ମହାକୁମ୍ଭରୁ ରାହୁଲ-ପ୍ରିୟଙ୍କାଙ୍କ ଦୂରତା: ଆବଶ୍ୟକତା ନା ବାଧ୍ୟବାଧକତା

ନୂଆଦିଲ୍ଲୀ: ପ୍ରୟାଗରାଜରେ ଅନୁଷ୍ଠିତ ମହାକୁମ୍ଭରେ ୬୬ କୋଟିରୁ ଅଧିକ ଲୋକ ବୁଡ଼ ପକାଇଥିଲେ। ଭାରତର ସମସ୍ତ ରାଜ୍ୟର ଲୋକମାନେ ଏଥିରେ ଉତ୍ସାହର ସହିତ ଅଂଶଗ୍ରହଣ କରିଥିଲେ। ଯେହେତୁ କେନ୍ଦ୍ର ଏବଂ ଉତ୍ତର ପ୍ରଦେଶ ସରକାର ବିଜେପି ଦ୍ୱାରା ପରିଚାଳିତ ହେଉଛି, ଦଳର ସମସ୍ତ ବଡ଼ ବଡ଼ ନେତାମାନେ ମଧ୍ୟ କୁମ୍ଭରେ ବୁଡ଼ ପକାଇବାର ସୁଯୋଗ ହାତଛଡ଼ା କରି ନଥିଲେ।

ଏହିପରି ନେତାମାନଙ୍କ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା, ବିଜେପି ଶାସିତ ରାଜ୍ୟର ସମସ୍ତ ମୁଖ୍ୟମନ୍ତ୍ରୀ ଏବଂ ଦଳର ସମସ୍ତ ବରିଷ୍ଠ ନେତା ସାମିଲ ଥିଲେ। ମହାକୁମ୍ଭରେ କରାଯାଇଥିବା ବ୍ୟବସ୍ଥା ପାଇଁ ସମସ୍ତେ ଯୋଗୀ ସରକାରଙ୍କୁ ପ୍ରଶଂସା କରିଥିଲେ।

ମହାକୁମ୍ଭ ଆୟୋଜନ ସମୟରେ ପ୍ରଶ୍ନ ଉଠିଥିଲା ଯେ, ବିରୋଧୀ ନେତାମାନେ ହିନ୍ଦୁମାନଙ୍କର ଏହି ସବୁଠାରୁ ବଡ଼ ସମାବେଶରେ କାହିଁକି ଅଂଶଗ୍ରହଣ କରୁନାହାନ୍ତି? କିନ୍ତୁ ବିରୋଧୀ ଦଳର ବଡ଼ ନେତାମାନେ ଶେଷ ପର୍ଯ୍ୟନ୍ତ ମହାକୁମ୍ଭଠାରୁ ଦୂରତା ବଜାୟ ରଖିଥିଲେ। ଏହା ମଧ୍ୟ କୁହାଯାଉଥିଲା ଯେ, ମହାକୁମ୍ଭର ଆୟୋଜନ ହିନ୍ଦୁତ୍ୱର ରାଜନୀତିକୁ ମଜବୁତ କରିବ ଏବଂ ବିଜେପି ଏଥିରୁ ଲାଭ ପାଇବ। ଏପରି ପରିସ୍ଥିତିରେ, ପ୍ରଶ୍ନ ଉଠୁଛି ଯେ, ବିରୋଧୀ ନେତାମାନେ ମହାକୁମ୍ଭରେ ଯୋଗ ନ ଦେଇ ଏକ ବଡ଼ ରାଜନୈତିକ କ୍ଷତିକୁ ନିମନ୍ତ୍ରଣ କରିଛନ୍ତି କି ନା ସେମାନେ ଏଥିରେ କିଛି ଲାଭ ଦେଖୁଛନ୍ତି?

