିଛନ୍ତି।