ଜାନୁଆରି ୧୪ରୁ ରାହୁଲଙ୍କ ଭାରତ ନ୍ୟାୟ ଯାତ୍ରା: ମଣିପୁରରୁ ଆରମ୍ଭ, ମୁମ୍ବାଇରେ ଶେଷ

ନୂଆଦିଲ୍ଲୀ: ୨୦୨୪ ସାଧାରଣ ନିର୍ବାଚନ ପୂର୍ବରୁ କଂଗ୍ରେସ ନେତା ରାହୁଲ ଗାନ୍ଧି ‘ଭାରତ ନ୍ୟାୟ ଯାତ୍ରା’ ଆରମ୍ଭ କରିବେ। ଆସନ୍ତାବର୍ଷ ଜାନୁଆରି ୧୪ରୁ ଉକ୍ତ ଯାତ୍ରା ଉତ୍ତର ପୂର୍ବାଞ୍ଚଳ ରାଜ୍ୟ ମଣିପୁରରୁ ଆରମ୍ଭ ହୋଇ ମାର୍ଚ୍ଚ ୨୦ରେ ମୁମ୍ବାଇରେ ଶେଷ ହେବ। ୬୭ ଦିନର ଏହି ଯାତ୍ରାରେ ରାହୁଲ ଦେଶର ୧୪ଟି ରାଜ୍ୟର ୮୫ଟି ଜିଲ୍ଲା ଅନ୍ତର୍ଗତ ୬୨୦୦ କିମି ଯାତ୍ରା କରିବେ।

ଏ ସଂପର୍କରେ ସୂଚନା ଦେଇ କଂଗ୍ରେସର ସାଧାରଣ ସଂପାଦକ କେସି ବେଣୁଗୋପାଳ କହିଛନ୍ତି, ଭାରତ ଯୋଡ଼ୋ ଯାତ୍ରାର ବିପୁଳ ଅଭିଜ୍ଞତା ପରେ ରାହୁଲ ଏହି ଯାତ୍ରା ଆରମ୍ଭ କରୁଛନ୍ତି। ଏହି ସମୟରେ ରାହୁଲ ଓ ଦଳୀୟ ନେତାମାନେ ଦେଶର ଯୁବକ, ମହିଳା ଏବଂ ଅବହେଳିତ ବର୍ଗର ଲୋକଙ୍କ ସହିତ ଆଲୋଚନା କରିବେ। କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେ ଏହି ଯାତ୍ରାକୁ ପତାକା ଦେଖାଇ ଉଦ୍‌ଘାଟନ କରିବେ। ତେବେ ଯାତ୍ରାରେ ଅଧିକାଂଶ ଦୂରତା ରାହୁଲ ବସ୍‌ରେ ଯିବେ ଏବଂ ଅଳ୍ପ ଦୂରତା ପାଦରେ ଚାଲିବେ। ରାହୁଲଙ୍କ ଉକ୍ତ ଯାତ୍ରା ୧୪ଟି ରାଜ୍ୟ ଯଥା ମଣିପୁର, ନାଗାଲାଣ୍ଡ, ଆସାମ, ମେଘାଳୟ, ପଶ୍ଚିମବଙ୍ଗ, ବିହାର, ଝାଡ଼ଖଣ୍ଡ, ଓଡ଼ିଶା, ଛତିଶଗଡ଼, ଉତ୍ତରପ୍ରଦେଶ, ମଧ୍ୟପ୍ରଦେଶ, ରାଜସ୍ଥାନ, ଗୁଜରାଟ ଏବଂ ମହାରାଷ୍ଟ୍ର ରାଜ୍ୟ ଦେଇ ସଂପାଦିତ ହେବ। ଯେଉଁସବୁ ରାଜ୍ୟ ଦେଇ ଏହି ଯାତ୍ରା ଯିବ ସେଥିରୁ କେତେକ ରାଜ୍ୟରେ ଇଣ୍ଟିଆ ମେଣ୍ଟ କ୍ଷମତାରେ ଅଛି।

ମଣିପୁରରୁ ଉକ୍ତ ଯାତ୍ରା ଆରମ୍ଭ ସଂପର୍କରେ ପ୍ରଶ୍ନ ହେବାରୁ ବେଣୁଗୋପାଳ କହିଥିଲେ ଏହା ଭାରତର ଏକ ଅବିଚ୍ଛେଦ୍ୟ ଅଂଶ। ଏଥିସହିତ ଏହି ରାଜ୍ୟରେ ଲୋକଙ୍କ କ୍ଷତ ଉପଶମ ଲକ୍ଷ୍ୟ ଦଳ ରଖିଛି। ଉଲ୍ଲେଖଯୋଗ୍ୟ, ମଣିପୁରରେ କୁକି ଓ ମୈତେୟୀ ସଂପ୍ରଦାୟରେ ଚଳିତବର୍ଷ ଭୟଙ୍କର ହିଂସା ହୋଇ ୨୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଛି। ମେ’ ୩ରୁ ହିଂସା ଆରମ୍ଭ ହେବା ଦିନଠାରୁ ଏଠାରେ ପାଖାପାଖି ୬୦ ହଜାର ଲୋକ ‌ବିସ୍ଥାପିତ ହୋଇଛନ୍ତି। ଭାରତ ଯୋଡ଼ୋ ଯାତ୍ରା ସମୟରେ ରାହୁଲ ଅର୍ଥନୈତିକ ‌ବୈଷମ୍ୟ, ଧ୍ରୁବୀକରଣ ଏବଂ ଏକଛତ୍ରବାଦ ସଂପର୍କରେ ଲୋକଙ୍କୁ ସୂଚନା ଦେଇଥିଲେ। ଭାରତ ନ୍ୟାୟ ଯାତ୍ରା ସମୟରେ ଦେଶର ଲୋକଙ୍କ ପାଇଁ ସାମାଜିକ, ଅର୍ଥନୈତିକ ଓ ରାଜନୈତିକ ନ୍ୟାୟ ଉପରେ ଆଲୋକପାତ କରିବେ। ସାଧାରଣ ନିର୍ବାଚନ ପୂର୍ବରୁ କଂଗ୍ରେସ ଏବଂ ବିରୋଧୀ ଇଣ୍ଡିଆ ମେଣ୍ଟକୁ ଏହା ବଳ ଯୋଗାଇବ ବୋଲି ଆଶା ରଖାଯାଇଛି। କଂଗ୍ରେସ ନେତା ରାହୁଲ ଗାନ୍ଧି ୨୦୨୨ ସେପ୍ଟେମ୍ବର ୭ରୁ ୨୦୨୩ ଜାନୁଆରି ୩୦ ପର୍ଯ୍ୟନ୍ତ କଂଗ୍ରେସ ଯୋଡ଼ୋ ଯାତ୍ରା କରିଥିଲେ। ଏହା କନ୍ୟାକୁମାରୀରୁ ଆରମ୍ଭ ହୋଇ କଶ୍ମୀରରେ ଉଦ୍‌ଯାପିତ ହୋଇଥିଲା। ୧୨ଟି ରାଜ୍ୟ ଓ ୨ଟି କେନ୍ଦ୍ର ଶାସିତ ଅଞ୍ଚଳର ୭୫ଟି ଜିଲ୍ଲା ଏବଂ ୭୬ଟି ଲୋକସଭା ଆସନ ଦେଇ ଏହି ଯାତ୍ରା ଯାଇଥିଲା।