କୁନି ପୁଅ ଓଠରେ ଫେରିଲା ହସ, ଖେଳନା ଟ୍ରକ ଫେରାଇବାକୁ ଲାଗିପଡ଼ିଲେ ରେଳ କର୍ମଚାରୀ

ନୂଆଦିଲ୍ଲୀ: କୁନି ପିଲାମାନଙ୍କ ନିରୀହତା ଓ ମିଠା ହସକୁ ସମସ୍ତେ ଭଲ ପାଆନ୍ତି | ବିଶେଷ କରି କୁନି ଛୁଆଙ୍କ ଖିଲିଖିଲି ହସ ପ୍ରତି ସମସ୍ତେ ଆକର୍ଷିତ ହୋଇଯାଇଥାନ୍ତି | ଆଉ କୁନି ପିଲାମାନେ ଖେଳନାକୁ ବହୁତ ଭଲ ପାଆନ୍ତି | ଆଜି ଆମେ ଆପଣଙ୍କୁ ଏମିତି ଏକ ଖବର ବାବଦରେ କହିବୁ | ନିକଟରେ ଏପରି ଏକ ଘଟଣା ସାମ୍ନାକୁ ଆସିଥିଲା। ଯେତେବେଳେ ରେଳ କର୍ମଚାରୀମାନେ ଶିଶୁର ହଜିଯାଇଥିବା ଖେଳନାକୁ ପହଞ୍ଚାଇବା ପାଇଁ ଲାଗିପଡ଼ିଥିଲେ | ମିଳିଥିବା ସୂଚନା ମୁତାବକ ଜାନୁଆରୀ ୪ରେ ରେଳ ହେଲ୍ପଲାଇନ ନମ୍ବର ୧୩୯କୁ ଜଣେ ବ୍ୟକ୍ତି ଫୋନ କରି କହିଥିଲେ ଯେ, 'ସେ ସିକନ୍ଦରାବାଦ-ଅଗରତାଲା ସ୍ପେଶାଲ ଟ୍ରେନ୍ (୦୭୦୩୦) ର ବି-୨ କୋଚରେ ଯାତ୍ରା କରୁଛନ୍ତି। ଏଭଳି ପରିସ୍ଥିତିରେ ଜଣେ ପୁରୁଷ ଏବଂ ଜଣେ ମହିଳା ସେହି କୋଚରେ ନିଜ କୁନି ପୁଅ ସହ ଯାତ୍ରା କରୁଥିଲେ | ପିଲା ପାଖରେ ଖେଳନା ଟ୍ରକଟିଏ ଥିଲା କିନ୍ତୁ ଟ୍ରେନରୁ ଓହ୍ଲାଇବାବେଳେ ସେମାନେ ଖେଳନା ନେବାକୁ ଭୁଲି ଯାଇଥିଲେ। ମୁଁ ଦେଖିଥିଲି ଯେ କୁନି ଛୁଆଟି ଖେଳନାକୁ ବହୁତ ଭଲ ପାଉଥିଲା | ଟ୍ରେନ ଯାତ୍ରା ସମୟରେ ସେହି ଖେଳନା ହିଁ ତାହାର ସବୁକିଛି ଥିଲା | ବ୍ୟକ୍ତି ଜଣକ ଅଧିକାରୀମାନଙ୍କୁ ଅନୁରୋଧ କରିଥିଲେ ଯେ ସେମାନେ ଶିଶୁକୁ ଖେଳନା ଫେରାଇବାରେ ସାହାଯ୍ୟ କରିପାରିବେ କି?

ସୂଚନା ଦେଇଥିବା ବ୍ୟକ୍ତି ଜଣକ ଶିଶୁର ପିତାମାତାଙ୍କୁ ଜାଣି ନଥିଲେ ଏବଂ ସେମାନଙ୍କ ସହ ଯୋଗାଯୋଗ କରିବାର କୌଣସି ବାଟ ନଥିଲା। ତେଣୁ ଅଧିକାରୀମାନେ ଟ୍ରେନର ଲାଇଭ୍ ଅବସ୍ଥାନ ଅନୁସନ୍ଧାନ କରି ନ୍ୟୁ ଜଲପାଇଗୁଡି ଷ୍ଟେସନରେ ସୂଚନାଦାତାଙ୍କଠାରୁ ଖେଳନା ନେଇଥିଲେ। ଅଧିକାରୀମାନେ କହିଛନ୍ତି ଯେ ସିକନ୍ଦରାବାଦ ରେଳ ଷ୍ଟେସନରୁ ଟିକେଟ କିଣାଯାଇଥିବାରୁ ପରିବାରର ଠିକଣା ଜାଣିବା କଷ୍ଟକର ହୋଇପଡ଼ିଥିଲା। ଏଭଳି ପରିସ୍ଥିତିରେ ରିଜର୍ଭେସନ ଫର୍ମ ଖୋଜିବା ପାଇଁ ଅଧିକାରୀମାନେ ଏକ ଦଳକୁ ଦାୟିତ୍ୱ ଦେଇଥିଲେ। ବହୁ ପରିଶ୍ରମ ପରେ ଉକ୍ତ ପରିବାରର ଫୋନ ନମ୍ବର ମିଳିଥିଲା। ସଂରକ୍ଷଣ ଚାର୍ଟରୁ ଶିଶୁର ପିତାମାତାଙ୍କ ନାମ ଯାଞ୍ଚ କରାଯାଇଥିଲା। ଶିଶୁର ପିତାଙ୍କ ନାମ ମୋହିତ ରଜା ବୋଲି ଜଣାପଡିଥିଲା | ଏହି ପରିବାର ଆଲୁବାରୀ ରେଳ ଷ୍ଟେସନଠାରୁ ପ୍ରାୟ ୨୦ କିଲୋମିଟର ଦୂରରେ ଥିବା ଉତ୍ତର ଦିନାଜପୁର ଜିଲ୍ଲାର କାଜୀ ଗ୍ରାମରେ ରହୁଥିବାର କହିଥିଲେ। ପରିବାରର ସୂଚନା ପାଇବା ପରେ ଏକ ଟିମ ସେମାନଙ୍କ ଘରେ ପହଞ୍ଚି ହଜିଯାଇଥିବା ଖେଳନାକୁ ପିଲାକୁ ଫେରାଇ ଦେଇଥିଲେ। ଏହା ପରେ ପରିବାର ଲୋକ ରେଳ ଅଧିକାରୀଙ୍କୁ ଧନ୍ୟବାଦ ଦେଇଥିଲେ।