ବିରୋଧୀଙ୍କୁ ମୋଦୀଙ୍କ ପରାମର୍ଶ: ପାକିସ୍ତାନରେ ସଂଖ୍ୟାଲଘୁଙ୍କ ଉପରେ ହେଉଥିବା ଅତ୍ୟାଚାର କଥା ବିଶ୍ୱକୁ ଜଣାଅ
ଟୁମକୁରୁ (କର୍ଣ୍ଣାଟକ) : ନାଗରିକତା (ସଂଶୋଧନ) ଆଇନକୁ ବିରୋଧ କରି ଆନ୍ଦୋଳନ କରୁଥିବା ଲୋକମାନଙ୍କୁ ସମାଲୋଚନା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ସେ କହିଛନ୍ତି ଯେ ଦେଶରେ ଚାଲିଥିବା ଏସବୁ ଆନ୍ଦୋଳନ ଭାରତୀୟ ସଂସଦ ବିରୋଧରେ କରାଯାଉଛି ।
ଯେଉଁମାନେ ବିରୋଧ କରୁଛନ୍ତି ସେମାନେ ଗତ ୭୦ ବର୍ଷ ହେଲା ପାକିସ୍ତାନରେ ସଂଖ୍ୟାଲଘୁଙ୍କ ଉପରେ ହେଉଥିବା ଅତ୍ୟାଚାର ବିରୋଧରେ ସ୍ୱର ଉତ୍ତୋଳନ କରିବା ଆବଶ୍ୟକ । ଯଦି ସେମାନଙ୍କର ସତସାହସ ଅଛି ସେମାନେ ପାକିସ୍ତାନର ଅତ୍ୟାଚାର କଥା ବିଶ୍ୱ ସମ୍ମୁଖରେ ଉଜାଗର କରନ୍ତୁ । ସେ କହିଛନ୍ତି ଯେ ପାକିସ୍ତାନ ଧର୍ମଭିତ୍ତିରେ ପ୍ରତିଷ୍ଠା ହୋଇଥିଲା । ଦେଶବିଭାଜନଠାରୁ ଆଜି ପର୍ଯ୍ୟନ୍ତ ପାକିସ୍ତାନରେ ହିନ୍ଦୁ, ଶିଖ,ଖ୍ରୀଷ୍ଟିଆନ, ପାର୍ସିମାନଙ୍କ ଉପରେ ଅତ୍ୟାଚାର ହୋଇଆସୁଛି ।
Sambad is now on WhatsApp
Join and get latest news updates delivered to you via WhatsApp
କର୍ଣ୍ଣାଟକର ସିଦ୍ଧଗଙ୍ଗା ମଠ ନିକଟରେ ଅନୁଷ୍ଠିତ ଏକ ଜନସଭାରେ ସେ କହିଛନ୍ତି ଯେ ଯେଉଁମାନେ ସ୍ଲୋଗାନ ଦେବାକୁ ଚାହୁଁଛନ୍ତି ସେମାନେ ପାକିସ୍ତାନରୁ ଆସୁଥିବା ସଂଖ୍ୟାଲଘୁ, ଦଳିତଙ୍କ ସପକ୍ଷରେ ସ୍ଲୋଗାନ ଦିଅନ୍ତୁ । ମୋଦୀ ଏହି ଅବସରରେ ସିଦ୍ଧଗଙ୍ଗା ମଠ ନିକଟରେ ଥିବା ଲିଙ୍ଗାୟତ ଗୁରୁ ଶିବକୁମାର ସ୍ୱାମୀଙ୍କ ସମାଧିପୀଠରେ ପହଞ୍ଚି ତାଙ୍କୁ ଶ୍ରଦ୍ଧାଞ୍ଜଳି ଦେଇଥିଲେ ।
ସୂଚନାଯୋଗ୍ୟ ଯେ ନାଗରିକତା (ସଂଶୋଧନ) ଆଇନରେ ଥିବା ବ୍ୟବସ୍ଥା ଅନୁସାରେ ପାକିସ୍ତାନ, ଆଫଗାନିସ୍ତାନ ଓ ବାଂଲାଦେଶରେ ଧର୍ମୀୟ ହିଂସାର ସମ୍ମୁଖୀନ ହେଉଥିବା ହିନ୍ଦୁ, ବୌଦ୍ଧ, ଶିଖ, ଖ୍ରୀଷ୍ଟିଆନ ଓ ପାର୍ସୀ ଆଦି ସଂପ୍ରଦାୟର ଶରଣାର୍ଥୀମାନଙ୍କୁ ଭାରତରେ ନାଗରିକତା ଦିଆଯିବ । ତେବେ ମୁସଲମାନ ମାନଙ୍କୁ ଏହି ବିଲ୍ ମାଧ୍ୟମରେ ନାଗରିକତା ଦିଆଯିବ ନାହିଁ ।