‘ଚାକିରି ପାଇଁ ମହିଳା ବିବାହିତ ହେବା ଜରୁରୀ’ ସର୍ତ୍ତ ଅସାମ୍ବିଧାନିକ : ରାଜସ୍ଥାନ ହାଇକୋର୍ଟ

ଯୋଧପୁର: ରାଜସ୍ଥାନ ସରକାରଙ୍କ ଦ୍ବାରା ଘୋଷିତ ସାର୍ବଜନୀନ ରୋଜଗାର ପାଇବା ପାଇଁ ଜଣେ ମହିଳା ବିବାହିତ ହେବା ଜରୁରୀ ବୋଲି ରହିଥିବା ନିୟମକୁ ରାଜସ୍ଥାନ ହାଇକୋର୍ଟ ଅସାମ୍ବିଧାନିକ ବୋଲି କହିଛନ୍ତି । କୋର୍ଟ ତାଙ୍କ ରାୟରେ କହିଛନ୍ତି ଯେ ବିବାହ ଆଧାରରେ ସରକାରୀ ଚାକିରିରୁ ବଞ୍ଚିତ ହେବା ସମ୍ବିଧାନର ଧାରା ୧୪/୧୬ ଅନୁଯାୟୀ ଦିଆଯାଇଥିବା ମୌଳିକ ଅଧିକାରର ଉଲ୍ଲଂଘନ ଏବଂ ମହିଳାଙ୍କ ମର୍ଯ୍ୟାଦାର ଉଲ୍ଲଂଘନ।

ଅଙ୍ଗନବାଡ଼ି କର୍ମୀ, ମିନି କର୍ମୀ ଓ ଅଙ୍ଗନବାଡି ସହାୟିକା ନିଯୁକ୍ତି ପାଇଁ ରାଜସ୍ଥାନ ସରକାରଙ୍କ ମହିଳା ଓ ଶିଶୁ ବିକାଶ ବିଭାଗ ଜାରି କରିଥିବା ବିସ୍ତୃତ ନିୟମରେ ଅବିବାହିତ ପ୍ରାର୍ଥୀଙ୍କ ମୌଳିକ ଅଧିକାରର ସ୍ପଷ୍ଟ ଉଲ୍ଲଂଘନ ବୋଲି ହାଇକୋର୍ଟ କହିଛନ୍ତି।

ଆବେଦନର ଶୁଣାଣି ସମୟରେ ଆଇନଜୀବୀ ଯଶପାଲ ଖିଲେରୀ କହିଥିଲେ ଯେ ଭାରତର ସମ୍ବିଧାନ ସ୍ପଷ୍ଟ ଭାବରେ ନାଗରିକମାନଙ୍କ ମଧ୍ୟରେ ଭେଦଭାବକୁ ନିଷେଧ କରିଛି ଏବଂ ଆଇନ ଆଗରେ ସମାନତାର ମୌଳିକ ଅଧିକାର ପ୍ରଦାନ କରିଛି। ଏହା ସତ୍ତ୍ୱେ ରାଜ୍ୟ ସରକାର ଜଣେ ବିବାହିତା ମହିଳା ଓ ଅବିବାହିତ ମହିଳାଙ୍କ ମଧ୍ୟରେ ଭେଦଭାବ କରି ଏକ ନୂଆ ମୋର୍ଚ୍ଚା ଖୋଲିଛନ୍ତି, ଯାହାକୁ ଭାରତୀୟ ସମ୍ବିଧାନର ନିର୍ମାତାମାନେ କଳ୍ପନା କିମ୍ବା ଚିନ୍ତା ମଧ୍ୟ କରିନଥିଲେ, ଯାହାକୁ ରାଜ୍ୟ ସରକାର ଏବେ ସର୍କୁଲାରରେ ଏକ ବିବାଦୀୟ ସର୍ତ୍ତ (ମହିଳାଙ୍କ ବିବାହ ହେବା ଆବଶ୍ୟକ) ରଖି ଖୋଲିଛନ୍ତି, ଯାହାକୁ ଉଚ୍ଛେଦ କରିବାକୁ ପ୍ରାର୍ଥନା କରାଯାଇଥିଲା।