କାର୍ଗିଲ ଯୁଦ୍ଧରେ ଭାରତକୁ ଅନ୍ୟ ଦେଶମାନଙ୍କର ସାହାଯ୍ୟ ମିଳିନଥିଲା: ରାଜନାଥ
ନୂଆଦିଲ୍ଲୀ: କାର୍ଗିଲ ଯୁଦ୍ଧରେ ଭାରତକୁ ଅନ୍ୟ ଦେଶମାନଙ୍କର ସହଯୋଗ ମିଳିନଥିଲା | ତଥାପି ବି ଭାରତ ନିଜ ଦମରେ ଯୁଦ୍ଧ ଲଢ଼ିଥିଲା ଓ ବିଜୟ ହୋଇଥିଲା | କାର୍ଗିଲ ବିଜୟ ଦିବସ ଅବସରରେ ଦେଶର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଆଜି କିଛି ଏଭଳି କହିଛନ୍ତି | ରାଜନାଥ ଜମ୍ମୁରେ କାର୍ଗିଲ ଯୁଦ୍ଧରେ ସହିଦ ହୋଇଥିବା ବ୍ୟକ୍ତିଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ଏହି ଅବସରରେ ସେ କହିଛନ୍ତି ଯେ ଭାରତ ବର୍ତ୍ତମାନ ଏକ ଶକ୍ତିଶାଳୀ ଦେଶ ହୋଇପାରିଛି। ସେନାର ସୈନିକମାନଙ୍କର ଯେତେ ପ୍ରଶଂସା କଲେ ବି କମ୍ ହେବ । କାର୍ଗିଲ ଯୁଦ୍ଧରେ ଆମର ତିନି ସେନାବାହିନୀଙ୍କ ମଧ୍ୟରେ ସମନ୍ୱୟ ଦେଖିବାକୁ ମିଳିଥିଲା |
Sambad is now on WhatsApp
Join and get latest news updates delivered to you via WhatsApp
ରାଜନାଥ କହିଛନ୍ତି ଯେ ସ୍ଥଳସେନାକୁ ସାହାଯ୍ୟ କରିବାକୁ ବାୟୁସେନା ଅପରେସନ୍ ସଫେଦ ସାଗର ଆରମ୍ଭ କରିଥିଲାବେଳେ ନୌସେନା ଆରବ ସାଗରରେ ସମୁଦ୍ର ପଥକୁ ଅବରୋଧ କରିବାରେ ଏକ ବଡ଼ ଭୂମିକା ଗ୍ରହଣ କରିଥିଲା। ୧୯୬୫ ଏବଂ ୧୯୭୧ ଯୁଦ୍ଧରେ ପାକିସ୍ତାନକୁ ପରାଜୟର ସାମ୍ନା କରିବାକୁ ପଡିଥିଲା ଏବଂ କାର୍ଗିଲ ଯୁଦ୍ଧରେ ମଧ୍ୟ ଭାରତୀୟ ସୈନିକମାନେ ପାକିସ୍ତାନକୁ ପରାସ୍ତ କରିଥିଲେ। ମୁଁ ଆପଣଙ୍କୁ ନିଶ୍ଚିତ କରିବାକୁ ଚାହୁଁଛି ଯେ ଯଦି ପାକିସ୍ତାନ ପୁନର୍ବାର ଏଭଳି ଦୁଃସାହସ କରେ, ତେବେ ତାଙ୍କୁ ଉପଯୁକ୍ତ ଉତ୍ତର ଦିଆଯିବ।
କାର୍ଗିଲ ବିଜୟ ଦିବସ ଅବସରରେ ସେ କହିଛନ୍ତି ଯେ ଏହି ଯୁଦ୍ଧରେ ଭାରତ ବିଶ୍ୱର ସମର୍ଥନ ପାଇନଥିଲା, ତଥାପି ଭାରତ ନିଜ ଦମରେ ଏହି ଯୁଦ୍ଧକୁ ଲଢ଼ି ଜିତିଥିଲା | ସେ ଆହୁରି ମଧ୍ୟ କହିଛନ୍ତି ଯେ ଆମେ ପଡୋଶୀ ଦେଶମାନଙ୍କ ସହିତ ଭଲ ସମ୍ପର୍କ ରଖିବାକୁ ଚାହୁଁଛୁ, କିନ୍ତୁ ଯଦି କେହି ଆଖି ଦେଖାଇବାକୁ ଚେଷ୍ଟା କରନ୍ତି, ତେବେ ତାଙ୍କୁ ମଧ୍ୟ ଉତ୍ତର ଦିଆଯିବ |