ବଡ଼ ବଡ଼ ବିରୋଧୀ ନେତାମାନେ ମହାକୁମ୍ଭକୁ  ଯାଇ ନଥିଲେ। କିନ୍ତୁ ପ୍ରୟାଗରାଜ ଏବଂ ନୂଆଦିଲ୍ଲୀ ରେଳ ଷ୍ଟେସନରେ ଦଳାଚକଟା ଘଟଣାରେ ଏହି ସମସ୍ତ ନେତା ଏକତ୍ରିତ ହୋଇ ମୋଦୀ ସରକାର ଏବଂ ଉତ୍ତର ପ୍ରଦେଶର ଯୋଗୀ ଆଦିତ୍ୟନାଥ ସରକାରଙ୍କୁ ଆକ୍ରମଣ କରିଥିଲେ। ଏହି ଦୁଇଟି ସ୍ଥାନରେ ଦଳାଚକଟାରେ ଅନେକ ଲୋକ ପ୍ରାଣ ହରାଇଥିଲେ। ବିରୋଧୀ ଦଳ କହିଥିଲେ ଯେ, କେନ୍ଦ୍ର ଏବଂ ରାଜ୍ୟ ସରକାର ଭିଡ଼ ନିୟନ୍ତ୍ରଣ ପାଇଁ ଠୋସ୍ ପଦକ୍ଷେପ ନେଇ ନାହାନ୍ତି।

ମହାକୁମ୍ଭ ମେଳା ସମୟରେ ବିରୋଧୀ ନେତାଙ୍କ ବିବାଦୀୟ ବୟାନ ମଧ୍ୟ ବ୍ୟାପକ ଭାବରେ ଆଲୋଚନା ହୋଇଥିଲା। ମହାକୁମ୍ଭ ମେଳାରେ ପରିଚାଳନାଗତ ତ୍ରୁଟିକୁ ନେଇ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ବିଧାନସଭାରେ ଯୋଗୀ ଆଦିତ୍ୟନାଥ ସରକାରଙ୍କ ଉପରେ ଆକ୍ରମଣ କରିଥିଲେ ଏବଂ ଏହି କାର୍ଯ୍ୟକ୍ରମକୁ 'ମୃତ୍ୟୁକୁମ୍ଭ' ବୋଲି କହିଥିଲେ। ଏନେଇ ବିବାଦ ଉପୁଜିବା ପରେ, ସେ କହିଥିଲେ ଯେ, ତାଙ୍କର ମନ୍ତବ୍ୟ ଘଟଣାର ତ୍ରୁଟି ବିଷୟରେ ଥିଲା।

ପୂର୍ବରୁ, କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେଙ୍କ ଏକ ବୟାନକୁ ନେଇ ବିଜେପି ତାଙ୍କ ଉପରେ ଆକ୍ରମଣ କରିଥିଲା। ଖାର୍ଗେ ଏକ ସଭାରେ କହିଥିଲେ, 'ଗଙ୍ଗାରେ ବୁଡ଼ ପକାଇଲେ କ'ଣ ଦେଶର ଦାରିଦ୍ର୍ୟ ଦୂର ହେବ? ଏହା ପେଟ ପୂରଣ ପାଇଁ ଖାଦ୍ୟ ଯୋଗାଇବ କି?' ଏହି ସମୟରେ, ବିହାରର ପୂର୍ବତନ ମୁଖ୍ୟମନ୍ତ୍ରୀ ଏବଂ ରାଷ୍ଟ୍ରୀୟ ଜନତା ଦଳ ମୁଖ୍ୟ ଲାଲୁ ପ୍ରସାଦ ଯାଦବ କୁମ୍ଭକୁ "ଅଯଥା" ଏବଂ ବେକାର କାର୍ଯ୍ୟ ବୋଲି କହିଥିଲେ।

ଏହାର ଜବାବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିକଟରେ ଭାଗଲପୁରରେ ଆୟୋଜିତ ଏକ ସାଧାରଣ ସଭାରେ ଲାଲୁ ପ୍ରସାଦ ଯାଦବଙ୍କ ନାମ ନ ନେଇ ତାଙ୍କ ଉପରେ ଆକ୍ରମଣ କରିଥିଲେ ଏବଂ କହିଥିଲେ ଯେ, ରାମ ମନ୍ଦିର ନେଇ ଅସେନ୍ତୁଷ୍ଟ ଲୋକମାନେ ଏବେ ମହାକୁମ୍ଭକୁ ସମ୍ପର୍କରେ ବିଭ୍ରାନ୍ତି ଜନ ମନ୍ତବ୍ୟ ଦେଉଛନ୍ତି।

