ଯିଏ କଂଗ୍ରେସରୁ ଯିବାକୁ ଚାହୁଁଛି, ସେ ଯାଇପାରେ : ସଚ୍ଚିନ ପାଇଲଟ ପ୍ରସଙ୍ଗରେ ମୁହଁ ଖୋଲିଲେ ରାହୁଲ ଗାନ୍ଧି
ନୂଆଦିଲ୍ଲୀ : ସଚ୍ଚିନ ପାଇଟଲ ପ୍ରସଙ୍ଗରେ ମୁହଁ ଖୋଲିଛନ୍ତି ପୂର୍ବତନ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି । ସେ କହିଛନ୍ତି ଯେ ଯେଉଁମାନେ କଂଗ୍ରେସ ଛାଡ଼ିବାକୁ ଚାହୁଁଛନ୍ତି, ସେମାନେ ଛାଡ଼ିପାରନ୍ତି । ଏହା ଦ୍ୱାରା ଦଳକୁ ଯୁବ ନେତାଙ୍କ ଆଗମନର ବାଟ ଫିଟିବ ।
Sambad is now on WhatsApp
Join and get latest news updates delivered to you via WhatsApp
କଂଗ୍ରେସର ଛାତ୍ର ସଂଗଠନ ଏନଏସୟୁଆଇର ଏକ ସମ୍ମିଳନୀରେ ସେ କହିଛନ୍ତି ଯେ ଯେଉଁମାନେ ଯିବାକୁ ଚାହୁଁଛନ୍ତି ସେମାନେ ଦଳ ଛାଡ଼ିପାରନ୍ତି । ଏହା ଦ୍ୱାରା କଂଗ୍ରେସକୁ ଆପଣମାନଙ୍କ ପରି ଯୁବ ନେତାଙ୍କ ଆଗମନ ହେବ । ତେବେ ସେ ସଚ୍ଚିନ ପାଇଲଟଙ୍କ ନାଁ ନେଇ ନଥିଲେ ମଧ୍ୟ ତାଙ୍କର ଏହି ବୟାନକୁ ରାଜସ୍ଥାନ ଘଟଣାକ୍ରମ ସହ ଯୋଡ଼ି ଦେଖାଯାଉଛି ।
ରାଜସ୍ଥାନ ସରକାରକୁ ଭାଙ୍ଗିବାକୁ ସଚ୍ଚିନ ଉଦ୍ୟମ କରୁଥିଲେ ବୋଲି କଂଗ୍ରେସ ପକ୍ଷରୁ କୁହାଯାଇଛି । ଆଜି ମୁଖ୍ୟମନ୍ତ୍ରୀ ଅଶୋକ ଗେହଲୋଟ କହିଥିଲେ ଯେ ସଚ୍ଚିନ ପାଇଲଟ ସରକାର ଭାଙ୍ଗିବା ପାଇଁ ଉଦ୍ୟମ କରୁଥିଲେ । ଏଥିପାଇଁ ସେ ଘୋଡ଼ା ବେପାର ଚଳାଇଥିଲେ । ଏହାର ପ୍ରମାଣ ତାଙ୍କ ପାଖରେ ରହିଛି । ଏହି କାରଣରୁ ବିଧାୟକମାନଙ୍କୁ ଏକ ହୋଟେଲରେ ରଖିବାକୁ ପଡ଼ିଥିଲା ।
ବିଜେପି ଇସାରାରେ ପାଇଲଟ ସରକାର ଭାଙ୍ଗିବାକୁ ଚାହୁଁଥିଲେ ବୋଲି କଂଗ୍ରେସ କହୁଥିବାବେଳେ ସଚିନ ଆଜି ସ୍ପଷ୍ଟ କରିଦେଇଥିଲେ ଯେ ସେ ବିଜେପିରେ ଯୋଗ ଦେଉନାହାନ୍ତି । ଯେଉଁ ଦଳକୁ ହରାଇବାକୁ ସେ ନିର୍ବାଚନ ଲଢିଥିଲେ ସେହି ଦଳରେ ସେ ଯୋଗ ଦେବେ ନାହିଁ ।