ନୂଆଦିଲ୍ଲୀ: ମଣ୍ଡିର ବିଜେପି ସାଂସଦ ତଥା ଚଳଚ୍ଚିତ୍ର ଅଭିନେତ୍ରୀ କଙ୍ଗନା ରାନାୱତ କଂଗ୍ରେସ ନେତା ରାହୁଲ ଗାନ୍ଧୀଙ୍କ ବିଷୟରେ ବିବାଦୀୟ ମନ୍ତବ୍ୟ ଦେଇଛନ୍ତି। କଙ୍ଗନା କହିଛନ୍ତି ରାହୁଲ ଗାନ୍ଧୀ ସର୍ବଦା ନିଶାରେ ରହିବା ଭଳି ଲାଗୁଛନ୍ତି, ତାଙ୍କା ଡ୍ରଗ୍ସ ପରୀକ୍ଷା କରାଯିବା ଉଚିତ୍। ସେ କହିଛନ୍ତି ରାହୁଲ ଗାନ୍ଧୀ ସବୁବେଳେ ସମ୍ବିଧାନକୁ ଆଘାତ କରୁଛନ୍ତି। ରାହୁଲ ଯେଉଁ ପରିସ୍ଥିତିରେ ସଂସଦରେ ପହଞ୍ଚୁଛନ୍ତି ଏବଂ ଯେଉଁ ପ୍ରକାରର ଯୁକ୍ତି କରୁଛନ୍ତି ତାହା ଦେଖିଲେ ସେ ସର୍ବଦା ନିଶାରେ ରହୁଥିବା ଭଳି ଲାଗୁଛି।
କଙ୍ଗନା ପୂର୍ବରୁ ମଧ୍ୟ ରାହୁଲଙ୍କ ଉପରେ ମନ୍ତବ୍ୟ ଦେଇଛନ୍ତି। ଜୁଲାଇ ୧ ରେ କଙ୍ଗନା ଲୋକସଭାରେ ବିରୋଧୀଦଳ ନେତା ରାହୁଲଙ୍କୁ ଟାର୍ଗେଟ କରିଥିଲେ। କଂଗ୍ରେସ ନେତା ତୁରନ୍ତ କିଛି ଥେରାପି ନେବା ଉଚିତ ବୋଲି ସେ ମତ ଦେଇଥିଲେ। ଅଷ୍ଟାଦଶ ଲୋକସଭାର ପ୍ରଥମ ଅଧିବେଶନରେ ରାଷ୍ଟ୍ରପତିଙ୍କ ଭାଷଣ ଉପରେ ଆଲୋଚନା ବେଳେ କଙ୍ଗନା ରାନାୱତ ରାହୁଲ ଗାନ୍ଧୀଙ୍କ ଭାଷଣକୁ ଦାୟିତ୍ବହୀନ ବୋଲି କହିଥିଲେ।
ଗତ ଦୁଇ ଦିନ ଧରି ରାହୁଲ ଗାନ୍ଧୀ ଲୋକସଭାରେ କେନ୍ଦ୍ର ସରକାରଙ୍କୁ କ୍ରମାଗତ ଭାବରେ ଆକ୍ରମଣ କରିଆସୁଛନ୍ତି। ବଜେଟ୍ ଉପରେ ଆଲୋଚନା ବେଳେ ସେ ବିଜେପିର ନିର୍ବାଚନୀ ଚିହ୍ନକୁ ଚକ୍ରବ୍ୟୁହର ପ୍ରତୀକ ବୋଲି ବର୍ଣ୍ଣନା କରିଥିଲେ। ସେ କହିଥିଲେ ଯେ କେନ୍ଦ୍ର ସରକାର ଏକ ଚକ୍ରବ୍ୟୁହ ସୃଷ୍ଟି କରି ଦେଶର ଲୋକଙ୍କୁ ଘେରିବାକୁ ଚେଷ୍ଟା କରୁଛନ୍ତି। ସେ ତାଙ୍କ ଅଭିଭାଷଣରେ କୃଷକ, ସାଧାରଣ ଜନତା, ଅଗ୍ନିବୀର ଏବଂ ମହିଳାଙ୍କ ପ୍ରସଙ୍ଗ ଉଠାଇଥିଲେ।
BJP MP Kangana Ranaut demands drugs test of LoP Rahul Gandhi.
— News Arena India (@NewsArenaIndia) July 30, 2024
ଅଲିମ୍ପିକ୍ ଉଦଘାଟନୀ ସମାରୋହକୁ କଙ୍ଗନା ମଧ୍ୟ କଡ଼ା ସମାଲୋଚନା କରିଥିଲେ। ସେ ସମାରୋହରେ ଗୋଟିଏ ପ୍ରଦର୍ଶନକୁ ଅତ୍ୟଧିକ ଯୌନଯୁକ୍ତ ବୋଲି ବର୍ଣ୍ଣନା କରିଥିଲେ। କଙ୍ଗନା କହିଥିଲେ ଯେ ଏଭଳି ଅଶ୍ଳୀଳ ପ୍ରଦର୍ଶନ ହେଉଛି ବାମପନ୍ଥୀମାନେ ଅଲିମ୍ପିକ୍ ଗେମ୍କୁ ଅପହରଣ କରିଥିବାର ଫଳାଫଳ।
କଙ୍ଗନା ଗୋଟିଏ ଦିନ ପୂର୍ବରୁ ସୋସିଆଲ ମିଡିଆ ପୋଷ୍ଟରେ ମହରମ ଶୋକର ଏକ ଭିଡିଓ ପୋଷ୍ଟ କରିଥିଲେ। ଏହାକୁ ପୁନଃ ପୋଷ୍ଟ କରି କଙ୍ଗନା ଲେଖିଥିଲେ ଏହା ଅଦ୍ଭୁତ ଏବଂ ଭୟାନକ ଅଟେ। ବଞ୍ଚିବା ପାଇଁ ହିନ୍ଦୁମାନେ ମଧ୍ୟ ଏପରି ତାଲିମ ନେବା ଉଚିତ୍।
ଏହାକୁ ନେଇ ସୋସିଆଲ ମିଡିଆରେ କଙ୍ଗନାଙ୍କୁ ଟ୍ରୋଲ କରାଯାଇଥିଲା। ୟୁଜରମାନେ କଙ୍ଗନାଙ୍କୁ ନେଇ କଠୋର ଏବଂ ତୀକ୍ଷ୍ଣ ମନ୍ତବ୍ୟ ଦେଇଥିଲେ।