କଂଗ୍ରେସ ନେତାମାନଙ୍କ ମଧ୍ୟରେ ହିମାଚଳ ପ୍ରଦେଶ ମୁଖ୍ୟମନ୍ତ୍ରୀ ସୁଖବିନ୍ଦର ସିଂହ ସୁଖୁ, କର୍ଣ୍ଣାଟକ ଉପମୁଖ୍ୟମନ୍ତ୍ରୀ ଡିକେ ଶିବକୁମାର, ସଚିନ ପାଇଲଟ ଏବଂ ଦିଗବିଜୟ ସିଂହ ସଙ୍ଗମରେ ବୁଡ଼ ପକାଇଥିଲେ। ପ୍ରୟାଗରାଜରେ ଏସପି ମୁଖ୍ୟ ଅଖିଳେଶ ଯାଦବ ମଧ୍ୟ ବୁଡ଼ ପକାଇଥିଲେ। କଂଗ୍ରେସ ନେତାମାନେ କହିଥିଲେ ଯେ, ଧର୍ମ ଏବଂ ଆଧ୍ୟାତ୍ମିକତା ବ୍ୟକ୍ତିଗତ ପସନ୍ଦର ବିଷୟ। ଗତ ବର୍ଷ ରାମ ମନ୍ଦିର ନିର୍ମାଣ ସମୟରେ ଦଳ ସମାନ ମତ ଗ୍ରହଣ କରିଥିଲା।

ପୂର୍ବତନ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ୨୦୦୧ ମସିହାରେ କୁମ୍ଭରେ ସ୍ନାନ କରିଥିଲେ। ସେହି ସମୟରେ ସେ ରାଜନୈତିକ ଜୀବନରେ ପ୍ରବେଶ କରିଥିଲେ, ସେ ବିରୋଧୀ ଦଳର ନେତା ଥିଲେ ଏବଂ ତାଙ୍କ ଭାରତୀୟତା ଉପରେ ପ୍ରଶ୍ନ ଉଠାଯାଉଥିଲା। ୨୦୦୭ ମସିହାରେ ସୋନିଆ ଗାନ୍ଧୀ ପୁଣି ଥରେ କୁମ୍ଭ ଯିବାକୁ ଚାହୁଁଥିଲେ, କିନ୍ତୁ କଂଗ୍ରେସ ନେତାମାନେ କହିଥିଲେ ଯେ, ଉତ୍ତର ପ୍ରଦେଶର ତତ୍କାଳୀନ ଏସପି ସରକାର ଆବଶ୍ୟକ ସୁରକ୍ଷା ଯୋଗାଇ ନଥିଲେ ଏବଂ ଏହି କାରଣରୁ ସୋନିଆ କୁମ୍ଭକୁ ଯାଇପାରିଲେ ନାହିଁ।

କିନ୍ତୁ ଏଥର ଗାନ୍ଧୀ ପରିବାର କୁମ୍ଭଠାରୁ ସମ୍ପୂର୍ଣ୍ଣ ଦୂରତା ବଜାୟ ରଖିଥିଲେ। ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ କୁମ୍ଭରେ ବୁଡ଼ ପକାଇପାରନ୍ତି ବୋଲି କଳ୍ପନାଜଳ୍ପନା କରାଯାଉଥିଲା, କିନ୍ତୁ ସେ ଆସି ନଥିଲେ। ଏହା ଆଶ୍ଚର୍ଯ୍ୟଜନକ ଥିଲା କାରଣ ରାହୁଲ ଗାନ୍ଧୀ ଗତ କିଛି ବର୍ଷ ମଧ୍ୟରେ ଅନେକ ଥର ମନ୍ଦିର ପରିଦର୍ଶନ କରିଛନ୍ତି ଏବଂ ସଂସଦରେ ତାଙ୍କ ଭାଷଣରେ ଶିବ ଏବଂ ହିନ୍ଦୁ ଧାର୍ମିକ ଗ୍ରନ୍ଥଗୁଡ଼ିକର ମଧ୍ୟ ଉଲ୍ଲେଖ କରିଛନ୍ତି। ତାଙ୍କ ଭଉଣୀ ତଥା କଂଗ୍ରେସ ମହାସଚିବ ଏବଂ ସାଂସଦ ପ୍ରିୟଙ୍କା ଗାନ୍ଧୀ ଭଦ୍ରା ମଧ୍ୟ ମହାକୁମ୍ଭରେ ଯୋଗ ଦେଇ ନଥିଲେ।

