ଗପ ଭାବିଲେ ବି ସତ: ଆପଣଙ୍କ ଯାତ୍ରା ପାଇଁ ପ୍ରକୃତ ଭଡ଼ାର ଅଧା ଦେଇଥାନ୍ତି ସରକାର !

ନୂଆଦିଲ୍ଲୀ: ଅନେକ ସମୟରେ ଦାବି ଉଠିଥାଏ ଯେ ସରକାର ରେଳ ଭଡା କମାଇବା ଆବଶ୍ୟକ | ତେବେ ଆପଣ ଜାଣିଛନ୍ତି କି ଆପଣଙ୍କ ଟ୍ରେନ ଭଡ଼ାର ଅଧା ସରକାର ହିଁ  ବହନ କରିଥାନ୍ତି | ଆଜି ଆମେ ଆପଣଙ୍କୁ ଭାରତୀୟ ରେଳର ଟିକେଟକୁ ନେଇ ଏକ ପ୍ରମୁଖ ସୂଚନା ଦେବାକୁ ଯାଉଛୁ, ଯାହା ବାବଦରେ ଆପଣ ହୁଏତ ପୂର୍ବରୁ ଜାଣି ନଥିବେ | ପ୍ରତିଦିନ ଲକ୍ଷ ଲକ୍ଷ ଲୋକ ଟ୍ରେନରେ ଯାତ୍ରା କରନ୍ତି | ଅଧିକାଂଶ ଲୋକ ଦୂର ଦୂରାନ୍ତର ଯାତ୍ରା ପାଇଁ ଟ୍ରେନ୍ ଯାତ୍ରାକୁ ଚୟନ କରନ୍ତି | ବିମାନ ତୁଳନାରେ ଟ୍ରେନ୍ ଯାତ୍ରା ଶସ୍ତା ହୋଇଥିବାବେଳେ ବହୁତ କମ ଲୋକ ଜାଣିଛନ୍ତି ଯେ ଟ୍ରେନରେ ଯାତ୍ରା କରିବା ସମୟରେ ହେଉଥିବା ଖର୍ଚ୍ଚର ଅଧାରୁ ଅଧିକ ରେଳବାଇ ନିଜେ ବହନ କରିଥାଏ | ଅନେକ ଲୋକ ଭାବନ୍ତି ଯେ ରେଳବାଇ କେବଳ ଯାତ୍ରୀଙ୍କଠାରୁ ରୋଜଗାର କରେ, କିନ୍ତୁ ତାହା ନୁହେଁ |

ରେଳବାଇ ନିଜେ ଯାତ୍ରୀମାନଙ୍କ ଯାତ୍ରା ଖର୍ଚ୍ଚର ଏକ ପ୍ରମୁଖ ଅଂଶ ବହନ କରେ | ବାସ୍ତବରେ ଟ୍ରେନ୍ ଯାତ୍ରା ମୂଲ୍ୟର ପ୍ରାୟ ଅଧା ଅଂଶ ରେଳ ମନ୍ତ୍ରଣାଳୟ ସବସିଡି ଆକାରରେ ଦେଇଥାଏ | ଯେତେବେଳେ ଆପଣ ଏକ ଟ୍ରେନ୍ ଟିକେଟ୍ ବୁକ୍ କରନ୍ତି, ଏଥିରେ ଲେଖାଯାଇଥାଏ ଯେ 'IR recovers only 57% of cost on an average | ଯାହାର ଅର୍ଥ ହେଉଛି ରେଳବାଇ ଆପଣଙ୍କ ଯାତ୍ରା ସମୟରେ ହୋଇଥିବା ଖର୍ଚ୍ଚର ମାତ୍ର ୫୭% ଆଦାୟ କରିଥାଏ | ଅର୍ଥାତ ଆପଣଙ୍କର ରେଳ ଯାତ୍ରା ଖର୍ଚ୍ଚର ୪୩ ପ୍ରତିଶତ ରେଳବାଇ ନିଜେ ବହନ କରିଥାଏ | ବାସ୍ତବରେ ରେଳବାଇ ଯାତ୍ରା ଖର୍ଚ୍ଚର ୪୫ ରୁ ୫୫ ପ୍ରତିଶତ ବହନ କରେ | ଏହି ଅନୁଯାୟୀ, ଯଦି ରେଳବାଇ ୫୫% ସବସିଡି ଦେଇଥାଏ ଏବଂ ସେହି ରେଳ ମାର୍ଗରେ ଯାତ୍ରା ପାଇଁ ୨୨୨୨ ଟଙ୍କା ଭଡା ହେବା କଥା, ତେବେ ସବସିଡି ପରେ ଆପଣ ୧୦୦୦ ଟଙ୍କାରେ ଟିକେଟ୍ କିଣି ଯାତ୍ରା କରିପାରନ୍ତି |