ଏଣିକି ଘରଠାରୁ ୩୦୦ କିଲୋମିଟର ଦୂରତା ଭିତରେ ପରୀକ୍ଷା ଦେବେ ରେଳ ବିଭାଗରେ ଚାକିରି ଆଶାୟୀ ପ୍ରାର୍ଥୀ
ଗୁଗୁଲ୍ ମ୍ୟାପ୍ ବ୍ୟବହାର କରି ପରୀକ୍ଷା କେନ୍ଦ୍ର ଚୟନ କରିବ ଭାରତୀୟ ରେଳ ବିଭାଗ
ନୂଆଦିଲ୍ଲୀ: ଭାରତୀୟ ରେଳର କୌଣସି ପଦବି ଲାଗି ପରୀକ୍ଷା ଦେବାକୁ ଥିବା ପ୍ରାର୍ଥୀଙ୍କ ପାଇଁ ବଡ଼ ଖବର । ଏଣିକି ଘରଠାରୁ ୩୦୦ କିଲୋମିଟର ଦୂରତା ଭିତରେ ପରୀକ୍ଷା ଦେବେ ପରୀକ୍ଷାର୍ଥୀ । ଯାହାଦ୍ବାରା ପ୍ରାର୍ଥୀଙ୍କ ସମୟ ଓ ଖର୍ଚ୍ଚ ବଞ୍ଚିଯିବ। ଭାରତୀୟ ରେଳ ବିଭାଗ ନେଇଛି ଏଭଳି ଏକ ଗୁରୁତ୍ବପୂର୍ଣ୍ଣ ନିଷ୍ପତ୍ତି।
Sambad is now on WhatsApp
Join and get latest news updates delivered to you via WhatsApp
ରେଲୱେ ରିକ୍ରୁଟମେଣ୍ଟ୍ ବୋର୍ଡ (ଆରଆରବି) ପରିଚାଳିତ ପରୀକ୍ଷାର ପ୍ରାର୍ଥୀମାନେ ଅଭିଯୋଗ କରିଛନ୍ତି ଯେ ସେମାନଙ୍କ ଘରଠାରୁ ଅନେକ ଦୂରରେ ପରୀକ୍ଷା କେନ୍ଦ୍ର ଦିଆଯାଉଛି । ଯାହାଫଳରେ ସେମାନଙ୍କୁ ଦୂରଯାତ୍ରା କରିବାକୁ ପଡ଼ୁଛି, ଖାଦ୍ୟ-ପାନୀୟ ପାଇଁ ଅତିରିକ୍ତ ଅର୍ଥ ମଧ୍ୟ ଖର୍ଚ୍ଚ କରିବାକୁ ପଡ଼ୁଛି ।
ରେଳବାଇର ଜଣେ ବରିଷ୍ଠ ଅଧିକାରୀଙ୍କ ଅନୁଯାୟୀ, ପ୍ରତ୍ୟେକ ପ୍ରାର୍ଥୀଙ୍କ ଦ୍ବାରା ଦିଆଯାଇଥିବା ପିନ୍ କୋଡ୍ ଠିକଣା ସହିତ ଗୁଗୁଲ୍ ମ୍ୟାପ୍ ମାଧ୍ୟମରେ ସେମାନଙ୍କ ଘରଠାରୁ ୩୦୦ କିଲୋମିଟର ଦୂରତା ମଧ୍ୟରେ ଥିବା ପରୀକ୍ଷା କେନ୍ଦ୍ର ରହିବ । ଏହା ସହିତ ବସ୍ ଏବଂ ଟ୍ରେନ୍ ଭଳି ବିଭିନ୍ନ ପ୍ରକାରର ପରିବହନ ମାଧ୍ୟମରେ ପରୀକ୍ଷା କେନ୍ଦ୍ରକୁ ଟ୍ରାଫିକ୍ ସୁବିଧା ରହିବା ଉପରେ ଗୁତୁତ୍ବ ଦିଆଯିବ । ରେଳବାଇର ଏହି ନୂଆ ପ୍ରକ୍ରିୟା ଜୁଲାଇ ୩୦ରେ ହେବାକୁ ଥିବା ଲେବୁଲ୍ -୬ ଏବଂ କମ୍ପ୍ୟୁଟର ଆଧାରିତ ଲେବୁଲ୍-୪ ପରୀକ୍ଷଣରେ କାର୍ଯ୍ୟକାରୀ ହେବ । ଏହି ପରୀକ୍ଷାରେ ୭,୦୨୬ ପଦବି ପାଇଁ ୯୦ଟି କେନ୍ଦ୍ରରେ ପରୀକ୍ଷା ଅନୁଷ୍ଠିତ ହେବ ଯେଉଁଥିରେ ପ୍ରାୟ ୬୦ ହଜାର ପ୍ରାର୍ଥୀ ପରୀକ୍ଷା ଦେବେ ।
ରେଳବାଇ ଅନୁଯାୟୀ, ବର୍ତ୍ତମାନ ସୁଦ୍ଧା ଆମେ ୯୯ ପ୍ରତିଶତ ପ୍ରାର୍ଥୀଙ୍କୁ ୩୦୦ କିଲୋମିଟର ବ୍ୟାସାର୍ଦ୍ଧରେ ପରୀକ୍ଷା କେନ୍ଦ୍ର ଯୋଗାଇବାରେ ସକ୍ଷମ ହୋଇଥିବା ବେଳେ ଶତପ୍ରତିଶତ ମହିଳା ପ୍ରାର୍ଥୀ ୪୦୦ କିଲୋମିଟର ଦୂରତା ମଧ୍ୟରେ ପରୀକ୍ଷା କେନ୍ଦ୍ରରେ ସ୍ଥାନ ପାଇଛନ୍ତି । ଆରଆରବି ଦ୍ବାରା ଅନ୍ତିମ ପର୍ଯ୍ୟାୟ ପରୀକ୍ଷା ପାଇଁ ପରୀକ୍ଷା କେନ୍ଦ୍ର ତାଲିକା ପ୍ରକାଶ ପାଇବା ପରେ ଅଧିକାଂଶ ପ୍ରାର୍ଥୀ ଟ୍ୱିଟରକୁ ଯାଇ ସେମାନଙ୍କୁ ଦିଆଯାଇଥିବା ପରୀକ୍ଷା କେନ୍ଦ୍ରଗୁଡ଼ିକ ବିଷୟରେ ଚିନ୍ତା ପ୍ରକଟ କରିଥିଲେ । କୋଲକାତାର ଜଣେ ଟ୍ୱିଟର ବ୍ୟବହାରକାରୀ କହିଛନ୍ତି ଯେ ତାଙ୍କୁ କର୍ଣ୍ଣାଟକରେ ପରୀକ୍ଷା କେନ୍ଦ୍ର ଦିଆଯାଇଥିବାବେଳେ ବେଙ୍ଗାଲୁରୁର ଜଣେ ପ୍ରାର୍ଥୀ କହିଛନ୍ତି ଯେ ତାଙ୍କୁ ୧,୯୦୦ କିଲୋମିଟର ଦୂରରେ ଥିବା ରାଞ୍ଚିରେ ପରୀକ୍ଷା କେନ୍ଦ୍ର ଦିଆଯାଇଛି । ଏଥି ସହିତ, ଅଧିକାରୀମାନେ କହିଛନ୍ତି ଯେ ଉତ୍ତର ପୂର୍ବାଞ୍ଚଳର ପ୍ରାର୍ଥୀମାନେ ୩୦୦ କିଲୋମିଟର ବ୍ୟାସାର୍ଦ୍ଧରେ ରଖିବା କଷ୍ଟକର ହୋଇଥାଏ କାରଣ ସେଠାରେ ଅଳ୍ପ ପରୀକ୍ଷା କେନ୍ଦ୍ର ଅଛି।