ଅଧିକ ପଢ଼ନ୍ତୁ: ରୁଷିଆ-ଆମେରିକା ଏକଜୁଟ ହୋଇ ବଡ଼ ଘୋଷଣା କଲେ: ୟୁକ୍ରେନକୁ ଝଟକା

ରାହୁଲ-ପ୍ରିୟଙ୍କା ଏବଂ ଲାଲୁ-ମମତାଙ୍କ ଏହି ପଦକ୍ଷେପ ସେମାନଙ୍କୁ କ୍ଷତି ପହଞ୍ଚାଇବ ନା ଲାଭ ଦେବ, ସେ ବିଷୟରେ ରାଜନୈତିକ ବିଶ୍ଳେଷକମାନେ ଦୁଇ ଭାଗରେ ବିଭକ୍ତ ହୋଇଛନ୍ତି। ରାଜନୈତିକ ବିଶେଷଜ୍ଞଙ୍କ ଏକ ଗୋଷ୍ଠୀ କହୁଛନ୍ତି ଯେ, ସଂଖ୍ୟାଗରିଷ୍ଠଙ୍କ ବିଶ୍ୱାସକୁ ସମ୍ମାନ ନ ଦେଇ ଭାରତରେ କ୍ଷମତାର ସୁଖ ପାଇବା ଅସମ୍ଭବ। ଯେତେବେଳେ ଅନ୍ୟ ଗୋଷ୍ଠୀ, ଉତ୍ତର ପ୍ରଦେଶରେ ମୁଲାୟମ ସିଂହ ଯାଦବଙ୍କ ରଣନୀତିର ଉଦାହରଣ ଦେଇ କହିଛନ୍ତି ଯେ, ଯେତେବେଳେ ସଂଖ୍ୟାଗରିଷ୍ଠ ଭୋଟ ବିଭାଜିତ ହୁଏ ସେତେବେଳେ ବିରୋଧୀଙ୍କୁ ଲାଭ ମିଳିଥାଏ।

ଏହା ବ୍ୟତୀତ, ଏହା ମଧ୍ୟ କୁହାଯାଉଛି ଯେ, ଏହି ପଦକ୍ଷେପ ଲାଲୁ ପ୍ରସାଦ ଯାଦବ ଏବଂ ମମତା ବାନାର୍ଜୀଙ୍କ ପାଇଁ ଲାଭଦାୟକ ହେବ। ସେହି ସମୟରେ, କଂଗ୍ରେସ ମଧ୍ୟ ଏହି ଦୂରତାରୁ ଲାଭ ପାଉଥିବା ମନେ ହେଉଛି। କାରଣ ଶୀର୍ଷ ନେତାମାନେ ମଧ୍ୟ ରାମ ମନ୍ଦିର ପ୍ରାଣ ପ୍ରତିଷ୍ଠାରୁ ଦୂରତା ବଜାୟ ରଖିଥିଲେ। ଯାହା ପରେ ବିରୋଧୀ ଦଳ ଲୋକସଭାରେ ବହୁତ ଭଲ ପ୍ରଦର୍ଶନ କରିଥିଲେ। ଏହା ନିଶ୍ଚିତ ଯେ, ବିଜେପି ଏହି ପ୍ରସଙ୍ଗରେ ବିରୋଧୀଙ୍କୁ ଘେରିବ। କିନ୍ତୁ କଂଗ୍ରେସ ପକ୍ଷରୁ ସ୍ପଷ୍ଟୀକରଣ ଦେବା ପାଇଁ ଡିକେ ଶିବକୁମାର, ଅଜୟ ରାୟ, ସଚିନ ପାଇଲଟ, ଦିଗବିଜୟ ସିଂହ ଏବଂ ସୁଖବିନ୍ଦର ସିଂହ ସୁଖୁଙ୍କ ଭଳି ନେତାମାନେ ଅଛନ୍ତି ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। 

ଅଧିକ ପଢ଼ନ୍ତୁ: ଆଇଏଫ୍‌ଏସ୍‌ ସୁରେଶ ପନ୍ତଙ୍କୁ ନୂଆ ଦାୟିତ୍ବ ଦେଲେ ରାଜ୍ୟ ସରକାର