ମୁମ୍ବାଇ: ବାହାରେ ପ୍ରବଳ ବର୍ଷା, କେତେବେଳେ କେଉଁ ମୁହୂର୍ତ୍ତରେ ବର୍ଷା ଢାଳୁଛି କିଛି ବି କହି ହେଉନି । ଲଗାଣ ବର୍ଷା ପାଇଁ ବେହାଲ ହେଉଛି ସ୍ଥିତି । ଥରେ ବର୍ଷା ଆରମ୍ଭ ହେଲେ ଛାଡିବାର ନାଁ ନେଉନି । ବର୍ଷା ପାଇଁ ସହରରେ ସୃଷ୍ଟି ହେଉଛି ଜଳବନ୍ଦୀ ପରିସ୍ଥିତି । ଲୋକେ ପାଣିରେ ଫସି ରହୁଛନ୍ତି । ଜୀବନ ଜଳବନ୍ଦୀ ହେଉଛି । ଘରୁ ବାହାରକୁ ବାହାରିଥିବା ଲୋକଟେ ଆଉ ଘରେ ପହଞ୍ଚି ପାରୁନି । ରାସ୍ତାରେ ବୁଡୁଛି ବାଇକ୍, ଭାସୁଛି କାର୍ । ନଈ ପାଲଟୁଛି ରାସ୍ତା । ଆଉ ଏତିକି ବେଳେ ଏସବୁ ସମସ୍ୟାର ସମାଧାନ ପାଇଁ ସାଧାରଣ ଲୋକଙ୍କ ପାଇଁ ପୋଲିସ ଜାରି କରିଛି ପରାମର୍ଶ । 

Advertisment

ଗତ ଦୁଇ ଦିନ ହେବ ବର୍ଷାରେ ବେହାଲ ହୋଇଥିବା ମୁମ୍ବାଇ ପାଇଁ  ଆଗାମୀ ଦୁଇ ଦିନ ପ୍ରବଳ ବର୍ଷାର ଆଲର୍ଟ ଜାରି କରାଯାଇଥିବା ବେଳେ ଏହାକୁ ଦୃଷ୍ଟିରେ ରଖି ପୋଲିସ ପରାମର୍ଶ ଦେଇଛି । ଏକ ଟୁଇଟ୍ କରି ପୋଲିସ ଲୋକଙ୍କୁ ବର୍ଷା ବେଳେ ଘରେ ରହିବାକୁ ପରାମର୍ଶ ଦେଇଛି । ଅତି ଆବଶ୍ୟକ ନଥିଲେ ଘରୁ ନବାହାରିବାକୁ କୁହାଯାଇଛି । ମୁମ୍ବାଇ ପାଇଁ ପ୍ରବଳରୁ ଅତି ପ୍ରବଳ ବର୍ଷା ନେଇ ଆଲର୍ଟ ଜାରି ହୋଇଥିବା ବେଳେ ବର୍ଷା ସମୟରେ ଆବଶ୍ୟକ ନଥିଲେ ଘରୁ ନବାହାରିବାକୁ ପରାମର୍ଶ ଜାରି କରିଛି ପୋଲିସ । ଏଥିସହ ସମୁଦ୍ର କୂଳ ଅଞ୍ଚଳ ବୁଲାବୁଲି ନକରିବା ପାଇଁ ବି ପରାମର୍ଶ ଜାରି କରାଯାଇଛି । ପୋଲିସ ସବୁ ପରିସ୍ଥିତିର ମୁକାବିଲା ପାଇଁ ସତର୍କ ରହିଛି । କୌଣସି ବି ପରିସ୍ଥିତିର ସାମ୍ନା କରୁଥିଲେ ଲୋକଙ୍କୁ ପୋଲି, ୧୦୦ରେ ଫୋନ୍ କରିବାକୁ କହିଛି । ମୁମ୍ବାଇ, ନଭି ମୁମ୍ବାଇ, ଥାନେ ଆଦି ଅନେକ ଅଞ୍ଚଳ ପାଇଁ ଅରେଞ୍ଜ ଆଲର୍ଟ ଜାରି ହୋଇଛି । ଲଗାଣ ବର୍ଷା ହେଲେ ସ୍ଥିତି ସାଙ୍ଘାତିକ ହେଉଥିବାରୁ ପୋଲିସ ଆଗୁଆ ସତର୍କ କରାଇଛି ।