ରୁଷ-ୟୁକ୍ରେନ ଯୁଦ୍ଧ ଅଟକାଇଦେଉଛ, ପ୍ରଶ୍ନପତ୍ର ଲିକ୍ ବନ୍ଦ କରିପାରୁନ ? ମୋଦୀଙ୍କୁ ରାହୁଲଙ୍କ ସମାଲୋଚନା

ନୂଆଦିଲ୍ଲୀ: ନିଟ୍ ୟୁଜି ୨୦୨୪ ଓ ୟୁଜିସି ନେଟ୍ ୨୦୨୪ ପରୀକ୍ଷାରେ ଅବ୍ୟବସ୍ଥାକୁ ନେଇ କଂଗ୍ରେସ ନେତା ରାହୁଲ ଗାନ୍ଧୀ କେନ୍ଦ୍ର ସରକାରଙ୍କୁ ସମାଲୋଚନା କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହୁଛନ୍ତି ସେ ଇସ୍ରାଏଲ, ଗାଜା ଓ ରୁଷିଆ-ୟୁକ୍ରେନ ଯୁଦ୍ଧ ଅଟକାଇଦେଇଥିଲେ, କିନ୍ତୁ ପ୍ରଶ୍ନପତ୍ର ଲିକକୁ ରୋକିପାରୁ ନାହାନ୍ତି ।  ଦେଶର ଶିକ୍ଷା ବ୍ୟବସ୍ଥାକୁ ଯୋଜନାବଦ୍ଧ ଭାବେ ଅକ୍ତିଆର କରାଯାଇଛି । ଏହାକୁ ବନ୍ଦ କରିବାକୁ ପଡ଼ିବ। ଏହାକୁ ବଦଳାଇବାକୁ ପଡ଼ିବ ବୋଲି ସେ କହିଛନ୍ତି ।

ରାହୁଲ ଗାନ୍ଧି କହିଛନ୍ତି, ଯେଉଁମାନେ ପ୍ରଶ୍ନପତ୍ର ଲିକ୍ କରିଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ। କାଗଜ ଲିକ୍ ହେବା ପୂର୍ବରୁ ଆମକୁ ସିଷ୍ଟମ ଯାଞ୍ଚ କରିବାକୁ ପଡିବ । ଯୁବପିଢିଙ୍କ ଭବିଷ୍ୟ ସହ ଖେଳ ହୋଇଛି। ନିଟ୍ ପ୍ରଶ୍ନପତ୍ର ଲିକ୍ ହୋଇଛି। ୟୁଜିସି ନେଟ୍ ପେପରରେ ଜାଲିଆତି ହୋଇଛି, ଏସବୁର ତଦନ୍ତ ହେବା ଦରକାର।

ସେହିପରି ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ ୟୁଜିସି-ନେଟ୍ ପରୀକ୍ଷା ବାତିଲ କରିବା ପାଇଁ କେନ୍ଦ୍ର ସରକାରଙ୍କୁ ସମାଲୋଚନା କରି କହିଛନ୍ତି ଯେ ଏହା ଦେଶ ବିରୋଧରେ ଏକ ବଡ଼ ଷଡ଼ଯନ୍ତ୍ର ହୋଇପାରେ। ସେ ଗୁରୁବାର ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ'ରେ ଲେଖିଛନ୍ତି, ଏବେ ବିଶୃଙ୍ଖଳା ଖବର ଆସିବା ପରେ ୟୁଜିସି-ନେଟ୍ ପରୀକ୍ଷାକୁ ମଧ୍ୟ ବାତିଲ କରାଯାଇଛି। ବିଜେପି ଶାସନରେ କାଗଜ ମାଫିଆମାନେ ପ୍ରାୟ ସବୁ ପରୀକ୍ଷାରେ ଜାଲିଆତି କରୁଛନ୍ତି। ଏହା ମଧ୍ୟ ଦେଶ ବିରୋଧରେ ଏକ ବଡ଼ ଷଡ଼ଯନ୍ତ୍ର ହୋଇପାରେ।