୨୦୨୪ରେ ପୁଣି ପ୍ରଧାନମନ୍ତ୍ରୀ ହେବେ ନରେନ୍ଦ୍ର ମୋଦୀ, ଭବିଷ୍ୟବାଣୀ କଲେ ରାମଦାସ ଆଠୱାଲେ
ନୂଆଦିଲ୍ଲୀ:କେନ୍ଦ୍ର ମନ୍ତ୍ରୀ ତଥା ଆରପିଆଇ ମୁଖ୍ୟ ରାମଦାସ ଆଠୱାଲେ ବିରୋଧୀଙ୍କୁ ଭିନ୍ନ ଢଙ୍ଗରେ ଟାର୍ଗେଟ କରିଛନ୍ତି। ସେ ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋର ଏବଂ ଏନସିପି ସୁପ୍ରିମୋ ଶରଦ ପାୱାରଙ୍କ ମଧ୍ୟରେ ହୋଇଥିବା ବୈଠକକୁ ନେଇ ମଧ୍ୟ ଟାର୍ଗେଟ କରିଛନ୍ତି। ଆଠୱାଲେ କହିଛନ୍ତି ଯେ ପ୍ରଶାନ୍ତ କିଶୋର ଏବଂ ଶରଦ ପାୱାରଙ୍କ ବୈଠକ ବିରୋଧୀଙ୍କୁ କୌଣସି ବାଟ ଦେବ ନାହିଁ। ସେ କହିଛନ୍ତି ଯେ ଏହି ବୈଠକ କାରଣରୁ ସମସ୍ତ ବିରୋଧୀ ଦଳର ନେତା ଏକାଠି ହୋଇପାରିବେ ନାହିଁ। ଏହି ସମୟରେ ସେ ବିରୋଧୀଙ୍କୁ ଟାର୍ଗେଟ କରି କହିଥିଲେ ଯେ,’ନରେନ୍ଦ୍ର ମୋଦୀ ଜଣେ ପ୍ରକୃତ ଆମ୍ବେଦକରବାଦୀ, ୨୦୨୪ରେ ପୁଣିଥରେ ପ୍ରଧାନମନ୍ତ୍ରୀ ହେବେ ମୋଦୀ’ ।
Sambad is now on WhatsApp
Join and get latest news updates delivered to you via WhatsApp
ସେ ଆହୁରି ମଧ୍ୟ କହିଛନ୍ତି ଯେ ଭାରତୀୟ ଜନତା ପାର୍ଟି ପ୍ରଶାନ୍ତ କିଶୋରଙ୍କ ବିନା ୨୦୧୯ ଲୋକସଭା ନିର୍ବାଚନରେ ୩୦୩ ଟି ଆସନ ଜିତିଛି। ସେ କହିଛନ୍ତି ଯେ ଏନଡିଏକୁ ଗୃହରେ ମଧ୍ୟ କିଛି ବିରୋଧୀ ଦଳର ସମର୍ଥନ ମିଳୁଛି । କେନ୍ଦ୍ର ମନ୍ତ୍ରୀ କହିଛନ୍ତି ଯେ ୨୦୨୪ ମସିହାରେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ ଏନଡିଏ ପୁଣି ଥରେ ଜିତିବ।
ସୂଚନା ଥାଉ କି ଶୁକ୍ରବାର ଦିନ ଶରଦ ପାୱାର ଏବଂ ପ୍ରଶାନ୍ତ କିଶୋରଙ୍କ ମଧ୍ୟରେ ବୈଠକ ତିନି ଘଣ୍ଟା ଧରି ଚାଲିଥିଲା। ପାୱାରଙ୍କ ବାସଭବନ ସିଲଭର ଓକ ଠାରେ ଅନୁଷ୍ଠିତ ବୈଠକରେ ଏନସିପି ରାଜ୍ୟ ସଭାପତି ଜୟନ୍ତ ପାଟିଲଙ୍କୁ ମଧ୍ୟ ନିମନ୍ତ୍ରଣ କରାଯାଇଥିଲା। ତେବେ କେଉଁ ପ୍ରସଙ୍ଗରେ ଆଲୋଚନା କରାଯାଇଥିଲା ତାହା ଉପରେ ସମ୍ପୂର୍ଣ୍ଣ ସୂଚନା ପ୍ରକାଶ କରାଯାଇ ନାହିଁ। ବିଶ୍ୱାସ କରାଯାଉଛି ଯେ ଆଗାମୀ ଦିନରେ ପ୍ରଶାନ୍ତ କିଶୋର ଏନସିପି କିମ୍ବା ମହାବିକାଶ ଅଘାଡି ପାଇଁ କାମ କରିପାରନ୍ତି। ତେବେ ବରିଷ୍ଠ ଏନସିପି ନେତା ତଥା ରାଜ୍ୟ ଉପମୁଖ୍ୟମନ୍ତ୍ରୀ ଅଜିତ ପାୱାର ଏହି କଳ୍ପନାକୁ ଖଣ୍ଡନ କରିଛନ୍ତି।