ଭୁବନେଶ୍ୱର: ଓଡ଼ିଶା ଗଣପର୍ବ କୁହାଯାଉଥିବା ରଜ ପର୍ବ ଯେ ଖାଲି ଓଡ଼ିଶାରେ ପାଳନ ହୁଏ, ତାହା ନୁହେଁ , ବରଂ ଦେଶର ବିଭିନ୍ନ ରାଜ୍ୟ ସମେତ ବିଦେଶରେ ମଧ୍ୟ ପାଳିତ ହୋଇଛି । ଓଡ଼ିଶାଠାରୁ ହଜାର ହଜାର ମାଇଲ୍ ଦୂର ମାଲେସିଆରେ ରହୁଥିବା ଓଡ଼ିଆମାନେ ଏହି ରଜ ପର୍ବକୁ ବେଶ୍ ସମାରୋହରେ ପାଳନ କରିଛନ୍ତି । କାକରା, ପୋଡ ପିଠା ଓ ମିଠା ପାନ ସହିତ ନାଚ ଗୀତରେ ଏହି ରଜ ପର୍ବ ପାଳନ କରି ଓଡ଼ିଶା ବାହାରେ ରହି ବି ରଜ ପର୍ବକୁ ବେଶ୍ ସ୍ମରଣୀୟ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ମାଲେସିଆର ରାଜଧାନୀ କୁଆଲାଲାମ୍ପୁରଠାରେ ରହୁଥିବା ଶହ ଶହ ଓଡ଼ିଆ ରଜ ପର୍ବ ଉପଲକ୍ଷେ ଗତକାଲି ରଜ ସଂକ୍ରାନ୍ତି ଅବସରରେ ଏକତ୍ର ହୋଇଥିଲେ । ସ୍ଥାନୀୟ ନେତାଜୀ ସୁଭାଷ ଚନ୍ଦ୍ର ବୋଷ ଇଣ୍ଡିଆ କଲଚରାଲ ସେଂଟରଠାରେ ଆୟୋଜିତ ଏହି ରଜ ଉତ୍ସବ କାର୍ଯ୍ୟକ୍ରମ ଅବସରରେ ପ୍ରଥମେ ଖାଦ୍ୟ ପେୟର ଆସର ଜମିଥିଲା । ମିଠା ପାନ ସାଙ୍ଗକୁ ପୋଡ ପିଠା, ଛେନାପୋଡ, ଦହିବରା, କାକରା ଆଦି ଖାଦ୍ୟ ଖାଇବା ସହିତ ଆରମ୍ଭ ହୋଇଥିଲା ରଜ ପର୍ବ । ଏହି ଅବସରର ମହିଳାମାନେ ବନସ୍ତେ ଡାକିଲା ଗଜ ବରଷକେ ଥରେ ଆସିଛି ରଜ ଗୀତ ଗାଇ ସମସ୍ତଙ୍କ ମନ ମୋହିଥିଲେ ।
ଏହି ଅବସରରେ ଆୟୋଜିତ ସଭାରେ ପ୍ରବାସୀ ଓଡ଼ିଆ ସଂଗଠନର ସଭାପତି ଦୀପ୍ତିରଞ୍ଜନ ନନ୍ଦ ଓ ସ୍ନିଗଧା ମିଶ୍ର ପ୍ରମୁଖ ମାଲେସିଆ ରହୁଥିବା ଓଡ଼ିଆମାନଙ୍କ ସଂଗଠନ ସଂପର୍କରେ ଆଲୋକପାତ କରିଥିବା ବେଳେ ରଜ ପର୍ବ ପାଳନର ଲକ୍ଷ୍ୟ ଓ ଉଦ୍ଦେଶ୍ୟ ସଂପର୍କରେ ଆଲୋକପାତ କରିଥିଲେ ।
ଏହାପରେ ନାଚଗୀତର ଆସର ଜମିଥିଲା । ମହିଳାମାନେ ସମ୍ବଲପୁରୀ ନୃତ୍ୟ ପିଞ୍ଜିରି ପିଞ୍ଜା, ରିମ୍ ଝିମ୍ ପାନି ବରଷୁଥିଲା, ମୁଇଁ ଯାଇଥିଲି ବରଗଡ ହାଟକୁ ଆଦି ଗୀତରେ ନୃତ୍ୟ ପରିବେଷଣ କରିଥିବା ବେଳେ ଓଡ଼ିଆ ସିନେମା ଗୀତ ମଲକା ମଲକା ଗୀତରେ ମଞ୍ଚ ଦୁଲୁକେଇଥିଲେ । ସେହିପରି ହିନ୍ଦୀ ଗୀତ ମୁଙ୍ଗୁଡା, ଲଡକି ଆଁଖ୍ ମାରେ ଭଳି କିଛି ଗୀତରେ ନାଚିଥିଲେ ।
ସେହିପରି ପୁରୁଷମାନେ ଟିକ୍ ଟିକ୍ ଟିକ୍ ଟିକ୍ ଘଣ୍ଟା ଚାଲେ, ଆମେ ସବୁ ବେକାର ଟୋକା, ଆଜି ମୁଁ ପିଇନି ପରି ଚର୍ଚ୍ଚିତ ଓଡ଼ିଆ ଗୀତରେ ନାଚିଥିବା ବେଳେ ଏହି ନାଚର କୋରିଓଗ୍ରାଫି ବେଶ୍ ପ୍ରଶଂନୀୟ ଥିଲା । ସେହିପରରି ଛୋଟ ଛୋଟ ପିଲାମାନେ ମେୟା ଯଶୋଦା, ଘୁମର, ଭାରତ ନାଟ୍ୟମ, ଓଡ଼ିଶୀ ଏବଂ ବଲିଉଡ ଗୀତରେ ନୃତ୍ୟ ପରିବେଷଣ କରିଥିଲେ ।
ଏହି ଅବସରରେ ଓଡ଼ିଶାରେ ରଜ ପର୍ବ କେମିତି ପାଳନ ହୁଏ , ରଜ ପର୍ବ ସହିତ ଚାଷ ବାସର ସଂପର୍କ କେମିତି ସେ ସଂପର୍କରେ ଆଲୋଚନା ହୋଇଥିଲା । ସେଠାରେ ଉପସ୍ଥିତ ଥିବା ଓଡ଼ିଆମାନେ ଓଡ଼ିଶାର ସ୍ମୃତିଚାରଣ କରିବା ସହିତ ନିଜ ମାତୃଭୂମିର ମହାନତା ସଂପର୍କରେ ଆଲୋକପାତ କରିଥିଲେ । ଏହି ଅବସରରେ ମାଲେସିଆ ଓଡ଼ିଆ ସଂଗଠନ ପକ୍ଷରୁ ୟଙ୍ଗ ଆଚିଭର୍ସ ଏବଂ ଉତ୍କଳ କ୍ରିକେଟ୍ ଟିମଙ୍କୁ ସମ୍ବର୍ଦ୍ଧିତ କରାଯାଇଥିଲା। ଏହି ସାଂସ୍କୃତିକ କାର୍ଯ୍ୟକ୍ରମର ସୁପରିଚାଳନା କରିଥିଲେ ପ୍ରଣତି ମିଶ୍ର।