ବିଳାସପୁର : ବିଳାସପୁର ଜିଲ୍ଲାପାଳ ଡ. ସାରାଂଶ ସିତ୍ତର ଆଜି ଆପୋଲୋ ହସପିଟାଲ ଯାଇ ସେଠାରେ ଚିକିତ୍ସିତ ହେଉଥିବା ରାହୁଲ ସାହୁର ସ୍ବାସ୍ଥ୍ୟାବସ୍ଥା ପଚାରି ବୁଝିଛନ୍ତି । ରାହୁଲ ଧୀରେ ଧୀରେ ସୁସ୍ଥ ହେଉଥିବା ସେ ପ୍ରକାଶ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗତ ସପ୍ତାହରେ ୧୦ ବର୍ଷର ବାଳକ ରାହୁଲକୁ ୮୦ ଫୁଟ୍ ଗଭୀର ବୋରୱେଲ ଗାତରୁ ଉଦ୍ଧାର କରାଯିବା ପରେ ମୁଖ୍ୟମନ୍ତ୍ରୀ ଭୁପେଶ ବଘେଲଙ୍କ ନିର୍ଦ୍ଦେଶରେ ସ୍ଥାନୀୟ ଆପୋଲୋ ହସ୍ପିଟାଲରେ ତାର ଚିକିତ୍ସା କରାଯାଉଛି । ଇତି ମଧ୍ୟରେ ତାକୁ ଡାକ୍ତରଖାନାରେ ଭର୍ତ୍ତି ହେବାର ପାଞ୍ଚ ଦିନ ବିତିଗଲାଣି ଓ ଧୀରେ ଧୀରେ ତାର ସ୍ବାସ୍ଥ୍ୟାବସ୍ଥାରେ ଦ୍ରୁତ ଉନ୍ନତି ପରିଲକ୍ଷିତ ହେଉଛି । ତାର ସମସ୍ତ ସ୍ୱାସ୍ଥ୍ୟ ସୂଚକାଙ୍କ ସ୍ୱାଭାବିକ ଅବସ୍ଥାକୁ ଫେରି ଆସୁଛି ଓ ସେ ନିଜେ ଉଠି ବସିବା ସହ ତାକୁ ଦେଖିବାକୁ ଆସୁଥିବା ଲୋକମାନଙ୍କୁ ହସି ହାତ ହଲାଉଛି ।
ଏକ ସପ୍ତାହ ମଧ୍ୟରେ ରାହୁଲ ସମ୍ପୂର୍ଣ୍ଣ ସୁସ୍ଥ ହେବେ ବୋଲି ଡାକ୍ତରମାନେ ଆଶା ପ୍ରକଟ କରିଛନ୍ତି । କଲେକ୍ଟର ଡକ୍ଟର ମିତ୍ତର ରାହୁଲଙ୍କ ଶୀଘ୍ର ଆରୋଗ୍ୟ କାମନା କରିଥିଲେ। ରାହୁଲଙ୍କ ମନୋରଞ୍ଜନ ପାଇଁ ପିଲାମାନଙ୍କ କାହାଣୀ ଥିବା ପେଣ୍ଟିଂ ସାମଗ୍ରୀ ଏବଂ ପୁସ୍ତକ ମଧ୍ୟ ସେ ପ୍ରଦାନ କରିଥିଲେ । ଏହି ଅବସରରେ ସେ ରାହୁଲଙ୍କ ମା’ ଏବଂ ପରିବାର ସଦସ୍ୟଙ୍କୁ ଭେଟି ଡାକ୍ତରଖାନାରେ ଦିଆଯାଉଥିବା ସ୍ୱାସ୍ଥ୍ୟ ତଥା ଅନ୍ୟାନ୍ୟ ସୁବିଧା ବିଷୟରେ ପଚାରି ବୁଝିଥିଲେ ଜିଲ୍ଲାପାଳ।