ନୂଆଦିଲ୍ଲୀ: ଜମ୍ମୁ କଶ୍ମୀରରୁ ଧାରା ୩୭୦ ହଟାଯିବା ପରେ ବିବ୍ରତ ପାକିସ୍ତାନ ଭାରତ ବିରୋଧରେ ବିଷୋଦ୍ଗାର ଜାରି ରଖିଥିବା ବେଳେ ଆଜି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ପାକ୍କୁ କଡ଼ା ଚେତାବନୀ ଦେଇଛନ୍ତି। ଏବେ ପାକିସ୍ତାନ ସହ ଭାରତ ଯାହା ବି କଥାବାର୍ତ୍ତା କରିବ ତାହା କେବଳ ପାକ୍ ଅଧିକୃତ କଶ୍ମୀର (ପିଓକେ)କୁ ନେଇ ହେବ ବୋଲି ରାଜନାଥ କହିଛନ୍ତି। ହରିୟାଣାରେ ଏକ ଜନସଭାକୁ ଉଦ୍ବୋଧନ ଦେଇ ରାଜନାଥ କହିଛନ୍ତି, ଯେଉଁ ପର୍ଯ୍ୟନ୍ତ ପାକିସ୍ତାନ ତା’ର ରାଷ୍ଟ୍ର ପ୍ରାୟୋଜିତ ଆତଙ୍କବାଦକୁ ଶେଷ କରିନାହିଁ, ସେ ପର୍ଯ୍ୟନ୍ତ କଥାବାର୍ତ୍ତା ହେବନାହିଁ। ଭବିଷ୍ୟତରେ ଯଦି ବି କଥାବାର୍ତ୍ତା ହେବ ତାହା କେବଳ ପିଓକେରେ ସୀମିତ ରହିବ ବୋଲି ରାଜନାଥ ଚେତାଇ ଦେଇଛନ୍ତି। ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ୍ ନିକଟରେ ପିଓକେରେ କହିଥିଲେ ଯେ ଭାରତ ବାଲାକୋଟଠାରୁ ବଡ଼ ଆକ୍ରମଣ ପିଓକେରେ କରିବାକୁ ଚାହୁଛି ଏବଂ ପାକିସ୍ତାନ ଏହାର ମୁକାବିଲା ପାଇଁ ପ୍ରସ୍ତୁତ ରହିଛି।
Sambad is now on WhatsApp
Join and get latest news updates delivered to you via WhatsApp
ରାଜନାଥ ଏହାର ଜବାବରେ କହିଛନ୍ତି ଯେ ପୁଲୱାମା ପରେ ଇଟାର ଜବାବ ପଥରରେ ଦିଆଯିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଷ୍ପତ୍ତି ନେଇସାରିଛନ୍ତି ଏବଂ ଆତଙ୍କବାଦୀଙ୍କୁ ନିପାତ ଅଭିଯାନ ଜୋର୍ଦାର ହୋଇଛି। ବାଲାକୋଟରେ ଆତଙ୍କବାଦୀ ଆଡ଼ା ଧ୍ବଂସ କରିବାକୁ ଭାରତ ବଡ଼ କାର୍ଯ୍ୟାନୁଷ୍ଠାନ କରିଥିଲା ବୋଲି ପାକିସ୍ତାନ ସ୍ବୀକାର କରିଛି ଏବଂ ଏବେ ପିଓକେକୁ ନେଇ ପାକିସ୍ତାନକୁ ଚିନ୍ତା ଘାରିଛି ବୋଲି ରାଜନାଥ କହିଛନ୍ତି। ଧାରା ୩୭୦ ହଟାଯିବା ପରେ ବିଚଳିତ ପାକିସ୍ତାନ ଭାରତ ବିରୋଧରେ ବିଶ୍ବ ସମୁଦାୟକୁ ବିଭ୍ରାନ୍ତ କରିବାକୁ ଯେଉଁ ଅପଚେଷ୍ଟା କରିଥିଲା ତାହାକୁ ଭାରତ ପଣ୍ଡ କରିଦେଇଛନ୍ତି ବୋଲି ପ୍ରତିରକ୍ଷା ମନ୍ତ୍ରୀ କହିଛନ୍ତି। ବିଜେପି ନିଜ ନିର୍ବାଚନୀ ଇସ୍ତାହାରରେ ଯେଉଁ ପ୍ରତିଶୃତି ଦେଇଥିଲା ତାହାକୁ ଅକ୍ଷରେ ଅକ୍ଷରେ ପାଳନ କରିବ ବୋଲି ରାଜନାଥ କହିଛନ୍ତି।